2 KORINTUS 8
8
Akuni inakba eru wene
1 #
Rm. 15:26
Nogari o, nir ir akuni jemaat Makedonia mende, Ar Allah obabur pano nen nenggerogon pagarek werek eti, kir kinilu aruak nen yokerak o. 2Jemaat Makedonia mende anggin panggin inoba wuka paga, iniliti kode piktogo amburu mbalagugwama, anggin panggin inoba wuka kigik mende, inagarek dek kigik ar, iniliti adeknggen pano paga, inamendek akuni yamak dak tagwi o. 3Ir inamendek dek mende, akuni inake burak kalok, inagarek iniliti kunik mende andagik dek, yi erni yoragik dek kigik ar ekwi eti, ebebar an nil darigi niluma, ir nen erir lek tagwi o. 4Ir nen an noba wagugwarik, kar nen pano andagen kalok, ir Ar Allah akburi o Yudea mende etoma, nir ninom nen yamak dagu dogowok nen o, yiluk o paga yornirugwama nen eritagwi o. 5Ir inebe ndak ibibir Ar Allah ake birugwama o. Yabungga Ar Allah iliti mikige ndak-ndak, nir ninake birugwama. Nir nen ya ndak-ndak woknerani yoragwi dek kigik, ir nen kudi warek nggebek togo ogona paga ar wokneragugwa o. 6Eta an paga, ar Titus yabu yi mende erin yogopma, pano eka kogorikma, ar ebe kir kinoba watuk nen kir kinom yabu yi erubagik nen yiluk kinoba lakbi wagi o. 7Kir ye mende nde mende eru ndakma, oba panggolu ndakma, kinane werekma, kiniliti werekma, yamak dau kininggi werekma, nir yamak ninau kininggi werek eritagwi o. Etama yogondak kir nen yabu pano nakba kakba eru wene yi ninom eruwok o, yiluk yorkeragi o. 8An nen wene yi mugogo kinoba bigikdek. Ar Allah akburi amberak nen, ir akuni ambik yamak dagwima, kir kiniliti nen akuni inakba eru ngga kudi werek yiluk, an nilu aruwak nen yiluk yorkeragi o. 9Nir Yesus Kristus nen iliti kunik ernakige ebebar kinilu agagemo o. Ar ebe inggi werek mende, kir kinake inggimo dek etagagemo. Ar inggi dek agagemo nen, kir kininggi werek dogowak nen yiluk etagagemo o. 10Wene eti kir nen eru ake pano, nen an nakla andagi mende ebe yegerogo, kir kinake o telek pano werek ya paga, kir nen yabu yi tahun alep ekop etnogo paga, yogondak ambi inom eruwok o yiluk, kinane dambulogo nen erni o. 11Yogo, yogondak kir nen yabu inakba erurak mende eti nggokbok togo arar erni o! Kir nen eru kinobarne lakigik, kiniliti adeknggen paga, kinagarek kininggim werek mende paga mban eku dogoni o. 12Kir kininggimo werek mende, adeknggen paga arar wogorumo, wogorugun mende etoma waganigin o. Kininggimo dek mende kwari lagik wogoraurak dek o.
13An nen ir amberak inoba anggin dek erogo biluk, kir kalok kinoba anggin durogo bik yiluk dek o. Kir ndak-ndak dogu paga yokera taga o. 14Yabungga etoma, kir kininggimo dek aganem, ir ininggimo werek arumo, ir nen yamak kinagu dogogun o. Eta yamak-yamak dogorak mende ebe etegerogo arar o. 15#Kel. 16:18Ma Alkitab mbalek paga nen yegerogo yirige,
“Ir akuni inamendek enggen mbalek nggok kwak kodagwi mende,
ir inamendek ugu ndin bugun dek ar o.
Nen ir akuni inamendek enggen mbalek bugudagar kodagwi mende,
ir inamendek ugu dek arigin dek o,” yiluk yirige.
Titus ogari inom omanggi paga lakbarige wene
16Ar Allah nen Titus obabur iliti bogok togo, nir ndak-ndak erogo begemo, kir yamakina wariginma, nir we Ar Allah wa yiluk, yoritagwi o! 17Nir nen waganogo lakbi wago paga mban dek, ar iliti bogok togo yamakinak nen yiluk, kinoba warigin yegemo lakbi wago endi o. 18Ar ogarak ambi Jemaat yoma, Ar Allah wene Pano Wene yorar nega kalok bi wakwima, imbirak lakba warugun o. 19Ambi ar nir ninom nugu dogowak nen yiluk, ir Jemaat yoma obok nen kwagago alubak tebelogo wokneragugwa mende o. Nenaluk nir uang bogop mende yoma, wogorar nugwi ninagik, Ar Tuhan endaga ngggok ekwi, kir nen ir iniliti paga ar yamak ninar tagwi o yiluk, kinilu agwi erugun o.
20Akuni amberak nen, ye mende ndek mende ambigar bogo mende, nenggerogon eka yiluk yoneragunem yiluk, obok nggidik nggedok ekoma o. 21#Ams. 3:4Nir nen Ar Allah uwagam inom, akuni inuwagam inom, pik pak dombok togo ar eritagwi o.
22Nir nen ar Titus ogarak endi imbirak, ambi inom ar lakba wago o. Nir nen birkogo mende, ar obabur pano, akuni obogar yamak daurak kogo, nen yogondak ar nen kir yamak kinak nen yiluk iliti kinoba lakbi wagama, ar imbirak lakbi wago endi o. 23Titus ake paga, ar an nimbirak yabu erir taga mendema, ar nen kir pano yamak kinaga dogogin o. Nen, ap inebe mbere inom wagiya enda, ir Jemaat yoma obok inane dambulogo nen, Kristus endaga nggok eruwak yiluk, ir inom lakba wagoma wagiya endi o. 24Nir ninakla wadok eti, kir kiniliti kunik paga wogonabu yogo o. Ir Jemaat lakba wagiya werek nen, kir ir kiniliti kunik inilu agwi, nir nen kir kinabok wogok dinagarugu mende ebebar yiluk inilu agik, erugun o.
Currently Selected:
2 KORINTUS 8: WLW
Highlight
Copy
Compare
Share
Want to have your highlights saved across all your devices? Sign up or sign in
