Fakasigadan 49
49
Israel Nafadante at ngay Baguama
1Sanya ginan, Akub nagewan at ngay baguama ay nalong te, “Wainyayam, e fagyalongun kyay sa ayu.
2Ku ngay baguama, akbangi stae ay dungugani angku.
3Rubin, o wan at kaka sas fagayu ku sisian.
Ay nu kadungug ban o, gtungud tua am ngay arian.
4Ay kata yangay o sik mamam takuluk
aroro wo mafafaragang am ngay fakaylatun.
Aroro nafataladan wayo ku mangena fag fagsuguan,
wa ban o gtungud am ngay arian.
5Ay am fag duksay, Simyun ay Lebi, masadi am.
Maksvn nu gfauri am ay iba siginan nu gagbilug am ay famawayan fag ngay fagagbilugun.
6Kwa ban si ayu dewa am e fagmafulun,
aroro ginam kadotama kamabul am,
ay gfaalbi wam anggan baka tama nu kaylat wam.
7Gfauri kban ayu aroro gfangadotama am maksvn.
Ay namasaruayan kban ayu sas fagdaul talun Israel.
8Uda, am ngay faduksay ban gseg emu ay gsuyu.
Ay gbabo ban o am ngay fawayan.
9Ay kata ban o sik liun at riangan tagrvbvy at fagnangonun,
ay kafoli sat bale laman nantungkud,
ay we manangasalag anya.
10Ay gfunan tua ban o gugat,
ay siginan tua ban gugat am kasugfunanan tagfunan.
Nu katanya, tiba bank talun at ngay taw gfon tua ban sa emu famayad,
ay kanya ban fagayu gfaning tua gugat emu.
11Ay maramraman ban am daga.
Dewa o nasiuk am asnu muankabang sim tanuman wat ubas,
wa mafamin ya aroro at kayuan.
Ay wa ban kamin am fanlangu dewa ban kanya wan am famegus am lanbung.
12Am mata ban malyo tua gugat siginan at kayuan am wat ubas at rawvg at mamam,
ay at kayuan ban am fagbaugun at susu bilug, am bagang ban kaaksvn yay nu kalaksi.
13Sebulun, nu gbanwan ban o, sis tigyangan dagat.
Ay si ban am talun, ngay sakayan lino at fakatungkudan.
Ay am talun ban sitsigons Sidun.
14Isakar, o ban kata o sik asnu ay magaras,
tagtungkud si sangay tupa at fagbanwanan.
15Gagwantan ban o gafagsuguanan dewa ban e gfafasanan sa emu at mabyat,
ay dewa ban o gafabulunan gfakamulun,
nu masine tua ngap ban ay ngayu nusnge wain sam fagnamanwanan fag daga.
16Dan, o ban sik matuyan o fag tagfangguna am ngay taw,
laman Israel at kasugfunanan at sadi.
17Ay kata ban o sik ule at ke fangganga tagsis day dalan,
takagat taglangfe fag kabayu at darafa,
nu katanya, tagsakay antong.”
18Sanya ginan, Akub nalong te,
“Yawi, gfanya au nu gfalangfe o.”
19Ay Akub nafataglayun nalong te,
“Gad, sik ngay tagfangkamul ban namawayan emu,
ay dewa katanya, gfasud yay ban o gina kanya fagayu glagyu.
20Aser, ngayu ban am gutluan.
Namon ban o at mayayum fag ngay fakonun sa sangay fun.
21Naftali, sik tagfadasug ban o at masine fag ngay barita
kata sik bian tagriangan at masine.
22Use, o ban kata o sik mela fag asnu tagsis tigyangan bulbug
ay tagsis tigyangan tangrawan.#49:22 ay mannga: Use, o ban kata o sik wat tagtugbung sis tigyangan bulbug at nalangfad sas sangaba dingding alad.
23Ay sik ngay taw ban at ke ngay godun kauri emu,
ay kanya ban fagayu gfana emu, at kaksvnan nu kauri.
24Ay dewa katanya, anggan ban o, gfana o gugat anya fagayu,
ay am ngay take ban mabitsug tua gugat,
aroro siginan Akub at Dius at mabalyanan,
Israel at tagulit ay at fagsarirungan at gubuk.
25Ay am ngay mangaguyang ban at Dius
ggubuk tua gugat ay gfon sa emu nusnge wain.
Ay kanya ban gfadasug yangay sa emu arak siginans kiwang,
ay mamam siginan sangay bulbug.
Ay gfon ban sa emu ngayuk sisian ay ngayuk fagbaugun.
26Use, ngayu ban ku fon sa emu,
gtungud tua ban ebi taguna fag ngay fananumun at rawvg tagsis sangay buksul.
Si tua ban nangus emu tuy fag famadante,
aroro gtungud tuo am ngay faduksay.
27Benamin, o ban kata o sik takalunus fag idu talun tagfangagat,
tagfabul gina swa menit ay tagsisad yabi nu nangon.”
28Kanya fag labi dua, Israel at baguama, ngay taw Israel at ngay mangaguyang. Kata kanya Israel at famadante sat ngay baguama.
Akub nu Kabul
29Israel nu nafadante wan at ngay baguama, kanya nalong yay te, “Wa ban ngaduge ya nu gleleg au ay nangagamut kwan sa ku ngay kalongan at mabulan. Ay nu nbul kban, folii angku magamut ku ngay mangaguyang sas luib tagsis Efrun fag taw Ket at gamasun. 30Kanya fag gamasun sis day Makpela munakbang sis Mamre sis talun Kanaan. Kafag gamasun ay fag luib ku fufuama Abrayam at nabayad siginans Efrun fag taw Ket laman at fagagbilugun fag fagfolian. 31Ay sanya wan nu namoli anya ay ku fufuina Sara, ay ku mama Isak ay ku mina Rebeka, ay sanya yangay nu gfoli au ku mangena Lia. 32Kafag gamasun ay fag luib at nabayad siginan sa sangay taw Ket.” 33Ay Akub nu ntabu wan nu garingang sat ngay baguama, kanya antaygilid ay wa gengasan ya ay anbul wan.
Currently Selected:
Fakasigadan 49: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
