Fakasigadan 50

1Ay Use naugwan wa vtv at mama ay nayuk kaduge gwayway. 2Ay Use nasugu sat ngay taggubuk te, “Fatayuki sa ku mama sik fanyud kadan.” Ay kanya fagayu nafatayuk. 3At kadugean nu gfakamulun sas Akub at bilug, ufatk safuluk menit, kata ngay taw Igiptu at faugali. Ngay taw Igiptu nu kabalu fituk safuluk menit.

4Ay nu nlangfe wan kafag fituk safuluk menit, Use nalong sas Igiptu at fun at ngay fagsuguan te, “Nu masine, longi sas Igiptu at fun te, 5aylati nu namoli au ku mama sas talun Kanaan, aroro ku mama gina gakabulun nafafatuyanan sa angku te, nu gfoli kban anya sa tua at nawat fag fagfolian tagsis Kanaan; ay nu nafoli kwa ban anya, kafoli kway vtv.”

6Ay Igiptu at fun nu nadungug Use at fagetun, kanya nalong sas Use te, “Agvd, faningi am nafatuyanan sam mama. Loi wan namoli wo anya.”

7Ay Use nalo wan gadgaloan ngayuk tagfangguna sis Igiptu at fun at fagfagtainanan: ngay tagalaga at bale daul ay ngay tagfangguna talun Igiptu. 8Anggan Use at talnayan ay at mama at talananan ay at ngay faduksay nanangalo yangay. At kinfamato sis talun Gusen, ngay taw Israel way lang at ngay sisian ay at ngay fagbaugun. 9Ay anggan tagsaful gsakay sis faguyudan galo yangay. Ay ngayu tua at nanangalo sas fagfolian.

10Ay nu ndasug sas fagruyusan tagsis talun Atad, munakbang Liskung Urdan, gdog yay namatang ay anbalu aroro sas Israel at nabulanan. Ay Use maksvn nu kabalu at mama; at kadugean nu kabalu fituk menit. 11Ay ngay taw Kanaan nu nalag te, ngay taw Igiptu maksvn nu kabalu sis Atad fag fagruyusan, kanya fagayu nalong te, “Ngay taw Igiptu maksvn nu kabalu.” Nu katanya kanya fagayu nafangayan kafag fagruyusan te, Abel-Misraim.#50:11 Abel-Misraim: at masuad, Ngay taw Igiptu nu gwayway.

12Ay Israel at ngay sisian nafaning at suguan. 13Ay kanya fagayu nabuba Akub at bilug sas talun Kanaan ay nanamoli sas luib tagsis gamasun sis day Makpela sas fakamenitan baliwa. At fufuama Abrayam nabayad kanya fag luib ay kafag gamasun siginans Efrun fag taw Ket laman ban at fagfolian. 14Ay kanya fagayu nu nafoli wan Akub at bilug, Use ay at ngay faduksay ay fagayu at fadgaloan, noli wan sas talun Igiptu.

Use at Fatuyanan sat ngay Faduksay

15Ay at mama nu nbul wan, Use at ngay faduksay nalong te, “Setain ban Use nu kadotama yay gugat antam ay nu namasud way ban sa antam aroro sa tam ngay nafakamulun sa anya at mauri?” 16Nu katanya, kanya fagayu nafadasug sik longan sas Use te, “Tam mama nafangatulun gina gakabulun. 17Kanya nalong sa emu te, falyami wan em nafakamulun sa emu at mauri. Nu katanya, katsi, falyami em asalanan aroro ami tam mama yangay mi at Dius at ngay fagsuguan.” At Use nu nadungug at ngay faduksay at longan, kanya nawayway.

18Ay arodi vtv, at ngay faduksay nasas Use. Nu ndasug wan, narungan sit daga salubangan laman gfalag te, gfababaun, ay nalong te, “Mafalganan ami gafagsuguanan emu.” 19Dewa katanya, Use nabalus te, “Lag am kalimu. Kwa mafakamulun takatanya. O nunda au wan Dius laman namaurianan au ayu? 20Anud, ebi nafakamulun am sa angku at mauri, dewa katanya, Dius at algan sa tuas fagmasineun, siginan nu gfalangfe ngayuk taw. 21Nu katanya, lag am kalimu. Gfon kban gugat sa ayu ay anggan sa ay ngay sisian ngay fakonun.” Ay Use nafatuyanan sat ngay faduksay ay masine tua nu gfakamatoan anya fagayu.

Use nu Kabul

22Ay Use nabanwan sas talun Igiptu gadgaloan at mama at ngay kalongan. Use nu gleleg sadik sandan sadik safuluk banwa, 23ay kanya nalag yay at ngay fufu tud, Efraim at ngay fufu, ay Makir at ngay sisian. Makir, Manase at baguama. Use natuyan te, at ngay sisian yangay Makir at ngay sisian.

24Ay Use nalong sat ngay kalongan te, “Gakabulun kwan, dewa katanya, tam Dius ban wa gfabayan ayu. Dius nantaban ban ayu ste ginan ay namabanwan ban ayu sa sik talun at nafatuyanan sas Abrayam, sas Isak ay sas Akub.” 25Sanya ginan, Use nalong sa sangay taw Israel te, “Fatuyanani sa angku te, Dius ban nu gfaduksun wan ayu ste ginan fag daga, bubai ku ngay bini.”

26Use anbul sis talun Igiptu gina at banwa sadik sandan sadik safulu. Ay e nafatayuk sat bilug sik fanyud kadan ay at ngay kalongan nanamoli anya sa sik fagsuadan at kinbul fag taw.

Currently Selected:

Fakasigadan 50: OCCT

Highlight

Copy

Compare