Fakasigadan 48

Manase ay Efraim

1Ay wa glugo ya, e nabarita sas Use te, at mama e fakasaitun. Nu katanya, Use talamean nanansibo wa Israel. 2Ay Israel nu nasaful te, Use andasug, kanya gugatan nangalunggung sit fagtiugan. 3Ay Israel glong sas Use te, “Ebi gina au sis Lus, sis talun Kanaan, at mabalyanan fag Dius nafadante angku. 4Ay kanya nalong sa angku te, ‘Gfon kban sa emu ngayuk kasugfunanan ay o ban kafag ngay taw at mama, ay gfagbilug kban talun Kanaan sam ngay kasugfunanan kabavn.’ ”

5Ay Israel gfataglayun nu garingang te, “Am sisian fagdua Efraim ay Manase, ansalug stes talun Igiptu gina au bagu kadasug stae, ay kafag duksay katap te, ku ngay baguama yangay, takatas Rubin ay Simyun. 6Dewa katanya, at fadogan ban am ngay sisian kafamato way si emu. Ay kanya ban fagayu nu gbul at ngay fagagbilugun siginan was Efraim ay Manase at fagagbilugan.

7“Namatang au am mina nu kabul. Ginanya siginan amis Padan-Aram ay nangadasug ami sas talun Kanaan. Ay gina am mina kabul munakbang wami sis Efrata, nu katanya, nanamoli au anya sas tigyangan dalan tagsas Efrata.” (Efrata at ngayan yangay te, Betleem.)

8Ay Israel nu nalag Use at ngay munama, nainto te, “Sinu kanya fag dua?”

9Ay Use gbalus te, “Kanya fag dua ku sisian Dius at nafon angku ste sis talun Igiptu.”

Ay Israel nalong te, “Tabani stae, gfadante au.”

10Ay Israel wa bangan glag ya aroro mafufuama wan, nu katanya, Use nataban at ngay sisian namakbang sas Israel. Ay Israel naugwan duksay ay nayuk. 11Ay Israel glong sas Use te, “Kwe fagsegun ya te, gladlagan yay ban ta, dewa katanya katsi, Dius naylat te, bundi o lang ku fagyalagun, anggan tua am ngay sisian.”

12Ay Use nabul wa vtv at ngay sisian siginans Israel at tungud balangbang, ay narungan gfauseganan at mama. 13Ay Use gdog yay nafakbang at ngay sisian sat mama laman namadante. Efraim sis Use at siun baliwa, sis Israel at wala baliwa, ay Manase sis Use at wala baliwa, sis Israel at siun. 14Ay Israel nafasalibagan at take ay nafasas Efraim at tungud alfuyu at siun baliwa fag daluap ay at wala baliwa fag daluap nafasas Manase at tungud alfuyu. 15Nu katanya, kanya nafadante Use at sisian fagdua ay nalong te,

“Ku ngay mangaguyang Abrayam ay Isak at fagfaningan fag Dius,

kanya nangus ggubuk ban ayu fag duak sisian,

ay kanya yangay fag Dius tagulit angku

siginan nu kasalug au ay dasug katsi.

16Ay tagbarita at nafalangfe angku sas fagayu fagidapun,

ggubuk yangay ban nangus tuy fag duak sisian.

Nangus e gamatang tua ban gugat ku ngayan

ay anggan ku ngay mangaguyang Abrayam ay Isak at ngay ngayan siginan kafag duksay.

Nangus kanya ban fagdua umkayu yay ste swa daga.”

17Ay Use nu nalag at mama nu gfasas Efraim at tungud alfuyu at siun fag daluap, kanya wa guseganan. Nu katanya, kanya nated at mama at siun fag daluap ay nafalin sas Manase, 18ay glong te, “Mama bunwa kanya; tuy tua at kaka. Am siun fag daluap fasai at tungud alfuyu.”

19Ay at mama nabalus anya te, “Kin, munama, saful kway. Manase at ngay kasugfunanan sik takadungug yangay ban, dewa katanya, at arian ban at kasugfunanan gtungud tua nu sik kadungug, ay at ngay kasugfunanan ban ayu yap tua.”

20Ay Israel nafili Efraim gtungud yay Manase. Ay ginanya fag menit kanya nafadante duksay te,

“Ngay taw Israel ban glong ay ngayan galay e fagnamadanteun.

Ay galay ban gfadante, glong te, ‘Nangus Dius ggubuk emu kata nu ggubuk Efraim ay Manase.’ ”

21Ay Israel nalong sas Use te, “Gakabulun kwan, dewa katanya, lag am kalimu aroro Dius gufud ban ayu ay gfafoli ban ayu sa ay ngay mangaguyang at daga. 22Ay gfon au sa emu furuan Sekem aroro gtungud tuo am ngay faduksay. Kanya fag talun ku naagbilug siginan sangay taw Amur, gina au nanamawayan ay nababo anya fagayu siginan nu gagbilug au ku fiso ay ku godun.”

Currently Selected:

Fakasigadan 48: OCCT

Highlight

Copy

Compare