Nu Galin 32
32
Sik Baka Mawatan siginans Gintu
Deu 9:7-29
1Muisis nangaduge nu sis tungud buksul ay ngay taw nanbang gfanya anya nu gtagbung, ay anful sas Arun at daga salubangan ay nalong te, “Agvd, awati sik fagsegan laman kanya tagfangguna antam, aroro watam saful ya te, nataw at kindasug sas Muisis, at nataban antam siginans talun Igiptu.”
2Ay Arun nabalus te, “Kin, buli siginan ay ngay mangena ay anggan ay ngay sisian at fagsulunun fag ngay sulman mawatan siginans gintu, ay bubai stie.” 3Ay nu nabul wan at ngay sulman, nafon wa fagayu sas Arun. 4Ay Arun nafaful kanya fagayu ay nalanang, ay nawat sik fagsegan baka riangan. Ay fagayu taw Israel nalong te, “Tuy tam dius at nataban antam siginans talun Igiptu.”
5Arun nu nalag te, fagayu taw Israel guseganan wan, nafawat sik fagirugan sis salubangan baka ay nalong sa anya fagayu te, “Balabag ban nangaful tam laman nanseg tam Yawi.” 6Ay nu katanya wan, fagayu taw Israel masurip nu kafulo laman namon at fagirugun fag ngay fanggalangun ay anggan at ngay fanggalangun laman sas fagmanabayanun. Fagayu gfangon ay ginum ay gfauseganan at fagsegan.
7Ay Yawi nalong sas Muisis te, “Abanganani tagbungi, aroro am ngay kaiban am nataban siginans talun Igiptu gfakamulun sa angku at mauri. 8Kanya fagayu masakit kalyam ku ngay suguan, ay nawat sik fagsegan baka riangan, ay gseg anya ay gfon at ngay fanggalangun, ay glong te, ‘Tuy tam dius at nataban antam siginans talun Igiptu.’ ”
9Ay Yawi nalong yay fia sas Muisis te, “Nalag au kafag ngay taw at fakamulun. At kafamaboan! 10Nu katanya, fabayani wa angku namamin anya fagayu aroro maksvn nu kauri au. Ay namasik mabalyanan au emu anggan am kasugfunanan.”
11Ay dewa katanya, Muisis maksvn nu gfababaun ay namalub sat Dius Yawi ay glong te, “Yawi, wain am fagnamauriananun kanya fag ngay taw, am nataban siginans talun Igiptu siginan am fagmabalyananun? 12Ngay taw Igiptu ro glong te, ‘Dius nataban kanya fag ngay taw laman namabul anya sas buksul laman umkalyam sas fagdaul daga.’ Lag yap gfataglayun nu kadotama o am ngay taw. 13Amatangi yap am fatuyanan sam ngay fagsuguan Abrayam, Isak, ay Akub te, namayu ban o at ngay kasugfunanan, kayu ngay galeme sis banwa, ay nafatuyanan yangay o te, gfon ban o sik fagbanwanan laman at fagnangagbilugun kabavn ban.” 14Nu katanya, Yawi di nafataglayun at algan nu namabul at ngay taw.
15Ay Muisis natagbung siginans tungud buksul gbuba Dius at suguan at marirukan gsumbalian sis duak dalifi. 16Dius wan at nawat kafag duak dalifi ay at nariruk sanya.
17Ay Uswe nu nadungug ngay taw nu gbarisanan ngayu, nalong sas Muisis te, “E awayan way siring si tam fagmafulan.” 18Ay Muisis nabalus te, “Duan, nu gdungug au wa kata awayan, ang way galubadan.”
19Ay Muisis nu munakbang wan sit fagmafulan, nalag kafag fagsegan baka riangan anggan ngay taw nu gfalelegan at ngay bilug. Maksvn Muisis nu kadotama, ay naukas at ba dalifi fagdua sas day buksul ay anrufa. 20Ay sanya ginan, Muisis nabul kafag ngay taw at nawat fag fagsegan baka riangan, ay nairug, ay narufa kata lukbu ay nafagfag sas mamam, ay nafainum sa sangay taw Israel.
21Ay Muisis nalong sas Arun te, “Nataw tuy fag ngay taw at nafakamulun sa emu am fagnafabayanun anya fagayu nu gasalanan?”
22Arun nabalus te, “Lag o nangus kadotama. O nunda wo nasaful te, kafag ngay taw masakit nu gfakamulun at mauri? 23Aroro kafag ngay taw nalong angku te, ‘Agvd, awati sik fagsegan tagfangguna emi, aroro wa tam saful te, nataw wan at kindasug sas Muisis at nataban antam siginans talun Igiptu.’ 24Nu katanya, nalong au sanya fag ngay taw te, ‘Kin, foni angku ay ngay gintu.’ Ay nu nafon wa angku, naukas au sasad afuy ay ankawat sik fagsegan baka.”
25Nu katanya, Muisis nasaful te, Arun mangaro nafabayan way lang kafag ngay taw nu gfakamulun at mauri. Siginan takatanya, nafafasean way anya fagayu sat ngay fawayan. 26Nu katanya, Muisis namalindug sit fagmafulan at sakbawan ay guro te, “Nusnga sinu tagfaning fia Yawi, akbangi sa angku!” Ay Lebi at ngay sugfun ankakbang sa anya.
27Muisis nalong sa anya fagayu te, “Katatuy Yawi, Israel at Dius, at longan: galay am at sadi bubai ay mesa fiso ay ligungani at fagmafulan, ay fabuli wan fagayu taw at mauri dewa ay ngay faduksay, ay ay ngay fagadgalangan, ay ay ngay fasabale.” 28Ay Lebi at gaban nafaning Muisis at suguan. Ay ginanya fag menit tuluk libuk taw at kinbul. 29Muisis nalong sas Lebi at gaban te, “Yawi nafasaman wan ayu katsi fag menit, aroro nafabul tuam dewa ay ngay sisian anggan ay ngay faduksay. Nu katanya, katsi fag menit, kanya nafili tua ayu.”
30Ay balabag di, Muisis nalong sa sangay taw te, “Maksvn ay nafakamulun at mauri ay dewa katanya katsi, gdog kyay nangundaud sas buksul nu inda Yawi, ay tibaginan ro manga, mafafasadi au ayu sa anya laman gfalyam ay ngay asalanan.”
31Ay Muisis anfoli sas Yawi ay nalong te, “Maksvn tuy fag ngay taw at nafakamulun at mauri. Ngay taw nawat sik fagsegan baka siginans gintu. 32Ay dewa katanya katsi, falyami yap at ngay nafakamulun mauri. Ay nu dway o gfalyam, rarusi wan ku ngayan siginan am fagrirukan fag fafil.”
33Ay Yawi nalong sas Muisis te, “Nusnga sinu way lang at nafakamulun sa angku mauri, kanya way ku fagrarusun siginan ku fafil. 34Ay loi wan, ay namangguna o kafag ngay taw sa ku nalong emu fag talun, ay ku tagbarita gumuna ayu. Dewa katanya, gina ban andasug sik buknga, gfaurianan au nusnga sinu at nafakamulun mauri.”
35Ay Yawi nafadasug sik fakasaitun sa sangay taw Israel aroro naseg Arun at nawat fag fagsegan baka.
Currently Selected:
Nu Galin 32: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
