Nu Galin 33
33
1Ay Yawi nalong sas Muisis te, “Loi wan ste ginan fag talun anggan am nataban fag ngay taw siginans talun Igiptu, ay loi sa ku nafatuyanan fag talun sam mangaguyang Abrayam, Isak, ay Akub. Ebi nalong au anya fagayu te, Gfon kban kanya fag talun sam ngay kasugfunanan. 2Ay nansugu au ku tagbarita at namangguna ayu, ay nangaiyan au ngay taw Kanaan, ngay taw Amur, ngay taw Ket, ay ngay taw Peres, ay ngay taw Kib, ay anggan ngay taw Ebus. 3Loi wan sat masine ay sat maramraman fag talun#33:3 sat masine… fag talun: sas Ebreu, sik talun at ke familugan susu bilug ay deut. dewa katanya, kwa nangalo ayu aroro kamaogatun wayam ay ngay amatanganan, ay tibaginan mafabul kro ayu sa sangaba dalan.”
4Fagayu taw nu nadungug kanya fag ngay longan mauri, maksvn nu kabalu ay wa gsulun ya at ngay famasine. 5Aroro Yawi nasugu Muisis te, “Longi sa sangay taw Israel te, ‘Kamaogatun am ay ngay amatanganan. Ay nu galo kway ro ayu dewa sik munagud fag buknga, tibaginan ro gfabul kway ayu. Katsi yay, buli wan si ay bilug ay ngay famasine kaduge au gamatangan te, setain ro ku fakamulun sa ayu.’ ” 6Ay gina ngay taw Israel sis Buksul Kureb, nabul at ngay famasine.
Bale Fagnangablanganan
7Muisis at fangugali wan nu kawat sik bale ramit ngayayu sirut siginans fagmafulan. Ay kanya fag bale nafangayan te, Bale Fagnangablanganan. Nusnga sinu fag taw takaylat gyasafulun Yawi at fakaylatun, namasanya sat bale. 8Muisis galay gsakbo sanya fag bale, ngay taw malindug sit mesa sakbawan, ay gdama gugat nu dyakmay Muisis nasakbo sanya fag bale. 9Ay kaduge Muisis sisad bale, sik turuk linyabu andasug sanya fag bale at sakbawan laman Yawi gfakamatoan anya. 10Ay nu katanya, ngay taw nu nalag turuk linyabu sit sakbawan, kanya fagayu anlindug ay naseg Yawi sit mesa sakbawan. 11Yawi galay gfakamatoan Muisis, kafag dua gsalubangan kata sik taggadgalangan nu gkamatoan. Ay sanya ginan, Muisis anfoli sas fagmafulan, ay dewa katanya, at mabaguama fag fagsuguan Uswe, Nun at baguama, gbanwan gugat sis bale ramit.
Muisis nalag Yawi at Kamasinean
12Muisis nalong sas Yawi te, “Glong o gugat sa angku te, namangguna au am ngay taw sa am nafatuyanan fag talun, dewa katanya, yo e nalong sa angku te, kanya am fagnansuguun fag taw tagalo angku. Nalong yangay o te, toglag tuo angku ay guseganan. 13Nu mafanud tua te, guseganan o angku, foyungi sa angku ku fakamulun laman gtoglag au emu ay laman gtaglayun nu guseganan o angku. Amatangani te, tuy fag furuan am ngay taw.”
14Ay Yawi nabalus te, “Au wan at nangalo emu, ay gfon au emu famiangalay.”
15Ay Muisis nalong anya te, “Way o nangufud ya emi, lag o gfalelegan emi ste ginan. 16Tain way ban tibak taw nu gsaful te, guseganan o angku ay anggan am ngay taw? Ay tain ro em fagsamanun fagayu taw sis fagdaul daga, nu dway o nangalo ya emi?”
17Yawi nabalus Muisis te, “Gfakamulun au am fagetun sa angku. Aroro guseganan au emu ay toglag kwa emu.”
18Muisis nabalus te, “Katsi falagi sa angku am kamasinean.”
19Yawi nabalus te, “Namalag kro emu fagayu ku fagmasineun, ay nanlong au emu ku ngayan, Yawi. Nangafanyu au ku fakaylatun kafanyu ay kesug au ku fakaylatun kesug. 20Dewa katanya, kwa gfalag sa emu ku kamatan aroro nusnga sinu at nalag ku kamatan, wa gleleg ya.”
21Yawi nalong yangay te, “Nanmalindug o sa sik tungud gang munakbang si angku. 22Ay gina ku fagmasineun gdalan, gfasakbo au emu sa sik luib ay gtabun au emu ku daluap yakmay au nalangfe. 23Ay sanya ginan, gbul au siginan emu ku daluap ay lumag ro wo ku guyuy, dewa katanya, wa ro wo glag ku kamatan.”
Currently Selected:
Nu Galin 33: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
