Nu Galin 31

Ngay Tagfakamulun sis Fagnansegan fag Bale Ramit

Gln 35:30–36:1

1Yawi nalong sas Muisis te, 2“Nafili au Besalel, Uri at baguama, ay Kur at fufu, tagsiginan Uda at kasugfunanan. 3Nafon au sa anya ku falad#31:3 falad: ay mannga, fagmabalyananun. ay fagmabalyananun laman ban e fagsafulun ay e fagmakatuun nusnga setaw fag fakamulun, 4laman kawat at masine fag ngay fagagbilugun siginans gintu, sanbung salapi, ay tansu, 5ay laman garuy at mafanud fag ngay gang, ay laman gfasineun kayu ay fagayu nusnga setaw fag fangawatun. 6Nafili kyangay Ulyab, Akisamak at baguama, tagsiginan Dan at kasugfunanan, laman ggubuk Besalel. Nafon kyangay fagmakatuun sas fagayu tagfakamulun laman kanya fagayu mafafakamulun fagayu ku suguan emu, 7laman kawat ku bale,#31:7 ku bale: sas Ebreu, Bale Fagnangablanganan. ay Fagsuadan Nasadian, ay at suklub, ay fagayu fagagbilugun sis bale ramit. 8Kanya nawat sik fagfatungkudan ay fagayu at ngay fagagbilugun sanya, anggan salung at fagfatungkudan mawatan siginans gintu ay anggan fagayu at fagagbilugun, ay anggan sik fagirugan famaebebanglu, 9ay nangawat yangay fagirugan fanggalangun ay anggan fagayu at fagagbilugun sanya, ay sik fagsuadan ay at fagfatungkudan, 10ay nangawat yangay Arun talamean at ngay lanbung at mafasamanan sa angku at fagsulunun galay kanya namakamulun laman sik ngay tagfon fanggalangun, 11ay fanrarus fag langis, ay at mabebanglu fag fagirugun sat Mafasamanan fag Suluk. Kanya fagayu namakamulun takatanya fagayu kata ku suguan emu.”

Famiangalay fag Menit

12Yawi nasugu Muisis 13laman namoyung sa sangay taw Israel te, “Masine nu gfaning am ku suguan sabaliwas Famiangalay fag Menit, aroro tuy sik fakatoglagan te, masadi tuam gugat sa angku anggan ban sat fadogan ay kasugfunanan. Ay nu gfaning tua ban am, sumaful am te, au Yawi at nafasaman ayu laman ku ngay taw. 14Faningi fia ku suguan sabaliwas Famiangalay fag Menit, aroro kanya fag menit mafasamanan laman sa ayu. Ay fagayu at yud nafaning ku suguan sis Famiangalay fag Menit, fabuli wan. Ay anggan at nafakamulun ginanya tuyani wa te, bunwa em kaibaman ya. 15Unumk menit nu gfakamulun am laman sa ay sadili, ay sis fafituk menit, kanya ay famiangalay, aroro tuy fag menit mafasamanan laman sa angku, ay fagayu at nafakamulun sis famiangalay fag menit, fabuli wan. 16-17Nu katanya, ngay taw Israel, faningi ku suguan ayu sis Famiangalay fag Menit, faningi takatanya anggan ban sat fadogan ay kasugfunanan. Kanya sik fagtoglagan at yud e fakatabuan tam nasadian. Aroro unumk menit nu kawat au banwa ay daga, ay sis fafituk menit nafiangalay kwan.”

18Yawi nu ntabu wan nu gfakamatoan Muisis sis tungud Buksul Sinay nafon sas Muisis duak dalifi ay nariruk sanya at ngay suguan. Dius wan at nariruk kanya fagayu.

Currently Selected:

Nu Galin 31: OCCT

Highlight

Copy

Compare