Roma 14

Iya Psgeegan Mtswai

1Psteme ka muuwic snhiyan na. Ini pntena ka lnglungan namu we iya pkeekan kari. 2Duma seediq we ani ta mekan ani maanu mesa snhii. Muuwic snhiyan na ka seediq we wano sama ka uqun na. 3Mekan ka seediq we iya sbiciq qmita seediq ini ekan. Kiya de ini ekan we iya psgao seediq mnekan. Ado wada psteme yamu ka Utux Baro da. 4Ima su ka isu ma su so nii psgao tnqliyan taxa seediq ho? Ani mheyu ma mtakur ka heya we ida ga hiya ka tnpusu sapah na nanak. Ida mpheyu bale ka heya. Ado mtduwa pheyu heya ka Bukung. 5Duma seediq ge, mita ali nii we mgkala ali kiya. Duma seediq we nita daha ali we mntena kana. Txtaxa heyi we asi ka psdehu lnglungan daha nanak. 6Ptgaanak ali ka seediq we Bukung ka sptgaanak na. Mekan ka seediq we Bukung ka seekan na. Ado mqaras Utux Baro ka heya. Ini ekan ka seediq we ado Bukung ini ekan, kiya we mqaras Utux Baro ka heya uri.

7Kana ita we uka ka heya nanak skuudus na, uka ka heya nanak shuqil na uri. 8Nasi ta muudus we Bukung ka skuudus ta. Nasi ta mhuqil we Bukung ka shuqil ta. So kiya de ani ta muudus ma ani ta mhuqil we nseediq ta Bukung ka ita. 9Ado nii wada mhuqil ma wada muudus dungal ka Kiristo. So maha ma Bukung seediq mhuqil ma seediq muudus. 10Kiya de isu we ma su psgeegan ka mtswai su ho? Ma su smbiciq qmita mtswai su uri ho? Ado kana ta we mpheyu ta berah tlengun psgeegan Utux Baro ka ita. 11Ga spatis Patis:

“Rmengo ka Bukung: ‘Psdehu ku uka psteqan mu.

Mptbqelic thmuku yaku ka hbaro bale bqelic seediq.

Mpqaras Utux Baro ka hbaro bale quwaq.’”

12Maanu so kiya de txtaxa ta we mpsneru ta ndaan ta nanak berah Utux Baro.

Iya Pskripuc Mtswai

13Maanu so kiya de iya ppsgao ka yamu. Iya ta posa skrbutan ma ktkuran mtswai ta. 14Spooda ta Yesu Bukung ta klaun ta bale ani maanu uqun ge, uka ka kesun mrutiq na. Wano seediq ka lmngelung mrutiq kesun daha de mrutiq ka kiya di. 15Nasi mnoda uqun ka sqnaqah su kuxul mtswai we ini su spooda gnaalu moda. Kiristo we wada na shuqil ka heya, iya daani uqun su pqnaqah heya. 16Kiya de iya pchngaani seediq ka malu noda namu. 17Ado uxe quri mimah ma mekan ka qnlhangan Utux Baro, wano quri msderux ooda, msbale ma qaras ckceka Bgihur Utux. 18Mooda so nii qmeepah quri Kiristo we qrasun Utux Baro ma tndhuun seediq uri. 19Maanu so kiya de bhragi ta ka mtbale ma mppheyu kntmaan. 20Iya daani uqun smeeliq qneepah Utux Baro. Ani maanu ida bgurah kana. Maanu so kiya we nasi msnekan wada ptakur seediq we kiya ka qnnaqah heya ka nii da. 21Ani ta mekan heyi ma mimah ta sino we so uxe ta ptakur mtswai ta de ani maanu iya qpahi kiya, so kiya ka malu noda. 22Niqan su snhiyan we doi nanak meeniq su berah Utux Baro. Ini psmereq heya nanak quri tduwa na daan ka seediq we kika mbleyaq! 23Nasi ttiiyax mekan ka seediq we ngalun qnquwan noda. Ado uxe pnooda snhiyan na mekan. Uxe pneyah snhiyan we qnquwan noda kana.

Currently Selected:

Roma 14: Stgdaya

Highlight

Copy