Roma 15

Pqrasi ka Seediq Ssiyo Su

1Ita ka mbeyax we dyage ta mheal ka knuuwic seediq muuwic. Iya ta pesa tqqaras ta nanak. 2Txtaxa ta we psqraso ta ka seediq ssiyo ta. So maha maangal rrihan ma pgdehu dheya uri. 3Ado Kiristo uri we ini sqaras heya nanak. Mntena so ga spatis Patis: “Smngayan dseediq we meyah heyi mu kana ka snngayan daha.” 4Ado kana wada spatis Patis Mrtaso we ttgesa na ita ka wada spatis. Kiya we ooda ta knremun ma smbyaxan pneyah Patis Mrtaso ddehuk ta maangal sntangan. 5So mege knremun ma psbeyax lhebun ka Utux Baro we so namu maha msuupu lhebun ppuyu namu Kiristo Yesu. 6So namu maha msuupu lhebun ma hrenang ttndahu Utux Baro, Tama Bukung ta Yesu Kiristo.

Ini Psaanak ka Malu Kari Utux Baro

7Maanu so kiya de yamu we ppsteme. So mntena Kiristo psteme yamu ma pkledax Utux Baro. 8Mprengo ku, Kiristo we ado knbale Utux Baro wada ngalan tnqliyan quri seediq mooda ptgaya psalak. Kiya de ppgdehu na kari sntangan rdrudan cbeyo. 9Dungal we dseediq icil qnlhangan we ado huwe na ma pkledax Utux Baro. Mntena so ga spatis Patis:

“Maanu so kiya de meeniq ku ckceka seediq icil qnlhangan tmdahu ku isu,

mpuuyas ku ngayan su.”

10Kiya de rmengo dungal:

“Seediq qnlhangan icil! Msuupu mqaras laqi Bukung ka yamu.”

11Dungal we:

“Kana seediq icil qnlhangan! Tndhui ka Bukung!

Kana namu! Kana namu seediq! Tndhui ka heya!”

12Dungal we rmengo ka Isaya:

“Meeyah ka pneyah gamil Yisay.

Kiya ka meeyah qmlahang seediq kana qnlhangan ka heya.

Heya ka stangun seediq icil qnlhangan.”

13Tai so Utux Baro psatang we ado snhiyan namu pthngayun klegan qaras, mtbale lhebun ka lhebun namu. Kiya we spooda namu beyax Bgihur Utux maha niqan paru ba stangan.

Ini Deqo Rmengo ka Poro

14Mtswai mu, snhiyun mu bale yamu we ga namu stenge knmalu, lmlamu knkela ma mtduwa namu mddudul tmgesa. 15Kiya de mremun ku tikuh matis yamu so maha pgkela yamu. Ado mnoda ku huwe bnege Utux Baro kenan ma 16wada ku na ngalan tnqliyan Kiristo Yesu quri seediq icil qnlhangan. Kiya de qmeepah ku msapuh malu kari Utux Baro. Ado Bgihur Utux maha mrtaso ma qqrasun maangal ka seediq icil qnlhangan snapuh nii. 17Maanu so kiya de quri qqeepah berah Utux Baro we mnoda ku Kiristo Yesu niqan ka stndahu mu. 18-19Ado Kiristo mnoda qneepah mu de miicu ku rmengo ani maanu. Wano heya we spooda na kari mu ma qneepah mu qmeepah ka Kiristo. Kiya we mnoda beyax pnskraya ma sklwiun ba, beyax Bgihur Utux Baro ptheyi ka seediq icil qnlhangan. Maanu so kiya de peeyah ku Yerusalem mnoda ku mtqqiri ma betaq Ilurikon spttuku mu ba gmarang ka malu kari quri Kiristo. 20So kiya de dngusan mu we ttgesa mu malu kari quri uxe gnrangan ngayan Kiristo. Kiya we uxe mu ssmalu bobo pusu psuwan taxa. 21Mntena so ga spatis Patis:

“Uxe rnngagan quri Kiristo we mqita ka dheya,

uxe mnbahang we mpkela ka dheya.”

Kmosa Qmita Roma ka Poro

22Maanu so kiya we mneegu ku ba hteran uxe mu oosa yamu hiya. 23Kiya de saya de, uka ka msngari dxeral ini mu dai gmarang hini duma kiya de mkmosa ku yamu peeyah cuxal na. 24Maanu so kiya de smatang ku qqita yamu mooda ku hiya mosa Spania ciida. Smatang ku pphaduc yamu bobo ku mntheyaq yamu ma mqaras lhebun mu tnheyaq yamu. 25Kiya de saya we maha ku Yerusalem mege ngngalun mrtaso tnugsaan. 26Ado seediq Makedon ma seediq Aqaia ge, mqaras ba psseli dnayo daha sbege daha seediq qrinuc ckceka mrtaso tnugsaan ga Yerusalem hiya. 27Mqaras bale mooda ka dheya, bale ba ida niqan kusa qqeepah mu dheya ka yaku uri. Ado seediq icil qnlhangan ge, wada maangal knmalu nBgihur Utux peeyah dheya de qmeepah quri ngngalun heyi daha ma mege dheya. 28Tara ku, mhedu ku meepah nii ma wada mu sbege dheya ka dnayo daha de ida ku mooda yamu hiya ma mosa ku Spania. 29Kiya de mosa ku yamu ciida, desun mu ka mccuwaq huwe Kiristo we klaun mu bale.

30Mtswai, mooda ku Yesu Kiristo Bukung ta ma mooda ku gnaalu Bgihur Utux mdudul ku yamu, psuupu kenan knbeyax dmurun Utux Baro quri kenan. 31Kiya de so ku maha mlatac peeyah seediq ini snhii ga Yudaya. So maha qqrasun maangal mrtaso tnugsaan ga Yerusalem ka qpahun mu. 32Kiya dungal we so ku muyu lnglungan Utux Baro mqqaras ku meyah yamu hiya ma theyaq yamu maangal mpsange lhebun. 33Tai so mpsuupu meeniq kana yamu klaali ka Utux Baro mbege msbale lhebun! Ameng.

Currently Selected:

Roma 15: Stgdaya

Highlight

Copy