Roma 13

Thei Dmpqlahang Bobo Dxeral

1Kana seediq, thei ka ga dmdoi pusu beyax. Ado pusu beyax we uka ka ini oda Utux Baro. Dmdoi pusu beyax we pnheyu Utux Baro kana. 2Maanu so kiya de tbrinah mdoi pusu beyax we ririh tbrinah pnheyu Utux Baro. Kiya de tbrinah ka seediq we ririh ppkdira heya nanak. 3Dmpqlahang we uxe pkiicu ka qmeepah malu. Pkiicu seediq ga meepah naqah daha. Yaa su uxe kcugun ka mdoi pusu beyax na ho? So kiya de qpahi malu ma tndhuun su na. 4Ado heya we tnqliyan Utux Baro mege rrihan sunan kiya. Nasi su qmeepah naqah we kiicu. Ado uxe mnhemuc dmoi hlmadac. Heya we tnqliyan Utux Baro ppyahun na qmeepah quri naqah ka seang Utux Baro. 5Maanu so kiya de asi namu ka theyi, uxe qqduriq namu seang Utux Baro. Kiya uri we quri lhebun namu uri. 6Mege namu puqun we ida mntena so nii ka pusu na uri. Ado dheya we tnqliyan Utux Baro qqeepah daha qpahun so nii. 7Bbiqun namu we biqi. Bbege namu puqun we biqi. Bbege namu pila we biqi baro. Kcugun ta we kcugi. Spruun ta we sprui.

Mttuuku Gaya ka Gnaalu

8Wano pggaalu ka yamu. Iya pkusa ani maanu seediq! Ado pttuuku gaya ka seediq gmaalu. 9Kiya de iya mmhemuc msuupu, iya pphuqil seediq, iya geeguy, iya sqquru maangal. Uxe uri sa gaya uri gaga psaun 1 kari, “Pntnai gmaalu su isu nanak glaani ka seediq ssiyo su uri.” 10Gnaalu we ini pqraqil seediq ssiyo. Ado mttuuku gaya ka gnaalu.

Daling ka Lmedax

11Niqan dungal, asi ka klaun namu. Saya we baka ba ttuyan namu peeyah tnqiyan namu. Ado pntnaun so prdingan snhii ciida we smdaling ba saya ka pkdusan ta da. 12Mpqhedu ka keeman ma smdaling ka lmedax. Maanu so kiya de qdaane ta ka qneepah mpgedang ma dooyo ta ka qyqeya mccebu. 13Pntena ta ga mkkesa lmedax msderux ta mooda meepah. Laxi ka tmqaras meekan uqan ma bsukan. Dungal we mgeeguy msuupu mqedil, iya tgdiyal kari ma mssnhuur. 14Dooyo ta ka qyqeya mccebu nuYesu Kiristo Bukung ma iya wano lmngelung pqaras heyi ta ma kkraguh heyi.

Currently Selected:

Roma 13: Stgdaya

Highlight

Copy