Matay 24
24
Kari Pgeela Rmengo Hrahun Ka Sapah Thmkuwan
(Mrk 13:1-2. Ruk 21:5-6)
1Mlatac peeyah Sapah Thmkuwan mkkesa ciida ka Yesu, meyah berah na ka tnugsaan na ma tmiyu Sapah Thmkuwan pqita heya. 2Rmengo dheya ka Yesu: “Uxe namu gaga kana ka nii peni? Bale ba rngage maku, maha uka ani kingal ka btunux ini sliqi mhurah meniq bobo btunux mtnetun hini.”
Pnskraya Qnhdean Qnlangan
(Mrk 13:3-13. Ruk 21:7-19)
3Tleung dgiyaq Curung ciida ka Yesu, meyah hiya ka tnugsaan na, rmengo: “Braho su rngagi nami, so sknuwan ka meeniq oda so nii ho? Qhdean mknexan nii daha ka eeyah su ciida, maanu ka pnskraya na ho?” 4Cmiyuk rmengo dheya ka Yesu: “Qlahang ka yamu, so uxe ppsridil yamu ka seediq. 5Ado maha hbaro ka seediq mberiq pooda ngayan mu. Mprengo: ‘Yaku ka Kiristo.’ Kiya de mpsridil hbaro ba seediq. 6Bhangun namu ka mccebu ma hrenang gaga mccebu. Qlahang ba, iya skluyi. Ado ida maha mpniqan ka so nii. Ani so kiya uxe qnhdean nana. 7Klegan seediq mtgdiyal klegan seediq, qnlhangan mtgdiyal qlhangan. Ani inu maha niqan krayan ma runu. 8Kana so nii we kiya ka prdingan ba mqraqil. 9Ciida, trqilun namu daha ma phqilun namu daha. Dungal we ririh yaku ka pqnqihun namu daha kana qlhangan. 10Ciida, maha hbaro ba ka seediq mpktakur. Mpseeliq namu ma pkmpais. 11Dungal we meeyah ka hbaro mnnangi mpgeela kari ma mpsridil hbaro ba seediq. 12Maanu so kiya de mrana ka noda sseeliq daha gaya de mptletu ka gnaalu hbaro seediq da. 13Kiya de so ka seediq knremun betaq qnhdean we pkdusun. 14Malu kari quri Qnlhangan Baro nii we sai gmarang kana mtqiri qnlangan. Pgkela na kana seediq qnlhangan. Bobo na hiya de meeyah ka qnhdean.”
Paru Mqraqil
(Mrk 13:14-23. Ruk 21:20-24)
15“Qmnita namu rnengo Daniyel mpgeela kari, mpheyu ckceka mrtaso nniqan hiya ka maadis pqnqihun mphurah (asi ka mkela lmngelung ka seediq msepu na), 16ciida, seediq gaga meniq Yudaya ge asi ka qduriq dgiyaq. 17So ka seediq ga dnamux na ge asi ka ini tuting mangal qyqeya sapah truma. 18So ka seediq ga qnpahan na ge asi ka ini brinah mosa mangal lukus pbragun. 19Ali ciida ge maha paru ba mqraqil ka mqedil ga skpahung ma ga nmunuh laqi! 20Druni ka yamu, so maha uxe meeyah ali misan ma ali sngayan ka ali qqduriq namu. 21Ado ciida we ida maha niqan paru mqraqil. Nii ge pneeyah pnrdingan bobo dxeral ma betaq saya uri we uka so nii ndaan mqraqil. Bobo na uri maha uka so nii. 22Nasi ini slbei ka ali nii, kana muudus niqan heyi ma dara we, uka ani 1 ka mtduwa dooyun baga. Ani so kiya quri seediq gneegan we slbeun ka ali kiya. 23Nasi rmengo yamu ka ani ima seediq ciida: ‘Tai, nii hini ka Kiristo!’, ‘Tai, gaga hiya ka Kiristo!’ Iya bale snhii. 24Ado mptutuy ka uxe bale ba Kiristo ma uxe bale ba mpgeela kari pqita paru ba pnskraya ma sklwiun ba qneepah. Kiya ge nasi mtduwa we maha psridil seediq gneegan Utux Baro. 25Tai! Pgeela ku rmengo yamu. 26Nasi rmengo yamu ka seediq: ‘Tai, ga tadus brenux ka Kiristo!’ Iya osa ka yamu. Uxe uri we rmengo: ‘Tai, ga truma sapah ka Kiristo!’ Iya ba snhii. 27Mntena so pncriyu nklaan hido ka tqwilaq, ida maha pkledax betaq pryaxan hido. Mpuso nii ka eeyah Laqi seediq uri. 28Ga inu ka nniqan heyi wada mhuqil, ida ga msseli hiya ka qdiro uri.”
Meyah Ka Laqi Seediq
(Mrk 13:24-27. Ruk 21:25-28)
29“Bobo wada ka mqraqil ali ciida,
maha mkuung ka hido,
uxe mpkledax ka idas uri,
mptuting peeyah karac baro ka pngerah,
mplgelu kana ka lmlamu gaga baro.
30Ciida, ptuura baro ka pnskraya Laqi seediq. Kiya de mprengac naqah kuxul ka kana klegan seediq bobo dxeral. Dheya we mpqita Laqi seediq maadis beyax ma paru knledax paapa plabu baro meyah. 31Mpskagul snkgulan na baro, mdoi iyuk paru hrenang, peeyah kana mtqiri qnlangan, peeyah puting dxeral hini ma betaq puting dxeral hiya pssliun daha ka seediq gneegan na.”
Pnungalan Kari Tnugesa Qhuni Nunuh
(Mrk 13:28-31. Ruk 21:29-33)
32“Slhai ka oda peeyah qhuni nunuh ka yamu: Smwiri ma hmeru waso ka cida qhuni ciida, klaun namu nii smdaling ka rbagan da. 33Mntena so nii. Taan namu kana so nii de, klaun namu smdaling ka ali ciida di gaga rhengun da. 34Bale ba rngage maku. Ini hrinas ciida ka mknexal nii na, mooda kana ka so nii. 35Mpkuuka ka karac ma dxeral. Kiya de kari mu we uxe mpkuuka ani betaq knuwan.”
Uka Mkela Seediq ka Ali Ciida
(Mrk 13:32-37. Ruk 17:26-30, 34-36)
36“Ali ciida ma ya knuwan we ani ima ini kela. Ani snkgulan ga baro uri ma Laqi seediq uri we ini kela. Wano Tama nanak ka mkela. 37Ado so kenu ka ali Noax ciida, maha so ali kiya ka ali eeyah Laqi seediq uri. 38Ali berah srnecux ciida, seediq bobo dxeral we ida mekan, mimah, maangal mqedil ma mosa rseno, betaq ali mremux asu ka Noax ciida. 39Ini kkela ciida, meyah ka rnecux ma wada desun rnecux kana ka dheya. Maha so nii ka ali eeyah Laqi seediq uri. 40Ciida, ga qnpahan ka 2 seediq we desun ka 1 ma lixun ka 1. 41Gmilang glangan ka 2 mqedil we desun ka 1 ma lixun ka 1. 42Maanu so kiya de kiiyo. Ado ini namu klai ka ali eeyah Bukung namu. 43Klai ba ka so nii. Tnsapah we nasi na klaun meeyah knuwan ka mpgeeguy ge maha tgkeela miiyo ma uxe na pkriun premux sapah na. 44Maanu so kiya de yamu uri we asi ka bleyaq psramal. Ado ini namu klai ka eeyah na ciida ge kika yahun Laqi seediq.”
Malu Ma Naqah Tnqliyan
(Ruk 12:41-48)
45“Maanu so kiya de, ima ka mtduwa ma tgkeela ba tnqliyan tnpusu sapah we pqlhangan na tnqliyan sapah na, spooda na sneengan uuqun maasu dheya ho? 46Meyah ka tnpusu sapah, taan na ida mchaya qmeepah ka tnqliyan we mbleyaq ka tnqliyan nii. 47Bale ba rngage maku, pqlhangun na kana dnoi na ka tnqliyan nii. 48Kiya de, nasi rmengo lhebun na: ‘Maha msgcuqi ka tnpusu sapah mu’ mesa ka naqah tnqliyan nii de, 49smebuc dtnqliyan ma mtheyaq mekan ma mimah dseediq bsukan. 50Ali uxe na hrean ma eeyah na knuwan we uxe na klaun ciida meyah ka tnpusu sapah tnqliyan nii. 51Yahun na mseru paru, pspuun na seediq mnnangi malu, mptngedux lmingis ma mpqrqeric rupun na.”
Currently Selected:
Matay 24: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
