Matay 25
25
Pnungalan Kari 10 Weewa
1“Ciida, Qnlhangan Baro we mntena so 10 weewa dmoi camo mlatac mosa smterung riso pstrengun. 2Ckceka daha hiya we mngataq lnglungan ka 5 heyi ma mkela lmngelung ka 5 heyi. 3Mngataq lnglungan ka weewa ge dmoi ka camo ma ini adis abura. 4Mkela lmngelung ka weewa we psaun na camo ka abura ma spuwan na camo maadis. 5Sgcuqi eeyah na ka riso pstrengun dima mtqeran ma mtaqi ka dheya da. 6Ceka rabi de mlawa ka duma na: ‘Tai, riso pstrengun wa! Yahi smterung ka heya!’ 7Ciida mtutuy kana ka weewa dima psramal camo daha. 8Rmengo weewa mkela lmngelung ka mngataq: ‘Braho su biqi miyan tikuh abura namu ado gisu mkmpahung ka camo miyan da.’ 9Cmiyuk rmengo ka weewa mkela lmngelung: ‘Ida uxe maha mptuku dooyun ta kana ka nii. Osa nanak maruy brigan abura.’ 10Wada maruy ciida ka dheya we meyah ka riso pstrengun. Pnsramal ka weewa we msuupu riso pstrengun mremux ceka sapah uqan pntriyan. Kiya de leban ka rhengun da. 11Bobo na hiya, meyah tgbukuy ka duma weewa we rmengo: ‘Bukung! Bukung! Rwhani nami rhengun!’ 12Kiya de cmiyuk rmengo ka riso pstrengun: ‘Bale ba rngage maku. Ini ku kela yamu.’ 13Maanu so kiya de kiiyo ka yamu. Ado ini namu klai ka ali ma knuwan ka eeyah na.”
Muyu Knkela Pstmaan
(Ruk 19:11-27)
14“Qnlhangan Baro we mntena so 1 seediq mosa theya, splawa na ka dtnqliyan na ma htiyan na pqlahang dnoi na. 15Muyu so beyax qqeepah txtaxa daha mege ging dheya: Taxa we 50'00, taxa we 20'00, taxa we 10'00. Kiya de wada theya nganguc ka heya da. 16Bniqan 50'00 ka seediq we asi osa gmbaruy ma 50'00 dungal ka rnrihan na. 17Bniqan 20'00 ka seediq uri we mntena so nii 20'00 dungal ka rnrihan na. 18Kiya de bniqan 10'00 ka seediq we mosa kmari dxeral ma liingun na hiya ka pila tnpusu sapah. 19Bsiyaq hari de dehuk ka tnpusu sapah dtnqliyan nii, meyah msuupu dheya smepu pila. 20Madis 5 tarantu ka seediq bniqan 5 tarantu, rmengo: ‘Tnpusu sapah, 5 tarantu ka pnseku su kenan, tai, nii hini dungal ka 5 tarantu pnrana mu.’ 21Rmengo heya ka tnpusu sapah: ‘Isu we malu tnqliyan ma mtduwa ba stmaan! Malu ba qneepah su. Mtduwa su ba stmaun meniq ani biciq qpahun. Kiya de pqlhangun misu egu ba ooda. Eyah msuupu mqaras tnpusu sapah su!’ 22Meyah berah na ka bniqan 2 tarantu uri, rmengo: ‘Tnpusu sapah, 2 tarantu ka pnseeku su kenan, tai, nii hini dungal ka 2 tarantu pnrana mu’. 23Rmengo heya ka tnpusu sapah: ‘Isu nii we malu tnqliyan ma mtduwa ba stmaan! Malu ba qneepah su. Mtduwa su ba stmaun meniq ani biciq qpahun. Kiya de pqlhangun misu egu ba ooda. Eyah msuupu mqaras tnpusu sapah su!’ 24Meyah berah na ka bniqan 1 tarantu uri, rmengo: ‘Tnpusu sapah, mkela ku isu we mtngeri ba seediq: Ani su uka pnhmaan we qbrungun su uri. Ani uka rnehak we psliun su uri. 25Kiya ka miicu ku, saan mu lmeing posa toma dxeral ka tarantu su. Tai, nii hini ka pila su.’ 26Rmengo heya ka tnpusu sapah: ‘Isu nii we tnqliyan naqah ma mbserux! Klaun sa ku, uka pnhmaan we qbrungun mu uri. Ani uka rnehak we psseli mu uri, 27so kiya de naka su spseku skuwan pila ka pila mu. Meyah ku ciida de tduwa su spuun mnrana mege kenan ka pila mu. 28Kiya de ngali hiya ka 10'00 na, bqani ga dmoi 1 mang kiya. 29Ado niqan we prnaun mu mege ka heya ma mpsngari. So uka na we glekun hiya mangal ka ani maanu na. 30Kiya de uka ririh ka tnqliyan nii we qdaani ckceka mnkuung nganguc. Mptngedux lmingis ma mpqrqeric rupun hiya.’”
Psaanak Seediq Kana Bobo Dxeral
31“Meniq ckceka knledax na hiya ka Laqi seediq, mpsuupu kana snkgulan baro meyah ciida, mptleung tluungan na knledax ka heya. 32Msseli berah na hiya ka seediq kana bobo dxeral ma psnakun na ka dheya. Mntena so mtabu miric psaanak miric rudu ma miric. 33Kiya de miric rudu we psaun na narac ma miric we psaun na iril. 34Qbsuran paru we rmengo ga narac: ‘Aguh! Yamu ga sbleqan Tama mu! Ngali ka Qnlhangan Baro pnsramal na yamu peeyah pnrdingan smmalu bobo dxeral. 35Ado muure ku we qdalan ku namu. Mhqeni ku we pmahan ku namu. Mtnooda ku we ptqiun ku namu sapah. 36Mbberas ku we plkusan ku namu. Mnarux ku we yahan ku namu qmlahang. Meniq ku sapah kuung we yahan ku namu mita.’ 37Cmiyuk rmengo heya ka msderux noda seediq: ‘Bukung! Sknuwan ka mita nami muure su we qdiyal nami, mhqeni su we piimah nami ho? 38Sknuwan ka mita nami mtnooda su ma ptaqi nami sunan, mbberas su we plukus nami sunan ho? 39Sknuwan dungal ka mita nami mnarux su ma meniq su sapah kuung we meyah nami mita sunan ho?’ 40Cmiyuk rmengo ka qbsuran paru: ‘Bale ba rngage maku, wada namu qmeepah so nii 1 tgbiciq ba mtswai mu nii we ririh namu wada qmeepah heyi mu da.’”
41“Bobo na, qbsuran paru we mprengo ga iril: ‘Latac kenan! Yamu nii snyusan Utux Baro! Teme uka psteqan rana puniq pnsrmalan quri Qbsuran Bgihur Naqah ma dsnkgulan na. 42Ado muure ku we ini ku namu qdali. Mhqeni ku we ini ku namu pmahi. 43Mtnooda ku we ini ku namu ptqii, mbberas ku we ini ku namu plkusi. Mnarux ku ma meniq ku sapah kuung we ini ku namu yahi mita.’ 44Cmiyuk uri ka dheya: ‘Bukung! Sknuwan ka mita miyan muure su, uxe uri we mnhqeni su, mtnooda su, mbberas su, mnarux su, uxe uri we meniq su sapah kuung we ini nami sbleyaq sunan ho?’ 45Cmiyuk rmengo dheya ka qbsuran paru: ‘Bale ba rngage maku. Ini namu qeepah so nii 1 tgbiciq ba seediq we ririh namu ini qeepah heyi mu.’ 46So nii ka seediq we mpteme uka psteqan pkdraun. Msderux ooda seediq gaga we mpteme uka psteqan knuudus kiya.”
Currently Selected:
Matay 25: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
