Matay 23
23
Mseang Dmptpatis ma seediq Parisay
(Mrk 12:38-40. Ruk 11:37-52, 20:45-47)
1Ciida, rmengo hbaro seediq ma tnugsaan na ka Yesu, 2rmengo: “Tleung tluungan Moseh ka dmptpatis ma seediq Parisay. 3Maanu so kiya de dai ba qmeepah ma ndwai muyu ka ani maanu rnengo daha yamu. Kiya de iya puyu qneepah daha. Ado dheya we mkela rmengo ma ini kela qmeepah. 4Dheya we gmabul mchedil ba qyqeya mqriqu ba ppaan, psaun daha ahing seediq. Kiya de ani 1 tluding baga daha ini klgelu ka dheya. 5Ani maanu ndaan daha we ppqita daha seediq kana. Kiya de pbragun daha paru ka psaan kari mrtaso, sqndisan daha ka palic rila lukus daha. 6Smkuxul paru tluungan uqan mqaras ma pusu malu tluungan sapah pssliyan ka dheya. 7Smkuxul pthmuku seediq ma ‘Mptgesa’ kesun daha mlawa meniq pssliyan ka dheya. 8Kiya de, iya ngali ka ngayan ‘Rabi’ pnlawa na yamu ka seediq. Ado wano 1 ba ka mptgesa namu. Yamu we mtswai namu kana. 9Iya kesi ‘tama’ ka seediq bobo dxeral uri. Ado wano 1 ba ka tama namu. Kiya ka Tama ga Baro. 10Iya ngali ka ‘Mpptgesa’ pnlawa na yamu ka seediq. Ado wano 1 ba ka mptgesa namu. Kiya ka Kiristo. 11Ima ka tgparu bale ckceka namu we asi ka mtnqliyan yamu. 12Ani ima smparu heya nanak we sbciqun. Ani ima smbiciq heya nanak we spruun.
13Smtali bale ka yamu seediq dmptpatis ma seediq Parisay mnnangi malu nii! Ado meluk namu rhengun Qnlhangan Baro berah seediq ka yamu. Ini namu remux ma, ini namu prmuxi ka seediq mkmosa na uri. 14(Smtali bale ka yamu seediq dmptpatis ma seediq Parisay mnnangi malu nii! Ado gmeeluk namu mangal sapah ma qyqeya mqedil mqrinuc, mnnangi namu pqita bbaro dnurun. Maanu so kiya de maha krinah mgkala ngalun namu pkdraun.)
15Smtali bale ka yamu seediq dmptpatis ma seediq Parisay mnnangi malu nii! Ado aangal namu taxa heyi tuumal kntmaan namu we mooda namu mtqiri rcilung ma dxeral. Kiya de tuumal ka seediq de wada mseediq tuxan pkdraan ka dheya ma hmrinas yamu qnnaqah daha.
16Smtali bale ka yamu seediq mbudu mdudul nii! Rmengo namu: ‘Ani ima tmiyu Sapah Thmkuwan smdehu we ini huwa ka kiya. Kiya de ani ima tmiyu king Sapah Thmkuwan smdehu we asi ka qmlahang.’ 17Yamu seediq mngataq ma mbudu nii! Ga inu ka paru na? King ka paru na ho? Pkmrtaso king ka Sapah Thmkuwan we kiya ka paru ho? 18Rmengo namu dungal: ‘Ani ima tmiyu harac spuhan smdehu, sndhegan na we huwa ta ka kiya. Kiya de ani ima tmiyu snapuh bobo harac spuhan smdehu, sndhegan na we asi ka daan.’ 19Yamu seediq mbudu nii! Ga inu ka paru na? Snapuh ka paru na ho? Pkmrtaso snapuh ka harac spuhan ka paru ho? 20Maanu so kiya de tmiyu harac spuhan smdehu ka seediq, kiya ka ga tmiyu harac spuhan ma kana snapuh bobo na hiya smdehu. 21Tmiyu Sapah Thmkuwan smdehu ka seediq, kiya ka gaga tmiyu Sapah Thmkuwan ma Utux Baro ga ckceka hiya smdehu. 22Tmiyu karac baro smdehu ka seediq, kiya ka ida tmiyu tluungan Utux Baro ma Utux Baro tleung bobo na hiya smdehu.
23Smtali bale ka yamu seediq dmptpatis ma seediq Parisay mnnangi malu nii! Ado ani kesun speriq prhuping, kedang ma mao we mege namu 1 tnugmxalan. Kiya de pusu ba ckceka gaya pndakar hiya ka msderux ooda, gmaalu ma tduwa stmaan we ini namu dai kiya di. Nii ka daun namu so ka bbege uri iya laxi. 24Yamu seediq mbudu mdudul. Smii namu ba kuyi biciq ma rqenun namu ka dapa bukung.
25Smtali bale ka yamu seediq dmptpatis ma seediq Parisay mnnangi malu nii! Ado snagun namu ka nganguc pngerah mahan ma pngerah sapo. Kiya de toma we ga stenge lhebun ka sqquru maangal ma ggeeluk. 26Yamu seediq Parisay mbudu doriq! Pllai smino ka truma pngerah mahan ma pngerah sara namu han. So maha bgurah ka nganguc na uri.
27Smtali bale ka yamu seediq dmptpatis ma seediq Parisay mnnangi malu nii! Ado mntena namu habung rncuhan. Malu ba qtaan ka peeyah nganguc, truma na we ga stenge buuc seediq wada mhuqil ma ani maanu msburo. 28Mntena so nii uri, malu ba qtaan ka pnqita namu msderux noda nganguc. Kiya de truma we ga stenge mnnangi malu ma naqah qneepah.”
29“Smtali bale ka yamu seediq dmptpatis ma seediq Parisay mnnangi malu nii! Ado yamu we smalu namu habung dmpgeela kari, pdpingun namu ka qperas pteetu habung msderux ooda seediq. 30Rmengo: ‘Nasi nami theyaq rdrudan nami cbeyo muudus we kani miyan tuumal psdara dmpgeela kari.’ 31Maanu so kiya de gisu namu spgkeela yamu we lqlaqi namu dseediq wada phuqil dmpgeela kari ka yamu da. 32Kbeyax mosa pstenge qnnaqah rdrudan namu cbeyo ka yamu wa! 33Yamu nii dquyu! Lqlaqi quyu pnugcahu! Mphuwa namu mesa qduriq pnkdira peeyah tuxan pkdraan ho? 34So nii kiya ka skgulun mu yamu hiya ka dmpgeela kari, seediq niqan knkela ma dmptgesa. Duma daha we phqilun namu, spteetu namu bobo jyujika. Duma we sbetun namu sapah pssliyan. Speeyah namu alang paru betaq namu alang icil paru mhero. 35Kiya de maha yamu kana ka dara msderux noda seediq peyah Hebel msderux noda betaq wada namu phqilun ckceka Sapah Thmkuwan ma spuhan ka Jekaryah laqi Barakias. 36Bale ba rngage maku, kana ani maanu qnnaqah nii we meeyah mknexal yamu saya.”
Slingis Yesu ka Yerusalem
(Ruk 13:34-35)
37“Ah, Yerusalem! Yerusalem! Ini su setuq phuqil dmpgeela kari ma cmebu su btunux kana wada skgulan sunan! Yaa ku mnpiya kmpsseli lqlaqi su mntena so bubu rodux mubung wawa toma palic na. Ani so kiya we ini namu sruwa. 38Tai! Kana sapah namu we maha laxun ma nrao. 39Rngage maku, peeyah saya betaq nhdean, uxe namu mqita kenan. Asi ka betaq namu rmengo sa: ‘Mnoda ngayan Bukung meyah we kiya ka bale ba tndhuun!’”
Currently Selected:
Matay 23: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
