Yehosua 1
1
Posa Kari Yehosua Mccebu Kenaan ka Utux Baro
1Bobo wada mhuqil ka Moseh tnqliyan Utux Tmninun de, Utux Tmninun we rmengo Yehosua laqi Nun mdayo Moseh: 2“Moseh tnqliyan mu we wada mhuqil da. Saya tutuy ka isu ma kana seediq mtaril yayung Yarden, pquri dxeral bbege mu seediq Israel hiya. 3Kana dxeral qnlqahan qapal papak namu we, spoda mu kari sntangan mu Moseh bbege mu yamu. 4Peeyah tadus brenux ma Lebanon nii, betaq yayung Paru, kiya ka yayung Euhrates, kana dxeral seediq Xet. Dungal uri we mpquri pryaxan hido yayung paru. 5Kana ali kndesan su we, uka seediq ka dehuk mheyu berah su. Hmuwa ku mesa mtheyaq Moseh we, maha ku so kiya mtheyaq sunan uri. 6Kbeyax ma pniqi pahung ka isu. Ado mpdudul su dseediq mu maha maangal dxeral. Kiya ka dxeral sndhegan mu dpusu rudan daha ma bbege mu dheya. 7Wano ba kbeyax pniqi paru pahung, tleus muyu kana gaya tnugesa Moseh tnqliyan mu. Iya bale kridil, kiya de ani inu ka ssaun su we maha su dehuk moda. 8Iya psthyai peeyah quwaq su ka patis gaya nii. Ani keeman ani diyan lngelung bale. So su maha tleus muyu kana kari pnatis patis nii. So kiya de, msleelu bale ka noda su elu ma, kana noda su we maha mttuku. 9Uxe ku rmnengo isu peni? Kbeyax ma pniqi pahung ka isu. Iya kiicu ma, iya pkrkerang uri. Ado mosa su ani inu we, Utux Tmninun, Utux Baro su ka mptheyaq sunan.”
Ppsramal Mtaril Yayung Yarden
10Kiya de, rmengo qbsuran mdudul seediq ka Yehosua, rmengo: 11“Oda mtqiri kobu rmengo seediq: ‘Psramal uqun, ado mk3 ali de mptaril namu yayung Yarden ma mpremux namu maangal dxeral bnege Utux Tmninun, Utux Baro namu ka yamu.’”
12Rmengo quri seediq Reuben, Gad ma dmeka pnswayan rudan seediq Menaseh ka Yehosua: 13“Klai bale ka kari rnengo Moseh tnqliyan Utux Tmninun: ‘Utux Tmninun, Utux Baro namu we mpbleyaq yamu ma, bbege na yamu ka dxeral nii.’ 14Tduwa namu htiun nklaan hido yayung Yarden, dxeral bnege Moseh hiya ka mqedil, lqlaqi ma, tnbugan namu. Kiya we, kana supi mnpahung ba ckceka namu we, asi namu ka madis qyqeya mccebu. Mooda namu berah mntswai namu dmayo dheya. 15Tara betaq mntena yamu mtbale nniqan daha ka mntswai namu ma, betaq mangal dxeral bbege na dheya ka Utux Tmninun, Utux Baro namu. Kiya ka tduwa namu mbrinah dxeral nangal namu ma, mangal dnoi namu, kiya ka dxeral bnege Moseh pnquri na nklaan hido meniq gnklaan hido yayung Yarden hiya.”
16Cmiyuk Yehosua ka dheya: “Kana rnengo su we ida nami ddaun. Kana snkgulan su dyami we, ida nami saun. 17Wada miyan huwa mesa mbahang Moseh ka ani maanu noda we, maha nami so nii mbahang sunan uri. Tai so mptheyaq sunan ka Utux Tmninun, Utux Baro su, mntena so mntheyaq Moseh. 18Ani ima wada tbrinah kari rnengo su ma, ini qbahang kana kari rnengo su dheya we, asi su ka phqilun. Wano knbeyax ma pniqi pahung ka isu!”
Currently Selected:
Yehosua 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
