Yehosua 2
2
Smkagul Mpskuuruy Mremux Yerixo
1Yehosua laqi Nun we smkagul 2 heyi mpskuuruy peeyah Sitim oosa daha gmruus qmita. Rmengo: “Sai kmuruy qmita ka dxeral kiya ma Yerixo.” Kiya de mmaha ka dheya ma, dehuk sapah Raxab mqedil kbrexun hiya ma, mtaqi hiya. 2Niqan ka seediq meyah rmengo qbsuran paru Yerixo: “Qtai! Keeman saya we niqan ka seediq Israel snkgulan meyah kmuruy mita dxeral hini.” 3Smkagul seediq mosa Raxab hiya ka qbsuran paru Yerixo: “Peeyah nganguc ka seediq mnremux sapah su ma, gaga isu hiya. Ado meyah kmuuruy qmita kana dxeral ka dheya.” 4Kiya we, mqedil nii we, liingun na ka 2 seediq. Cmiyuk rmengo: “Bale ba mneyah yaku hini ka 2 seediq nii. Yaa pneeyah inu ka dheya we, ini mu klai. 5Priyax ka hido ma, llebun ka rhengun paru alang berah na ciida we, tena wada ka dheya. Sai nhari smdurak ka dheya, maha namu sklaun na.” 6Bale ba we, dmudul 2 seediq nii mosa dnamux ka mqedil nii. Liingun na ckceka nuqah bobo dnamux hiya ka dheya. 7Seediq kiya de mosa smdurak betaq dxeral mquri yayung Yarden, betaq ntrilan yayung. Wada nganguc ka seediq smdurak de, lebun daha ka rhengun alang.
8Ini qtaqi ka 2 seediq nii nana, mosa dnamux baro dheya hiya ka Raxab. 9Rmengo dheya: “Mkela ku, Utux Tmninun ge, tena na wada sbege yamu ka dxeral nii. Kiya uri we miicu miyan dyamu ka yami uri. Kana seediq hini we mpkngungu bale berah namu. 10Ado mnbahang miyan mnlatac namu Micrayim ciida, wada huwa mesa pkdengu rcilung Mtanah berah namu ka Utux Tmninun ma, wada namu phqilun kana ka 2 qbsuran paru Amori, Sixon ma Og mneniq nklaan hido yayung Yarden hiya. 11Mnbahang miyan de, miicu miyan riyung. Ririh yamu wada uka pahung daha ka kana seediq. Utux Tmninun, Utux Baro namu we, kiya ka Utux Baro kana karac baro ma dxeral. 12Saya, wada ku gmhuwe yamu de, braho maku pquri Utux Tmninun ka psdehu dyami ma, glaani ka tnsapah mu uri. Biqi ku 1 bale ba pnugkela namu yaku. 13Pkdusi ka tama ma bubu mu, mtswai mu rseno ma mqedil, kana dheya. Doi baga ka dheya ma pqduriq hnqilan ka knuudus daha.” 14Rmengo heya ka 2 seediq nii: “Psruwa miyan pririh hnqilan su ka knuudus miyan. Nasi su ini rngaani seediq ka noda nii. Pkelu mege menan dxeral nii ciida ka Utux Tmninun we mpeeyah gnaalu ma bale ba lhebun miyan mqita sunan.”
15Kiya de mqedil nii we saangal na snuyuk speeyah na beling bais sapah pslbui ptuting dheya. Ado sapah na we gaga meniq ssiyo bobo pnharac qnalang alang. Meniq hiya ka heya uri. 16Rmengo dheya ka heya: “Osa mquri dgiyaq ka yamu han. So namu uxe psterung dseediq smdurak yamu. Tgleing mk3 ali hiya ma, tara betaq wada mpbrinah alang ka dseediq pnosa smdurak. Kiya ka ani namu mkkesa elu ddaun namu di.” 17Rmengo heya ka dheya: “Uka pnugluban miyan ka sndhegan miyan sunan. 18Qtai! Meyah miyan dxeral nii ciida, asi su ka bkeun snuyuk mtanah nii ka beling bais pnslubuy su ptuting menan. Kiya uri ma tama ma bubu su, mtswai su ma, kana tnsapah tama su we psseli sapah su truma kana. 19Kana wada nganguc pneeyah isu hini we, maha dheya nanak ka dara daha ma, uka pnugluban miyan. Kana mneeniq sapah truma we, nasi pnhuqil heya ka seediq we, maha heyi miyan ka pnsdara dheya. 20Nasi su ssneeru seediq ka noda miyan nii de, uka pnugluban miyan ka sndhegan miyan sunan.” 21Rmengo ka mqedil: “Mpuyu ku so kari namu!” Kiya de mosa hmaduc dheya ka heya. Kiya de sbekui na beling bais sapah hiya ka snuyuk mtanah.
22Mlatac ka 2 seediq, mosa bobo dgiyaq. Mk3 ali meeniq hiya, betaq mbrinah ka dseediq smdurak dheya. Mnoda stratuc migin ka seediq sndurak we, ini daha slai. 23Meyah ka 2 seediq, hmeruc peeyah dgiyaq ma, mtaril yayung mosa Yehosua laqi Nun hiya. Ssneeru na heya ka ani maanu so ndaan daha. 24Rmengo dheya ka Yehosua: “Utux Tmninun we, bale ba gaga na sbege baga ta ka kana dxeral kiya. Kiya uri we kana seediq hiya we, mpkngungu bale kana meniq berah ta.”
Currently Selected:
Yehosua 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
