Hiburu 11
11
Quri Snhiyan
1Snhiyan kesun we kiya ka bale ba niqan stangan, quri so ooda uxe ntaan we niqan bale. 2Ririh snhiyan nii we wada mangal tndhuwan ka dseediq cbeyo.
3Ririh snhiyan nii, klaun ta kana ani maanu we snmalu peeyah kari Utux Baro. So kiya de, qtaan we snmalu pneyah ini qtai.
4Ririh snhiyan nii, bnege na snapuh Utux Baro ka Hebel we mgkala knmalu bnege Qayin. Kiya de mnangal stndahu ma ngalan na seediq msderux noda. Utux Baro nanak ka mqaras mangal bnege na. Ani wada mhuqil ka heya we, ririh snhiyan nii de ida ga rmengo nana. 5Ririh snhiyan nii, wada yahan mangal ka Xanok, kiya de ini qita qnhuqil ka heya ma ini slai seediq uri. Ado wada ngalun Utux Baro ka heya da. Kiya de, tgberah wada yahan mangal we, tena qqrasun ma tndhuun Utux Baro ka heya da. 6Uka snhiyan nii de, uxe pqaras Utux Baro. Ado seediq meyah berah Utux Baro we asi ka snhii niqan Utux Baro. Kiya uri we snhii mpbege snadu seediq migin Heya. 7Ririh snhiyan nii, Utux Baro we wada na ptrwaun pqita uxe ntaan Noax. Kiya de snparu miicu ka lhebun na de, smmalu asu paru, pkdusun na kana ka tnsapah na. Spooda na nii wada na ngalan niqan qnquwan noda ka kana seediq ciida, heya de wada maangal msderux noda pneeyah snhiyan.
8Ririh snhiyan nii, wada asi thei mosa ka Abraham pnlawa ciida. Mquri dxeral ngngalun daha pusu ddooyun nexal ka heya. Mosa ciida ka heya we ini na klai nana ka ssaun na. 9Ririh snhiyan nii, mtnooda dxeral sntangan, mntena so ga meniq uxe dxeral na, msuupu Yijxaq ma Yakobu mntena sntangan meniq kobu hiya. 10Ado Abraham we psmeyah alang niqan pusu, kiya ka smnalu ma pnheyu Utux Baro. 11Ririh snhiyan nii, ani wada hmrinas knkawas tnqliyan na laqi ka Sarah uri we ida pniqan beyax kkchedil. Ado bale ba snhiyun ka sntangan nii. 12Maanu so kiya de, peeyah so hari wada mhuqil ka seediq we pyahan lqlaqi mntena so pngerah baro kneegu ma, mntena bnaquy ssiyo rcilung ini sqlingi smepu.
13Dseediq nii we peeniq snhiyan wada mhuqil, ani ini angal sntangan daha we, ida ga mita peeyah theya, kiya uri we ga mqaras smterung. Meniq ta bobo dxeral we tnnais ta meniq ma, mtnooda ta we klaun daha. 14Seediq rmnengo kari nii we gisu migin 1 alang daha. 15Nasi daha lnglungun ka alang lntadan daha we mtduwa mbrinah mosa dungal. 16Bale ba gaga daha sraun we kiya ka 1 knmalu ba, kiya ka alang ga Talangan Baro. Kiya de Utux Baro we ini na ngali qnsiqa tmgaya mesa Utux Baro heya ka dheya. Ado tena pnsramal 1 alang dheya ka Utux Baro.
17Ririh snhiyan nii, pseengun Utux Baro ciida ka Abraham we wada na sbege ka Yijxaq. So nii we kiya ka dseediq mnangal sntangan ma maha mqaras ba mege murux ba laqi na. 18Quri laqi nii we, rmnengo ka Utux Baro: “Pntuting pneyah Yijxaq we, kiya ka kesun lqlaqi lmutuc.” 19Heya we snhiyun na, Utux Baro we dehuk pkuudus seediq wada mhuqil. So nii we ga kmberih mangal laqi na dungal. 20Ririh snhiyan nii, Yijxaq we pkela ooda nexal ma smbleyaq Yakobu ma Esaw. 21Ririh snhiyan nii, daling mphuqil ciida ka Yakobu ge, tkxalan na smbleyaq ka daha laqi Yosehu. Dmoi hukuc thmuku Utux Baro ka heya. 22Ririh snhiyan nii, daling mpgedang ka Yosehu ge, plaale rmengo mplatac Micrayim ka seediq Israel. Kiya uri we so buuc na uri shiti na kari hniti uri.
23Ririh snhiyan nii, mtuting ka Moseh de, tama bubu na we taan na malu hnyegan na ka laqi de, liingun na 3 idas, betaq ini kiicu kari pnosa qbsuran paru. 24Ririh snhiyan nii, tghedu kndkilan na ka Moseh de ini sruwa kesun laqi weewa Paroh. 25Smkuxul riyung mtheyaq mqraqil seediq Utux Baro, ini sruwa mooda mqaras meeniq ckceka qnquwan. 26Spruun na pnkala bale mita dnoi Micrayim ka quri pnqraqil Misaya. Ado ssatang maangal snadu ngalun na. 27Ririh snhiyan nii, mlatac Micrayim ka heya ma, ini kiicu seang qbsuran paru. Ado knremun riyung, mntena so ga mita Utux Baro ini tai. 28Ririh snhiyan nii, pheyu snseman hrnasan ma, rmicuh dara rhengun. Kiya de so uxe mooda smeeliq qbsuran laqi seediq Israel ka snkgulan mphuqil. 29Ririh snhiyan nii, mnoda mdengu dxeral mntaril rcilung Mtanah ka seediq Israel. Mkmooda ka seediq Micrayim we wada asi day mubung da. 30Ririh snhiyan nii, mn7 ali tgqiri alang Yerixo ka seediq Israel, kiya de wada mtakur ka qnalang da. 31Ririh snhiyan nii, Raxab mqedil kbrexan we smbleyaq smnterung seediq maha pskuuruy. So kiya de ini theyaq dseediq ini thei mhuqil ka heya.
32Mprengo ku maanu dungal ho? Nasi mu srengo kana ka Gidon, Baraq, Simson, Yiptax, Dawid, Samuel ma, dmpgeela kari de ini ptuku ka ali da. 33Dheya we mnoda snhiyan nii, tduwa muruc qnlhangan pais. Meepah msderux noda de, maangal sntangan, mtduwa gmemuk quwaq rkelic rudu. 34Mtduwa mehing puniq paru, qduriq peeyah hema hlmadac mhungul riyung. Mkkere riyung peeyah muuwic, mccebu ciida we ptuura pahung daha, kiya de tduwa pqduriq supi pneeyah icil qnlhangan. 35Duma mmqedil we wada daha ngalun ka lutuc daha muudus peeyah hnqilan. Kiya uri we niqan ka knremun pnseru ma, betaq ini sruwa plaxun, so maha maangal knmalu mnuudus peeyah hnqilan. 36Duma na we knremun pnhlisan, sbetan, bkean, shetur ma, lmlamu sseengan mqraqil. 37Dheya we wada phqilun btunux, wada phqilun kneruc, wada phqilun hlmadac. Kiya de mlukus qraqil miric qduriq tmalang ani inu, smterung qrinuc, pnqraqil ma tnsyaxan. 38Ini pnlengu dheya ka knlangan nii, dheya we mtnooda ini ttama meniq tadus brenux, bobo dgiyaq, beling dgiyaq ma, beling dxeral.
39Kana dseediq nii we, ririh snhiyan wada mangal stndahu Utux Baro. Kiya ka we ida ini angal sntangan Utux Baro na. 40Ado Utux Baro we pnsramal na ita ka ooda malu riyung. Nasi uxe ita de, uxe mpttuku ka dheya.
Currently Selected:
Hiburu 11: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
