Hiburu 10
10
1Gaya kesun we saso knmalu nexal, uxe bale ba hnyegan na. So kiya de ani knkingal knkawas mege mntena spuhan we, uxe mpttuku seediq meyah smdaling. 2So kiya de, naka ta lixun ka ooda ssapuh nii da peni? Ado seediq kmtama we mtexal bale de wada sbrahan. Lhebun daha we ini kesa niqan ta qnquwan noda di. 3Kiya de, knkingal knkawas snapuh nii we mplngelung qnquwan noda seediq. 4Ado dara dapa balas ma dara miric we ini tduwa smerus qnquwan noda.
5Maanu so kiya de, mmeyah bobo dxeral ka Kiristo we rmengo:
“Snapuh ma bnege we uxe kiya ka ngalun su,
kiya ka kiya heyi ka spsramal su kenan.
6Snapuh psqmaun ma snapuh psruwa qnquwan noda we,
ini su ba kuxi!
7Mprengo ku ciida:
Utux Baro! Nii ku da, ooda mu we tena ga spatis Patis Mrtaso da.
Utux Baro! Meyah ku we, mpuyu ku lnglungan su meepah.”
8Kari ga srengo tgberah: “Snapuh ma bnege, snapuh psqmaun ma snapuh psruwa qnquwan we uxe kiya ka ngalun su ma ini su ba kuxi uri.” Nii we pnooda gaya mege kana. 9Lmutuc rmengo dungal: “Qtai! Meyah ku we, mpuyu ku lnglungan su meepah.” So nii de, ga berah ka snruwan na ma, ga bukuy ka psdehu na. 10Ita de pnooda ta lnglungan Utux Baro, mnoda Yesu Kiristo, ani texal bale mege snapuh heyi na de wada ta mrtaso da.
11Kana msapuh we mheyu meepah Utux Baro klaali. Mneegu riyung mege snapuh mntena. Snapuh nii we ini tduwa smerus qnquwan noda. 12Kiya de, Kiristo we wada texal mege snapuh psruwa qnquwan noda niqan beyax betaq ani knuwan. Kiya de ga tleung narac Utux Baro. 13Bobo na hiya de pais na de ga toma papak tluungan na. 14Ado Heya we mooda texal bale snapuh de, tduwa pttuuku dseediq kmptaso ani betaq knuwan.
15Pgkela ita ka Bgihur Utux uri, ado rmnengo ka Heya:
16“Rmnengo ka Bukung: Bobo ali ciida,
so nii ka pnheyu mu pnsdhegan dheya,
gaya mu we psaun mu ckceka lhebun daha,
ptasun mu bobo lhebun daha uri”
17Rmengo dungal:
“Qnquwan noda daha ma qnnaqah daha we,
Uxe mu psbgrnahun lmngelung.”
18Qnquwan noda nii we wada srwaun ma, ani ini bege snapuh ssruwa qnquwan noda di.
Mdudul ma Mdakar
19Maanu so kiya de, mtswai, spooda ta dara Yesu mtduwa ta mremux Pusu Mrtaso Thmkuwan. 20Nii we pnooda ta Heya ka wada rmaguh 1 elu bgurah ma muudus. Mooda ta pala, pala nii we kiya ka heyi Kiristo. 21Dehuk ta niqan ta 1 paru msapuh ga qmlahang sapah Utux Baro. 22Kiya de pdae ta bale ba lhebun ta ma mttuku snhiyan ta, mtena wada mangal psbgulah ma lhebun uka qnnaqah ma, heyi ta wada snagan qsiya meyah ta smdaling Utux Baro. 23Psdehu sntangan pnukela ta so ta uxe mpklgelu. Ado bale ba stmaan ka sndhegan na ita ka heya. 24Ppqlahang ka yamu, peeyah ka gnaalu namu, ppdudul meepah malu ooda. 25Iya sange msseli, mntena so seediq tgluhe malix. Pddudul riyung ka yamu, klaun namu daling ka ali de, na ka so nii ka ooda namu.
26Nasi ta wada mangal knkela kari bale nii we mnnangi ta moda meepah qnquwan noda dungal de, maha uka ka ssapuh ssruwa qnquwan noda. 27Wano mtara miicu mpsgao ma tbbau puniq mrequn kana pais da. 28Ani ima ini qbahang gaya Moseh we, spooda 2 ma 3 seediq pgkela de, tduwa phqilun ma ini srwai ka qnnaqah na. 29Seediq ga qmleqah laqi Utux Baro, ngalan daha ini psbgurah ka dar pnsdhegan so ka mrtaso quri dheya, muman tmsiiyax seediq mnege huwe ma niqan Bgihur Utux. Lungelung, uxe maangal paru riyung pnkdira ka heya ho?
30Ado klaun ta ima ka rmnengo:
“Yaku ka mpciyuk rmengo uka qnquwan,
ida ku mpciyuk.”
Rmengo dungal:
“Mpsgao seediq na ka Bukung.”
31So kcugun riyung ka ga meeniq ckceka baga Utux Baro muudus ani knuwan!
32Lnglungi ka noda namu, bobo wada namu pldaxan de, mnoda namu egu riyung mqraqil: 33Snyanun namu na berah seediq ma mangal pnqraqil, kiya uri we mtheyaq namu dseediq mnqraqil so nii. 34Sgaalu namu ka dseediq wada shetur. Kiya uri we qrasun namu smterung wada glekun ka dnoi namu. Ado klaun namu, yamu we niqan ka dnoi knmalu riyung ma meeniq ani knuwan. 35Maanu so kiya de, iya qdaani ka lhebun uka kniicu namu. So nii ka lhebun namu de maangal namu paru snadu. 36Asi namu ka knremun, mhedu namu meepah lnglungan Utux Baro de, kiya ka tduwa mangal sntangan na. 37Ado, spatis Patis Mrtaso. Rmengo ka Utux Baro,
“Ato tikuh de,
meeyah ka mmeyah na, uxe mpsgcuqi.
38Kiya we seediq mu msderux noda we ririh snhiyan de maha mangal knuudus.
Nasi tgkiwax ka heya de, lhebun mu de uxe mu kuxul ka heya.”
39Ita ge uxe ta dseediq tgkiwax ma mtakur. Seediq ta niqan snhiyan kiya de maangal ta knuudus.
Currently Selected:
Hiburu 10: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
