THUPHUAN 14
14
Tuufa Le A Minungte
1Cen i sik fangin Zion Mual ah Tuufa ding hmu ing; amah thawn hmunkhat ah mi ting khat le thawng sawmli le thawng li um tlang ai ciamite tu amah ai hming le Pa ai hming amahte cal ah nganhnak mite i.#Ezk 9:4; Thup 7:3 2Cen vancung in aw pakhat za ai ciami aw tu tilian tilep aw le khuari cawm roh aw bang i. Congcing tum thiamtute ai congcing tumhnak aw bang khai i. 3Minung ting khat le thawng sawmli le thawng li tu kumpibawi tohkham le nunghing pali le upate hmaiah ding tlang i. La thar sa tlang ai ciami la tu amahte ian in zir thil i. Mi zongzong songin anite ian tlan cia mite i. 4Anite tu mi cianghlim pawl i, nupang thawn a pawl dun awng lomi i ai a him mite i. Tuufa fehhnak hmuncang ah hlun tlang i. Mi zongzong lakin tlanhnak mite i ai, rongthar hmasaber bangin, Pathian le Tuufa hnenah ap cia mite i. 5Thudonrel awng lo i; mawhhnak zaikhai nai tlang lo i.#Zep 3:13
Vancungmite Pathum
6Cen van ah a zuang hnelhno vancungmi pakhat hmu ing. Amah tu laivum miphun cang, hin cang, pong cang le ram cangcang hnenah kumzangza in a khomi Thuthangpha thantu i. 7Aw cawm ngai in, “Pathian upat tu ilai a thawmlianhnak thangphat tu ih! Zaimantifangin miphun cang amahte thu rel can hleng zo i. Van le lai, tifingriat le cirhti hmuahhmuah a bawntu bia tu ih!” tiin ti i.
8Vancungmi pahnihhnak in pakhathnak heh hlun ai, “A thawmlian mi Babylon tu hnawm zo i, hnawm ngah zo i. A taksa hiamhnak cabit zu khiah mi zongzong pe ai, riruai sek i,” tiin ti i.#Isa 21:9; Jer 51:8; Thup 18:2
9Vancungmi pathumhnak in a hmai ai a zuangtu vancungmite pahnih heh hlun ai aw cawm ngai in, “Aisu khai sahrang le milim bia ai a hnikhnaihhnak a cal ah ihlahle a ban ah a naitu heh, 10Pathian thinrawhnak khuat songai a thinraw ai bunghnak cabit zu a tumce ding tuh i. Ciami zu a dingtu heh vancung thianghlim mite le Tuufa hmaiah mai le kat mai songah cawhhnak tuar tlang tuh i.#Isa 51:17; Sem 19:24; Ezk 38:22 11Amahte cawhhnak maikhu tu catloin vum lamah kai tuh ṭiode i. Sahrang le a lim biatu le a hming hnikhnaihhnak a naitu ca ahcen sun ah ituseh zan ah ituseh muang niu in cawlumhnak can nai nawn lo i,” tiin ti i.#Isa 34:10
12Hebang can ah Pathian ai minungte, Pathian ai thupehnak a hluntu le Jesuh caah rinsantlak ngai in a nungtute in thinsau in amahte tuarbenhnak nai zia larruai kul i.
13Cen vancung in aw pakhat za ai, “Hemi heh ngan tu. Bawipa sang kongin a thitute heh mihmuifu i,” tiin ti i. Ciafangin Rauhla in, “I ngaingai i! Anite tu amahte naper khunghar in cawlum tuh ihang; zaimantifangin amahte perhnak in hlun tlang tuh i,” tiin ti i.
Laivum Rongkhawm Can
14Cen i sik fangin mairo ngo hmu ing; ciami mairo vumah a lu ah sui ai bawnhnak kumpibawi lukhuk khu ai a kut ah vangkawn sandir a awhtu Mi Fapa bang hmu ing.#Dan 7:13 15Biakinn songin vancungmi pakhat suak ai mairo vumai a totu hnenah aw cawm ngai in, “Na vangkawn heh fang athnak tuhin hmang tu, zaimantifangin a can khim zo i; Lailung vum rongkhawm can cu zo i,” tiin ti i.#Joel 3:13 16Cen mairo vumai a totu in laivum ah a vangkawn hoi ai lailung vumai fang heh at ai khawm i.
17Cen a dang vancungmi pakhat vancung in a suak hmu ing; ani khai vangkawn sandir nai ve i.
18Cen a dang vancungmi pakhat, mai vumah thunaitu, puleng in suak i. Vangkawn sandir a naitu vancungmi hnenah cawm ngai in au ai, “Na vangkawn lang tulai laivum ai cabit vuan ah cabitte at tuhang; zaimantifangin cabit hmin zo ihang,” tiin ti i. 19Ciatihin vancungmi in a vangkawn heh lailung vumah hoi ai cabit kuang in cabit thai at ai Pathian thinrawhnak cabit rialhnak songah hlak i. 20Cabit thai tu khuapui pualam ai um cabit rialhnak ah rial ai cabit rialhnak songin thisan luang i; ciami thisan tu peng zahnih tian luang ai siphuh kakharh tian thuk i.#Isa 63:3; Kah 1:15; Thup 19:15
Currently Selected:
THUPHUAN 14: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
