THUPHUAN 13
13
Sahrangte Pahnih
1Cen Tifingriat songin sahrang suak hmu ing. Ki sawmkhat le lu pasarih nai i; a ki vumah kumpibawi lukhuk pakhat ṭen khu ai a lu vumah Pathian zohsuamhnak hming pakhat ṭen um i.#Dan 7:3; Thup 17:3, 7-12 2Ciami sahrang tu tlavang bang i; a ke tu vom ke bang i ai a ka tu chintit ka bang i. Rulhreng ai a naihnak a huham, a kumpibawi tohkham le a thunaihnak lianpui pe i.#Dan 7:4-6 3Sahrang ai lu pakhat tu thihpui tlak a roh ze in maliamhnak bang i, ikhalselai ciami a hmaihma heh lawm i. Laivum pumpuhluk multing tlang ai sahrang heh hlun tlang i. 4Rulhreng ai a thunaihnak sahrang hnenah a pe manin mi zongzong in rulhreng heh bia tlang i. Cen sahrang khai bia tlang thotho ai, “Sahrang a bangtu aisu um i? Aisu in tawng ben tuh i?” ti i.
5Sahrang tu Pathian zohsuamhnak le hmingsiahnak thu puarthau bik in rel thil tuhin siang ai hla sawmli le hlahnih song thu naithilhnak khai ngah i.#Dan 7:8, 25; 11:36 6Ciatihin Pathian le a hming, a umhnak hmun le vancung ai a ummi hmuahhmuah heh sahrang in cukcam dekdo i. 7Ciahlaiah Pathian ai minungte tawng tuhin le neh tuhin can pe ai hin cang, ram cang, pong cang, le miphun cangcang vumah thunaihnak pe i.#Dan 7:21 8Ciatihin laivum mi zongzong in sahrang heh bia tlang tuh i; ikhalselai laivum sem hlan in nunhnak laibu songah hming khum ciamite in bia tuh lo i; ciami nunhnak laibu tu rek tuarhnak Tuufa ai i.#Saam 69:28
9“Zahnak bil nai le i sikhaw ngai tu ih! 10Sal tuhin pom tuh ticiahnak mite tu pom tuhai ralvang in rek tuh ti ciahnak mite tu rek tuh i. Hemi bang can ah Pathian ai minungte in thinsau ngai in tuar benhnak le rinsantlakhnak larruai kul hrimhrim i.#Jer 15:2; 43:11
11Cen sahrang dang pakhat lai songin a suak hmu ing. Ciami sahrang in tuu faniu ki bangin ki pahnih nai ai rulhreng bangin pong i. 12Sahrang pakhathnak ai naihnak a thawmlian thunaihnak a mithmuh rori ah hmang i. Thihpui tlak maliam napui a hmaihma a lawm zomi a pakhathnak sahrang heh lai le laivum ai a ummi hmuahhmuah in bia tlang tuhin khengkhebel in ruai i. 13Hemi sahrang pahnihhnak in a lian ngai aicankul bawn i. Mi zongzong ai mithmuh ah van in lai ah mai tlaruai i. 14Cen pakhathnak sahrang mithmuh rori ai ngaihtamkul bawnthilhnak thupe tlang manin lailung vumai a ummi hmuahhmuah zawl ben i. Ralvang maliam napui a nung thotho mi sahrang upathnak ah amah ai lim bawn tuhin thupe i. 15Sahrang pakhathnak lim songah nunhnak haihawh lut tuhin sahrang pahnihhnak tu thupe ai ciatihin a lim tu pong thil ai hlaiah amah a bia lotute heh rek berh i. 16Cia sahrang in mi zongzong miham ituseh micik ituseh, milian ituseh mifarah ituseh, sal ituseh, miluat ituseh, a kiahhan lam kut ah ihlahle amahte cal ah khengkhebel in hnikhnaihhnak bawn i. 17Ciami hnikhnaihhnak nai hlah lekhaw aisu inkhai thilzuar thil lo ai lai thil fawn lo i; ciami hnikhnaihhnak tu sahrang hming ihlahle sahrang hming ca ai hmanghnak nambat i.
18Hemi hmunah fimhnak hmang kul ngai i. Fimhnak a naitu in sahrang nambat ai sullam tuat thil i, zaimantifangin ciami nambat tu mi pakhat hming ca in hmanghnak i ai, a nambat tu zaruk sawmruk le paruk i.#13:18 A nambat tu zaruk sawmruk le paruk i: tihnak in a sawh nuamhnak tu Rome Emperor Nero i thai i; zaimantifangin a hmin ngaingai “Nero Caesar” heh Greek pongfang in Hebrew pongfang ah a let fangin 666 khim i. Nambat 7 he a famkhim nambat i tiin ruat manin 6 tu a famkhim lo tiin sang i. Ciamanin 666 tu a famkhim lo pittawp ti hiamhnak i thai i.
Currently Selected:
THUPHUAN 13: RZB
Highlight
Copy
Compare
Share
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
