Izaiya 9

Jowonga zela Namatikeliwa afuna za

1Mbwenye atu anne wanle kakumbanyetcha, kiza kakalave muisini. Malambo a mundulrimu Yehova ohosakanya ira ilambo ya Zebuloni na Nafitali dilramwisiwe. Mbwenye malambo ogomiheda, kuma ndila yodowa bara ante ilambo inafwanyeya kombela ya Jordawu, ku wonga Galileya wewo unakala atu a malogo ohiyana-hiyana, Yehova unoza aisandutche ira ikale ilambo yorihediwa.#9:1 Galileya ali ilambo muwari mwa Izarayeli. Galileya awandile kala ilambo yorihediwa muwari moira Yesu okala eto olaba mabasaye muwari mwa ilambo yenno. Matewuji 4:12-16. 2Atu anno wanle kawendetcha muisini, peno kohoona moneya ulukulu. Ale kafwanyeya munfulrini mwa ukwa, moneya umala afwanya. 3Nyo Yehova muindjiviha nlogo nenyu. Muindjiviha hagalala wa atu enyu. Aliwa anahagalala vamentoni venyu, nnga hagalala unakana atu tempu yohanda, eto nnga hagalala unakana atu ogana jawakile atu amwidaniwa. 4Mwasiwa nyo muhumala kotola nigologolo neno naanyemeletcha, eto muhukotola golromondo dedo daakometchana atu, eto muhukotola iwaxuwaxu ya aliba aoniha goyi, nnga mwairile nyo mwaagondjihaga akuda Midiyani.#9:4 nyo mwaagondjihaga akuda Midiyani: Mulugu aagondjihile aMidiyani muwari mwa Jideyawu tempu yasanyeya aIzarayeli mmandani mwa aMidiyani anno. Anamasogolrelra 6:1-3, 7:15-25. 5Tchoira sapato datene da anyakondo kadowa kondoni, eto jowara jatene jodugudela na sangiri, jinoza jitumeyiwe na munlo nnga kuni.

6Tchoira ukala mwana ubaliwe ira nione upama wehu. Ukala mwanapongwe urumiwe wa hiyo. Utongi uli vanifudini vaye. Liye nzina naye unaitaniwege Namawelruza Otikiniha, Mulugu wa Kopolo, Baba wa Mukalakala, Musogolrelri wa Murendele. 7Ulukula wa utongi waye na murendele kunakana goma uwa. Unoza atonge vampandoni va umwene wa Davi. Unoza avenyihe eto agarateyihe umwene waye, muwari motonga mwa ibaribari eto muwari mwa upama, roma tempu yenno ante dowa sogolro kala no kala. Yehova unoirana jatene eji na mwasa wa sandje yaye.

Yehova ohotonga ubure wa aIzarayeli

8Nabwiya ohoruma mazu oasumulula akuda Jako. Mazu ayo anaasumulula aIzarayeli. 9Akuda Efarayimi na akuda Samariya,#9:8-9 akuda Jako… aIzarayeli… akuda Efarayimi… akuda Samariya: Mazina matene anno anaawonga atu amohive. Tchoira nikolo na nlogo na aIzarayeli ali Jako. Eto Jako ohovahiwa nzina nimohi niwa na Izarayeli. Eto muwari mwa aIzarayeli, nlogo nlukulu ali na Efarayimi. Eto sidadi ilukulu ya aIzarayeli ali Samariya. atene anoza kaiziwe. Aliwa anawonga movitukulela eto mojingari keraga: 10<<Nyumba dehu da boloki dihimala gwa, mbwenye hiyo nnodimanga akoka na mabwe ogwadiwa pama. Mitengo dehu da nantambu dihimala gwihiwa, mbwenye hiyo nnafuna nizale mitengo da seduru vamalroni viwa.>> 11Mbwenye eji kajinaireya mwasiwa Yehova unaavenyiha amwidani a Rezimi, eto Yehova unaaziha amwidani ayo ira kaze kawane na aliwa. 12Akuda Siriya okumela makumelo wa nzuwa eto aFilistewu okumela mavirelo wa nzuwa, kohomala hula wanoni wewa ira kaamide aIzarayeli. Masiki eno uwali wa Yehova kunawanda ahiya eto ndanda naye nilive notapula nene ira aaonihe goyi.

13Atwale tchawelenle wa Yehova wenno aaonihile goyi, eto tchaamusakile Yehova wa Makuru Matene. 14Na mwasa wenno Yehova unoza agwade muru wa Izarayeli na mwilayene. Unoza apazewo mendo da sogolro vamohi na mendo da mundulri siku nimohive. 15Muru unawongiwa ba andimuwa oulula na atu orihediwa. Eto mwila ba anamafiyiheda ofundjiha jonama. 16Mwasiwa anno anaasogolrelra atwala banno anaadimeliha. Eto anno anasogolrelriwa na aliwa anonongiwa. 17Nona Nabwiya kanna hagalala zela azombwe ewa, nne kanna tangaranga zela anapawi na amakwele a ahiyana. Mwasiwa atu atene kinairana ja Mulugu eto ba atu oirana jotakala. Muwano mwewa munawonga uzimora. Nona uwali wa Yehova wahawandaga ahiya, eto ndanda naye nilive notapula nene ira aaonihe goyi.

18Mwasiwa tega unohinda nnga munlo wenno unamaliha makaruwe na minga, eto unotumeya mitengo da muguguruni. Utchi wewa uli tolroo nnga murambo. 19Na mwasa wa uwali wa Yehova wa Makuru Matene, ilambo inatumeyiwa na munlo eto atu anakala nnga kuni diwa. Kalivo mutu unamuirela nfwaye tangaranga. 20Aliwa kaperuwa pandi ya ndanda nodjana, anaawaka afwiwa jodja jiwa mbwenye kinarumbala. Aliwa kaperuwa pandi ya ndanda noromana, anatakuna ja annya eto ndala ilive na aliwa. Ihanle ku djanana oka oka. 21Akuda Manasesi anaadja akuda Efarayimi. Eto akuda Efarayimi anaadja akuda Manasesi. Aliwa vamohi anawana na akuda Juda.#9:21 Manasesi… Efarayimi kafwanyeya kagali ana Joze eto azuliye a Jako anno Jako aonne liye nnga ahima aabanle liye. (Jenesesi 48:5) Nona uwali wa Yehova wahawandaga ahiya, eto ndanda naye nilive notapula nene ira aaonihegeve goyi.

Currently Selected:

Izaiya 9: iLolo

Highlight

Copy

Compare