Izaiya 8
8
Mulugu ohowonga zela gondjihiwa wa aIzarayeli
1Yehova ohodiwandela ira: <<Katukula yolrembavo ilukulu, ulrembevo na malrembelo ooneya pama, wire: <Gudjula mwa sanga sanga, waka mobaranya.> >> 2Yehova agadiwandenle eno, dohafwanya amboni ororomeleya ira kadihidedele umboni dalrembaga. Mmohi ali namakuta Uriya, mmohiwa ali Zakariya mwana Jeberekiya.
3Noira eno, miyo dohodowa gumana na muhiyanaga wenno uli namafiyiheda, liye kana vambani, mbala mwana wa mwanapongwe. Evale Yehova ohowonga na miyo ira: <<Unvahe nzina na Gudjula mwa sanga sanga, waka mobaranya. 4Mwasiwa ahanarome itana: <Baba> eto ahanarome itana: <Mama>, jorayela ja Damaxiku na japama japama ja Samariya jinoza jitukuliwe na mwene wa Asiriya.>>#8:4 jorayela ja Damaxiku na japama japama ja Samariya jinoza jitukuliwe na mwene wa Asiriya: Ora yenno akuda Damaxiku na akuda Samariya bavenda joagondjiha akuda Jeruzalemu. Mbwenye hiya gondjiha, akuda Damaxiku na akuda Samariya kagomenle gondjihiwa na atu amohiwa kagali akuda Asiriya.
5Yehova ohodiwandela akoka ira: 6<<Atwala kohokonda mahindje a Silowe anno anawenda vang'ono vang'ono eto anahagalala na Rezimi na mwana Remaliya.#8:6 kohokonda mahindje a Silowe: Ku wonga aliwa kohokonda muhara no muroromela Mulugu. Muwari mohomuroromela Mulugu anahagalala na Rezimi na mwana Remaliya: Ku wonga atu omukonda Mulugu ale kafuna jokamihediwa na amwene amohiwa anno kafwanyeya kagali Rezimi mwene wa Siriya na Peka mwana Remaliya mwene wa aIzarayeli. 7Na mwasa wenno Nabwiya unoazeliheda mwene wa Asiriya. Liye unoza aze na anyakondwaye, kaze kawane na aJuda. Liye unoza nnga xeya, nnga muhindje Eufarati, kaze kagumule ilambo wu ante wu. 8Anoza kavolowe mwa kopolo, kazale ilambo ya Juda nnga mahindje okwaranya vanagometcha atu, kafiyede ante vanikohini va Juda. Anoza katapule mapepelo ewa, kakwakwane ilambo yawo yatene, we Emanuwele.>>#8:8 kafiyede ante vanikohini va Juda: Akuda Asiriya kafuna kaze wa akuda Juda kalaga nnga mahindje kazaga, mbwenye tchawanda mubwiniha mutu watene. Ku wonga kafuna kaasanye mbwenye tchawanda agondjiha. Kohokana vafuna atu gomela. Eto va nzina na Emanuwele podi kala nzina nimohi niwa na Juda owu hehi yolobela ira Mulugu aze aakamihede akuda Juda.
Jokokomeza ja Yehova para Izaiya
9Kairani madugudugu nyo atu a mwilamboni nyo. Munoza mukotoliwe. Mureye mabaru nyo vilambo datene muli olapela olapela. Warani ja kondoni amala mukotoliwe. Warani ja kondoni amala mukotoliwe. 10Wongani marondo mbwenye marondo ayo kiza kanuka yengo. Muvwelrane jinafuna nyo ira, mbwenye joira jo kajinawandeya, mwasiwa Mulugu uli na hiyo.
11Tchoira Yehova ohodihinda na ndanda naye na kopolo, liye diwandela eto liye diwendjeliha ira dahawende na ndila da atu ala. Liye awongile ira: 12<<Atwala kawonga zela konda utongi, weyo mbwenye kubalrege ira konda utongi wa ibaribari ku wewo. Eto kuovege jejo jinaova atu nne kukukumuwege zela ejo. 13Yehova wa Makuru Matene gunafuna we muona ira gotchena eto gunafuna we muova. Gu liyene unafuna we murendjeyana. 14Zela atu a Juda na atu a Izarayeli, liye unoza akale nimburo notchena mbwenye eto unoza akale nibwe noagwagwadutcha eto nibwe noagwiha.#8:14 Zela atu anamuroromela, Yehova unoza akale nimburo notchena. Eto zela atu abure, Yehova unoza akale nibwe noagwagwadutcha eto nibwe noagwiha. Jatene ejo jinoza jikwakwanele muwari mwa Yesu Kiristu. Tchoira atu amohi anoza kavulusiwe mwa Yesu eto amohiwa anoza kagudjuliwe na liye. Nione 1 Peduru 2:6-8; Lukaji 2:34; Roma 9:33; Matewuji 25:32,33. Wa atu anakala Jeruzalemu, Yehova unoza akale nnga yengo yoazelana makatamiho eto nnga ratuwero. 15Eto adjindji anoza kagwagwaduwevo. Anoza eto kagwe, kakotoliwe. Anoza kamange, kahindiwe.>>
16Umangihe pama umboniyo. Ufungihevo mafundjihelo ala ira kakale na anamadiharaga. 17Miyo nnamudediha Yehova wenno unatawiha kovaye wa nlogo naye na Jako. Miyo nnamunyindela liyene ve. 18Kaing'anani miyo na ahimaga Yehova udivahile liye nirumiwe na Yehova wa Makuru Matene wenno unakala mwango Siyawu ira nikale jionihedo#8:18 miyo na ahimaga… nirumiwe… ira nikale jionihedo: Fwanyeya ira Izaiya ali mutu olaleya eto ahimaye muwari mwa maziniwa, katonyiheda jafuna aireyela aIzarayeli. Nione 7:3, 8:3. eto nikale joonelrihamo muwari mwa Izarayeli.
19Eto atu kauwandelani ira: <<Mudowe mwaafuke aliba wombeza makanga na aliba tapanya na azimu na akwiri anno anawongela muwari muwari eto ananong'ona>>, kodi nyo kamunna zelru donvepa Mulugu wenyu? Kodi vinowandeya afukaga ale kakwile ira kaakamihede ale kaliwo? 20Muumbuwele mafundjihelo a ibaribari na umboni wa Yehova! Akala aliwa kinafuna wonga molingana na mazu anna, muwari mwa aliwa kamulive moneya. 21Anoza kawendawendege ilambo muwari mwa goyi didjindji kaganna ndala. Na mwasa wa ndala yenno, anoza katakaleliwe, kaing'anege zulu, kamutembelrelrege mwene wewa eto kamutembelrelrege Mulugu wewa. 22Mbwenye aliwa kaing'ana ilambo ya vati, anaonege goyi na isi yowopiha yogomiha niso yozela kumbanya wewa. Anoza kavokediwe muwari mwa isi yohokala ya masika.
Currently Selected:
Izaiya 8: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
