Ezodu 40
40
Mulugu ohomuruma Mozeji ira aimetche Musasa wa Yehova
1Yehova ohowonga na Mozeji eraga: 2<<Nafiya siku noroma na mwedi oroma, ukunge Musasa wa Yehova wenno unaitaniwa eto Musasa Ogumanamo. 3Wamala kunga musasa ule, uvolotchihe Kaxa ya Umboni. Amala ukunge kurtina yogawa Nimburo Notchena na Nimburo Notchenetchetcha sogolro uwa ira kurtina ile ibarele Kaxa ile. 4Wamala utukule meza, uvolotchihe mwemule, amala utandevo jofuneya jatene ja meza ile. Era eno, uvolotchihe yogoromeyavo panti ile, amala uhelevo panti diwa. 5Era eno, uvolotchihe ibuwa yotumeyavo jonukela ya oru ile, uhele sogolro wa Kaxa ya Umboni ira utumeyegevo jonukela. Eto ukunge kurtina ya va mulango va musasa vale. 6Amala utukule ibuwa yotumeya mukuto, uhele unde, sogolro wa mulango wa Musasa Ogumanamo ule. 7Vari va Musasa Ogumanamo na ibuwa yotumeya mukuto, uhelevo basiya eto basiya nne uzalihe na mahindje. 8Amala ukunge makurtina owerewera ntando. Era eno ukunge kurtina ya va mulango.
9<<Wamala eno, utukule makura otchenihana jengo, uhele musasa ule vamohi na jengo jatene jinafwanyeya muwari mwa musasa mule, utchenihe jatene. Evale jatene jinokala jotchenihiwa. 10Eto wamala uhele makura ibuwa ya mukuto otumeya vamohi na fwaramento diwa datene. Utchenihe ibuwele ira ikale yotchenetchetcha. 11Eto uhele makura basiya vamohi na ntiwa niwa eto utchenihe.
12<<Amala umutukule Arawu vamohi na ahimaye a alombwana, waazena va mulango va Musasa Ogumanamo, era eno, waahuwe na mahindje. 13Wamala umuwarihe mulombwana Arawu jowara jotchenihiwa, umuhele makura, amala umutchenihe ira ahindege mabasaga a unamakuta. 14Amala waazena ahimaye, waawarihe bata. 15Wamala awariha, waahele makura na makalelo nnga umuhenle we babiwa ule ira kalabege mabasaga a unamakuta. Aliwa heliwa wewa makura unafuna ulabe ira kalabege mabasaga a unamakuta kala no kala, roma aliwa vamohi na ahimiwa atene anabaliwelegemo musogolro.>>
Imetchiwa wa Musasa wa Yehova
16Evale mulombwana Mozeji ohoirana jatene nnga mwemo mwamuwandenle Yehova. 17Siku noroma na mwedi oroma wa yaka yanembinli, Ana Izarayeli kohoimetcha Musasa wa Yehova. 18Mozeji ohoimetchaga musasa watene, liye roma tanda matiwa, nomala liye imeliha matabwa, volotchiha mawongolo no imeliha mambozo. 19Nomala eno, ohokunga yokunelana yoroma ya Musasa vazulu va matabwale. Evale liye ohokunela jatene na jokunelana jiwa nnga mwemo Yehova mwamurumele liye mulombwana Mozeji.
20Ohotukulaga eto mabwe a Umboni ale, liye dowa hela muwari mwa Kaxa ya Umboni ile, liye tukula jimiri jotembana, viriha muwari mwa maaneli ale. Nomala eno, ohotukulaga Tampa Yosembeselrana ile, liye kunelanavo. 21Nomala eno, ohovolotchiha Kaxa ile mmusasani mule, liye kunga kurtina yogawa Nimburo Notchena na Nimburo Notchenetchetcha vasogolro va Kaxa ya Umboni ile nnga mwemo Yehova mwamurumele liye mulombwana Mozeji. 22Nomala eno, ohotukulaga meza, liye dowa hela mMusasani Ogumanamo mule, sogolro wa kurtina ile, pandi ya norti. 23Eto ohotukula pawu dedo nnatapulela ira Yehova uli vamohi na atwaye, liye tanda vameza vale vamentoni va Yehova, nnga mwemo Yehova mwamurumele liye mulombwana Mozeji.
24Ohotukulaga eto yogoromeyavo panti ile, dowa hela sogolro wa meza muwari mwa Musasa Ogumanamo mule, pandi ya suli. 25Nomala eno, ohindiha panti dile vamentoni va Yehova nnga mwemo Yehova mwamurumele liye mulombwana Mozeji.
26Nomala eno, ohotukulaga ibuwa ya oru yotumeyavo jonukela ile, liye dowa hela muwari mwa Musasa Ogumanamo, sogolro wa kurtina ile. 27Noira eno, ohotumeya jonukela vaibuwani vale nnga mwemo Yehova mwamurumele liye mulombwana Mozeji.
28Ohokunga eto kurtina ya va mulango va Musasa wa Yehova vale. 29Nomala ohotukulaga ibuwa ya mikuto dotumeya, liye dowa hela sogolro wa mulango wa Musasa Ogumanamo ule, liye velelavo mukuto otumeya na yovelela yotumeya, nnga mwemo Yehova mwamurumele liye mulombwana Mozeji.
30Nomala eno ohotukulaga basiya, liye dowa hela vari va Musasa Ogumanamo na ibuwa, liye zaliha na mahindje ira kavihuwegena. 31Mahindje anne kalaba ira mulombwana Mozeji na Arawu vamohi na ahimaye kahuwegena mandiwa vamohi na manyalo ewa. 32Aliwa kavolowaga mMusasani Ogumanamo mule, nari kadowaga ira kalabe vaibuwani, kababiha vihuwa nnga mwemo Yehova mwamurumele liye mulombwana Mozeji.
33Nomala eno ohobarela na makurtina ntando natene nawerewera musasa vamohi na ibuwa. Eto ohokunga kurtina va mulango wa vatando vale. Mwa enne Mozeji ohomariha mabasa matene.
Murambo ohozala muwari mwa Musasa wa Yehova
34Mwa enne Musasa Ogumanamo ule agamanle imetchiwa, ohozaga murambo, za kunela Musasole. Eto mmba mwa Musasole mohozala undimuwa wa Yehova. 35Mwa enne, Mozeji kawandile volowa mmba mwa Musasa Ogumanamo mule na mwasa wa murambo afwanyeya agakunenle Musasole eto na mwasa wa undimuwa wa Yehova wazanle mmba mule.#40:35 Agali kaniiziwile makalelo anna undimuwa wa Yehova wenno azanle mmba mwa Musasa wa Yehova mule, inoiziweya ira yali yengo yowopiha fiyeda ira Mozeji kawandile volowa. Za wa undimuwa wa Yehova watonyiheda ira Mulugu orumela mabasa omanga Musasa ule eto liye erege kala na aIzarayeli muwari mokala mMusasani emule. Tcheniyo imohive yaireyile vamanle aIzarayeli manga Nyumba ya Yehova. (1 Amwene 8:10-11) Sawasawa siku nazilege Munemba Otchena, johokala jionihedo jaireya jotonyiheda ira tempu ili hiyo ila Mulugu kanakala muwari mwa musasa nne nyumba mbwenye unakala muwari mwa atwaye omuroromela Yesu. (Joira ja Anamarumiwa 2:1-11; 1 Korinto 3:16,17, 6:19)
36Muulrendoni mwewa mwatene, murambo vavenya liye vaMusasani va Yehova vale asuselaga zulu, Ana Izarayeli komaruwa, aliwa roma haraga murambole. 37Mbwenye murambole akalave oimelene, na aliwene tchadowa sogolro, fiyeda siku nafuna venyavo murambo ule. 38Murambo wa Yehova ule afwanyeya vazulu va Musasa wa Yehova. Na mahiyu mmuramboni mule mohinda munlo. Muwari mwa ulrendo wewa watene aIzarayeli atene koonetcha murambo na ntana eto na mahiyu koonetcha munlo.
Kukala mazu a livuru na Ezodu.
Currently Selected:
Ezodu 40: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
