Ezodu 39
39
Sakanyiwa wa jowara ja unamakuta
1Kohotukula usalru wa kore ya matamba, usalru wa kore ya musuzu wa bwanda, na usalru ofila, aliwa sakanyana jowara josakanyiwa na uyesa ira anamakuta kawarege kadowaga laba Nimburo Notchena. Kohosakanya jowara jotchenihiwa ira Arawu awarege nnga mwemo Yehova mwamurumele liye mulombwana Mozeji. 2Kohosakanya eto kuleti ya unamakuta na usalru wa kore ya matamba, usalru wa kore ya musuzu wa bwanda, na usalru ofila, na nguwo yosakanyiwa na usalru wapama, vamohi na oru. 3Kohotukula oru, aliwa bubuda fiyeda kala opepeya pama. Nomala eno, kohogwada vang'ono vang'ono ira ikale nnga usalru wa oru. Evale kohotukula usalru wa oru ule, aliwa roma luwa vamohi na usalru wa kore ya matamba, usalru wa kore ya musuzu wa bwanda, na usalru ofila. Evale kohotukula nguwo yosakanyiwa na usalru wapama, aliwa roma sonela usalru ule vanguwoni vale ira nguwo ile ikale yolrembeya lrembeya. 4Kuleti ile yohogumanihiwa mmafudini ira sogolro na unduli ikale yengo imohive. 5Sintu nolrembeya lrembeya nafuna mangeleliwaga mmwinini, nali nguwo imohive na kuleti ile. Kohotukula nguwo yosakanyiwa na usalru wapama, aliwa sonela vanguwoni usalru wa oru, usalru wa kore ya matamba, usalru wa kore ya musuzu wa bwanda, na usalru ofila nnga mwemo Yehova mwamurumele liye Mozeji.
6Eto kohotukula mabwe menli ofuneyetchetcha anaitaniwa onikisi, aliwa wariha jofungihana ja oru. Evale koholrembavo mazina a ahima a anapongwe a mulombwana Izarayeli na makalelo nnga analabetcha aliba lremba vamabweni kasakanyaga karimbu. 7Evale mabwe ale kohofungiheda mmafudini mwa kuleti ya unamakuta ile ira Ana Izarayeli kaumbuweliwege, nnga mwemo Yehova mwamurumele liye mulombwana Mozeji.
8Kohosakanya eto yowara ya vamirimani na makalelo amohive nnga mwasakanyele atu kuleti ya unamakuta. Yali yolrembeya lrembeya eto kasakanyile na nguwo yosakanyiwa na usalru wapama, nomala aliwa sonela vanguwoni vale na usalru wa oru, usalru wa kore ya matamba, usalru wa kore ya musuzu wa bwanda, na usalru ofila. 9Yowara ya vamirimani ile yali nguwo yovinda, aliwa kalamo mbinli eto rambalala uwa no lapa uwa ali umohive, agali ndanda nimohi bahi. 10Vayowarani ya vamirimani ile, kohofungihedavo mabwe ofuneyetchetcha malinya mannayi. Linya noroma nanna mabwe mararu anaitaniwa saridiyu, topaziyu na karibunkulu. 11Linya nanembinli nanna mabwe mararu, anaitaniwa ejimeralda, safira na diyamanti. 12Linya naneraru nanna mabwe mararu, anaitaniwa jasintu, agata na ametisata. 13Linya nanennayi nanna mabwe mararu anaitaniwa berilu, onikisi na jaspe. Mmambalo mwa mabwe mule kohowarihamo jofungihana ja oru. 14Mabwe matene kali kumi na menli. Kada nibwe noholrembiwa nzina nimohi na ahima a anapongwe a mulombwana Izarayeli. Kada nibwe nalrembiwe nzina nimohi na makalelo nnga karimbu, fiyeda mabwe kumi na menli, molingana no indjiva wa malogo a Ana Izarayeli.
15Kohosakanya eto makolare oriteya nnga ngohi, kagali a oru ohogumanihiwa na yengo imohiwa, aliwa sonela vayowarani ya vamirimani ile. 16Kohosakanyaga jofungihana mbinli ja oru na maaneli menli a oru. Maaneli menli ale, kohela zulu wa yowara ya vamirimani ile, aneli mmohi mwendo wa wu, mmohiwa mwendo wa wu. 17Evale koviriha makolare menli a oru ale muwari mwa maaneli menli ale, anno anakala mmwendoni mwa yowara ya vamirimani ile. 18Evale kogumaniha mmakomoni mwa makolare menli ale na jofungihana mbinli ja mmafudini mwa kuleti ya unamakuta ile.
19Kohosakanyaga eto maaneli amohiwa menli a oru, aliwa hela vati va yowara ya vamirimani ile, aneli mmohi mwendo wa wu, aneli mmohiwa mwendo wa wu, maaneli ale aliwa abandiha muwari mwa yowara ya vamirimani wandamelana kuleti ya unamakuta. 20Nomala eno, kohosakanya eto maaneli mamohiwa menli a oru, aliwa hela vakuletini ya unamakuta vevo vinagumana nguwo dokuma vafudi na vobinyalri sintu nolrembeya lrembeya. 21Aliwa kohotukula ngohi wa nguwo ya kore ya matamba, aliwa mangiha maaneli a yowara ya vamirimani ile na maaneli a kuleti ile ira yowara ya vamirimani ikale vazulu va sintu nolrembeya lrembeya. Ali ira yowara ya vamirimani yahamwalanege na kuleti ya unamakuta nnga mwemo Yehova mwamurumele liye Mozeji.
22Evale kohotukula nguwo ya kore ya matamba bahi, aliwa sona kapa ira iwariwege muwari mwa kuleti ya unamakuta. 23Kapa ile yohokana mulango ovolotchihelavo muru. Mulango ule mmambalo muwa kobinyalrimo nnga ha kamiza ira yahakauwege. 24Nomala eno kohotukula usalru wa kore ya matamba, usalru wa kore ya musuzu wa bwanda, na usalru ofila, aliwa luwana jofwalrafwaniha ja jovaha jinaitaniwa romaya, aliwa tukula jofwalrafwaniha jile, sonela mmagomo mwa kapa pandi ya vati. 25Eto kohotukulaga oru ohogumanihiwa na yengo imohiwa, aliwa sakanya belro ding'ining'ini. Evale kohela belro dile magomelo wa kapa, vari va jofwalrafwaniha ja romaya jile. 26Ku wonga jatandeyile eni: mwana belro imohi, amala eno romaya imohi, amala mwana belro imohi, amala romaya imohi, dowagave eno fiyeda rungunuwa kapa ya unamakuta ile nnga mwemo Yehova mwamurumele liye mulombwana Mozeji.
27Eto aliba sona kohotukula nguwo yosakanyiwa na usalru wapama, aliwa sakanya bata ya mulombwana Arawu vamohi na bata da ahimaye ira kawarege. 28Nomala eno kohotukula nguwo yosakanyiwa na usalru wapama, aliwa sakanya tchapowa wa unamakuta, na atchapowa amohiwa vamohi na akabudulra ira kawarege muwari muwari. 29Eto kohotukula nguwo yosakanyiwa na usalru wapama, aliwa sonela vanguwoni vale usalru wa kore ya matamba, usalru wa kore ya musuzu wa bwanda, na usalru ofila ira ikale yolrembeya lrembeya, aliwa sakanyana sintu nnga mwemo Yehova mwamurumele liye mulombwana Mozeji.
30Eto kohotukula oru ohogumanihiwa na yengo imohiwa, aliwa sakanyana itchapa ya tchapowa otchenihiwa, aliwa lrembavo mazu oira: Otchenihiwa Wa Yehova na makalelo nnga anasakanyeda atu malremba anakala karimbuni. 31Evale kohotukula itchapa ile, aliwa mangelela na usalru wa kore ya matamba sogolro wa tchapowa wa unamakuta nnga mwemo Yehova mwamurumele liye mulombwana Mozeji.
Mala wa mabasa matene osakanya Musasa wa Yehova
32Mwa enne Ana Izarayeli kohomariha mabasa matene a Musasa wa Yehova wenno unaitaniwa eto Musasa Ogumanamo. Na ibaribari aliwa kohoirana jatene nnga mwemo Yehova mwamuwandenle liye Mozeji. 33Evale kohotukula Musasa ule vamohi na fwaramento diwa datene, aliwa dowana wa mulombwana Mozeji, roma jokokihana jiwa, matabwiwa, mawongoluwa, mambozuwa vamohi na matiwa, 34yokunelana yosakanyiwa na matembe a mabila okulruziwa, kagali ofilihiwa vamohi na yokunelana yosakanyiwa na matembe ojajala, vamohi na kurtina yogawa Nimburo Notchena na Nimburo Notchenetchetcha, 35Kaxa ya Umboni vamohi na jimiri jiwa jotembana eto vamohi na Tampa Yosembeselrana, 36meza yohelavo pawu vamohi na fwaramento diwa datene, vamohi na pawu dedo nnatapulela ira Yehova uli vamohi na atwaye, 37yogoromeyavo panti yosakanyiwa na oru ohogumanihiwa na yengo imohiwa, vamohi na panti diwa dene, vamohi na fwaramento diwa datene, na makura ohela mpantini mule, 38ibuwa ya oru vamohi na makura otchenihana jengo vamohi na jonukela jinatumeyiwa, vamohi na kurtina ya va mulango va musasa vale, 39ibuwa ya mukuwa vamohi na yotumeyavo mukuto yoluweya nnga ntavi yagali ya mukuwa, jimiri jotembana jiwa, na fwaramento diwa datene, na basiya na ntiwa niwa, 40makurtina a ntando, na mambozuwa na matiwa ewa, na kurtina ya va mulango wa vatando, na mingohi diwa, na peregu dolimbiha vati, na fwaramento datene da Musasa wa Yehova wenno unaitaniwa eto Musasa Ogumanamo, 41na jowara josakanyiwa na uyesa, roma jowara jotchena ja Arawu na jowara ja ahimaye ira kawarege kadowaga laba mabasa a unamakuta nimburo Notchena.
42Ana Izarayeli kohomala laba mabasa matene a Musasa wa Yehova nnga mwemo Yehova mwamurumele liye Mozeji. 43Evale Mozeji ohoing'ana musasole. Againg'anne ohoona ira aliwa kalabile mokwakwanela nnga mwemo Yehova mwamurumele liye. Evale Mozeji oharelihaga aIzarayeli.
Currently Selected:
Ezodu 39: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
