Detoronomiyo 1
1
Mozeji ohawumbutcheda aIzarayeli jengo jaireyile wanle
1Ala ba mazu Mozeji awongile liye na aIzarayeli atene kahanalambuwe muhindje Jordawu, kagali muisalesaleni, ilambo ya Araba sogolro wa ntiya na Sufe, vari va Parani na Tofeli vamohi na Labani na Hazeroti vamohi na Di-Zaabe.#1:1 Parani na Tofeli vamohi na Labani na Hazeroti vamohi na Di-Zaabe. Mazina matene anawongiwa veva ba mazina a mamburo. So kaniiziwile pama vinafwanyeya vilambo dedo eto kaniiziwile akala dikana atu ante peno. 2Kuma Orebi, mutu ahara ndila ya mwango wa Seyire para fiya Kadeji-Barneya,#1:2 Kuma Orebi… para fiya Kadeji-Barneya: Orebi ti nzina nimohi niwa para mwango Sinayi wewo aIzarayeli wawatchenle atu malamulo. (Detoronomiyo 4:5) Kadeji-Barneya tchi ilambo yafiyile Ana Izarayeli tempu yadowa aliba wendelela. Kadeji-Barneya inafwanyeya wandamelana Kana ilambo yenno yadowa atu. Ku wonga ahakale aIzarayeli kanvwelela Mulugu, aliwa tchadibeliwa muisalesaleni. Kahakale atu onvwelela Mulugu, kamala malambo kumi na nimohi bahi ira kakume wavahiwe atu malamulo ira kavolowe ilambo ya Kana. Mbwenye aliwa kohofiyeda yaka 38 kawendawendagave muisalesaleni para fiya Kana na mwasa ohonvwelela Mulugu. (Detoronomiyo 2:14) unamala malambo kumi na nimohi bahi.
3Fwanyeya ira aIzarayeli kagakumile ilambo ya Ijipitu vohomala yaka 40. Mwa enne, mwedi wanekumi na mmohi, siku noroma na mwedi wenne, mulombwana Mozeji ohawandelaga atu atene zela jengo jatene jamuwandenle Yehova ira aawandele aIzarayeli. 4Tempu yawonga liye na aIzarayeli yali kagamanle mugondjiha Seyoni mwene wa aAmore wenno akala Ejiboni, na Oge mwene wa Bazani wenno akala sidadi ya Astaroti na sidadi ya Edereyi. 5AIzarayeli kagali mwilamboni mwa Mowabe, kahanalambuwe muhindje Jordawu, Mozeji ohoroma awandela mazu a malamulo ala eraga: 6<<Nagali Orebi,#1:6 Nagali Orebi: Va mulombwana Mozeji unaawumbutcheda aIzarayeli zela yengo yaireyile yaka 38 da mundulri kagali mwango Sinayi wewo wawatchenle atu malamulo. Tchoira mazina amenlene Orebi na Sinayi anawonga mwango mmohive. Yehova Mulugu wehu ohoniwandela eraga: <Tempu mumanle nyo mwangoni uno ikwakwana. 7Murungunuwe, mumaruwe ira mudowege ilambo ya mwango didjindji ya aAmore vamohi na vilambo dewa dowandamelana romela ilambo ya Araba, ilambo ya mwango didjindji, ilambo ya mikuma ding'onong'ono na ilambo ya Negebe na tcherela ya bara ku wonga ilambo ya akuda Kana na Libano fiyeda muhindje mundimuwa Eufarati.#1:7 fiyeda muhindje mundimuwa Eufarati: Vilambo datene nnawongiwa va ti vilambo dedo Mulugu alumbenle liye avaha ahima a mulombwana Abarahamu. Nione Jenesesi 15:18. 8Tchoira ilambo yatene yenna dihimala uvahedani ira vasogolro ikale yenyu. Mumaruwe, mudowe mwatukule ilambo yenno miyo Yehova dalumbenle miyo na makolo enyu Abarahamu, Izaki na Jako ira daavahe aliwa vamohi na ahimiwa a musogolro.>
Mozeji ohawumbutcheda aIzarayeli zela hambihiwa wa asogolrelri
9<<Eto tempu yenno yali hiyo Orebi, miyo dohouwandelani diiraga: <Miyo meka kannawanda usogolrelrani. 10Tchoira Yehova Mulugu wenyu uhuindjivihani. Nyo peno muli atu oindjivetchetcha nnga nyenyedi da zulu. 11Eto Yehova Mulugu wa makolo enyu auindjivihegenive fendo 1.000 kwaranya makalelo muindjivenle nyo peno eto aurelihegenive nnga mwemo mwapanganile liye na nyo. 12Nona miyo meka kannawanda tonga milandu denyu, makani enyu na jogudulana jenyu. 13Nnafuna mwaasakulre muwari mwa kada nlogo alombwana a toto, oiziwetchetcha vamohi na atu okana iwandelo yotonga na wanle ira kakale andimuwa enyu.> 14Evale miyo dagawongile mazu anno, nyo mohodiwakulaga muiraga: <Mazu muwongile nyo kohokala pama. Hiyo nnoirana.> 15Mwa enne miyo dohatukula andimuwa a kada nlogo, anno kafwanyeya kagali alombwana a toto eto okana iwandelo yotonga na wanle, miyo ahambiha ira kausogolrelregeni. Amohiwa aliwa kala andimuwa osogolrelra mavande 1.000, amohiwa osogolrelra mavande 100, amohiwa osogolrelra mavande 50 eto alombwana amohiwa osogolrelra mavande 10. Amohiwa daavahile ira kakale andimuwa otonga a kada nlogo. 16Eto jagaireyile enne tempu imohive miyo doharuma anamatonga enyu daawandelaga ira: <Muvuruwanege makani matene a abalinyu eto mwatongege mwapama mutu na mbalaye eto vamohi na atu oza anno anafwanyeya muwari mwa nyo. 17Mwatongaga, kamukayena nsakulro. Masiki kala andimuwa nari atu ohokala andimuwa, matongeluwa kakalege mamohive. Eto mwatongaga, kammuovege mutu, mwasiwa mwinnya unatonga gu Mulugu.#1:17 kammuovege mutu, mwasiwa mwinnya unatonga gu Mulugu: Mazwala anoniwandela ira makalelo otonga mowatchela kunya tchi yengo yotakala vamentoni va Mulugu. Tchoira anamatonga kohokana mabasa ofiyiheda matongelo a Yehova Mulugu. Sawasawa nnga Yehova kanawatchela kunya eto kanabalra riya wa mutu nne rayela wa mutu, inafwanela eto anamatonga katongege na makalelo amohive anno. Mbwenye mwaona muselu orutcha, muzegena wa miyo. Mwazana, miyo nnotonga.> 18Mwa tempu yenne miyo dohomala uwandelani jatene jene mwafunege nyo ira.
Mozeji ohawumbutcheda aIzarayeli zela ale kakondile volowa ilambo ya Kana
19<<Evale hiyo nohomaruwaga mwango Orebi niwendaga isalesale ilukulu yowopiha yenno ionne nyo, niharaga ndila ya ilambo ya mwango didjindji ya aAmore nnga mwemo Yehova Mulugu wehu anirumele liye. Noira enne, nohofiya Kadeji-Barneya. 20Nagafiyile wewule, miyo dohouwandelani diiraga: <Nyo eni muhumala fiya ilambo ya mwango didjindji ya aAmore, yenno Yehova Mulugu wehu unafuna liye nivaha. 21Yehova Mulugu wenyu uhumala uvahani ilambwela ira vasogolro ikale yenyu. Mumaruwe, mudowe mwaitukule nnga mwemo muuwandenleni Yehova Mulugu wa makolo enyu. Nyo kamuove nne kamurendjeye!>
22<<Miyo dagamanle wonga mazu anne, nyo mohozaga difwanya, muwongaga muiraga: <Inafwanela naarumeni atu ira kadowe sogolro, kawendelele ilambwele, amala kaze kaniwandele ndila inafuna hiyo hara para dowa wana na aliwa eto kaniwandele sidadi dedo nnafuna hiyo dowa.> 23Evale miyo dagavwile mazu mwawongilege nyo, dohoonaga nnga apama. Evale dohasakulra muwari mwa nyo alombwana kumi na ambinli, kada nlogo mulombwana mmohi. 24Aliwa kohomaruwaga, aliwa dowa gwela ilambo ya mwango didjindji, aliwa fiya ndabo na Eskoli, aliwa dowa wendelela makalelo matene a wewule. 25Eto kohotukulaga jovaha ja mwilamboni mule,#1:25 jovaha ja mwilamboni mule: Nafwanya Numero 13:24, nnovwa ira jovaha jiwa ali uva na jovaha ja mufigera na jovaha jimohi jiwa jokala nnga magiyawu jaitaniwa romaya. kumana wewule, aliwa zana wa hiyo, aliwa niwandela makalelo matene kaonne atu wewule eto kohowonga keraga: <Ilambo inafuna nivaha Yehova Mulugu wehu, inafwanyeya yagali ilambo yapama.>
26<<Nyo mbwenye mwagavwile enne, kamwafunile dowawo. Mohoruniha jauwandenleni Yehova Mulugu wenyu. 27Mohoroma muwamba Yehova mmisasani mwenyu muiraga: <Yehova anikumihile mwilamboni mwa Ijipitu ira anivahede mmandani mwa aAmore ira kanitolotche, mwasiwa liye unoniida. 28Kodi hiyo nnafuna nidowe waani? Tchoira abalihu kohoninyungulrutcha mirima dehu kaniwandelaga keraga: <<Atu anafwanyeya wewule ba atu a kopolo eto atu olapa nikwaranya hiyo. Eto sidadi dewa nnafwanyeya dagali sidadi dilukulu eto dolimba, dokana muru fiyeda zulu. Eto wewule nahaona atu alukulu akuda Anaki.>> >#1:28 akuda Anaki ali nlogo nimohi eni kagali atu alukulu. Nione Numero 13:33. 29Mbwenye nyo mwagawongile mazu anne, miyo dohouwandelagani diiraga: <Kamukukumuwe eto nne kamwaove. 30Tchoira Yehova Mulugu wenyu, wenno unakala vasogolro venyu, unerege wana vamalroni venyu nnga jauireleni liye Ijipitu muing'anaga na meso enyu, 31eto nnga jauireleni liye muisalesaleni mmuonaga Yehova Mulugu wenyu autukulagani auwendihagani ndila yatene nnga mutu amutukulaga mwanaye, ante nyo fiya nimburo neni.> 32Mbwenye masiki eno, nyo kamwafunne muroromela Yehova Mulugu wenyu 33wenno akala vasogolro venyu muwari mwa ndila denyu datene auvendelagani mamburo anno vafuna nyo kunga misasa dinyu eto na mahiyu ausogolrelragani na munlo, auonihagani ndila yenno yafuna nyo hara eto na ntana ausogolrelragani na murambo.>>
Mozeji ohawumbutcheda aIzarayeli makalelo Mulugu aatongile liye ale kakondile volowa Kana
34Mozeji ohowongagave eraga: <<Mwa enne Yehova agavwile mazu enyu mwawonga nyo, ohotakaleliwa, liye lumbela eraga: 35<Atu a tempu yenna ba atu abure. Nona muwari mwa atu a tempu yenna, kalivo nne mmohi unafuna ona ilambo yapama yenno ilumbenle miyo avaha makolo enyu. 36Mulombwana Kalebi mwana Jefoni mbwenye unoona ilambo yenno.#Numero 14:30,38, 26:65 Eto ilambo yenno inyinganle liye, nnonvaha liye vamohi na ahimaye. Tchoira liye ulive olimbene muwari momuhara Yehova na mmirimani mwaye mwatene!>
37<<Eto Yehova ohotakaleliwa zela miyo na mwasa wenyu, liye ira: <Na wenne ilambo yenno kunavolowa.#1:37 Yehova ohotakaleliwa zela miyo na mwasa wenyu: Fwanyeya ira mulombwana Mozeji muwari mowaheyana joira ja aIzarayeli, ohofiyeda mwezo otakaleliwa, liye mutegela Mulugu muwari mwa joira jaye na jowonga jaye. (Numero 20:2-13) 38Mbwenye Jozuwe mwana Numi wenno unafwanyeya agali nkamihedi wawo, liye gunafuna volowa ilambo yenno ilumbenle miyo. Umulimbihe, tchoira liye gunafuna dowa asogolrelra aIzarayeli ira kafiyede watchela ilambo ira ikale yewa.> 39Mulugu eto ohowonga na atu okonda volowa, liye ira: <Zela ahiminyu anno mwawonga nyo muiraga: <<Anerege tukuliwa na amwidani, kaonihiwege goyi>>, ahiminyu anno peno kahaiziwile yapama nne yabure, aliwa banafuna volowa. Eto miyo nnoavaha aliwa ilambwele ira ikale yewa. 40Mbwenye nyo murungunuwe, muwelele muisalesaleni, ndila yodowa Bara Yofila.>
41<<Nyo mbwenye mwagavwile mazu anno mohodiwakulaga muiraga: <Hiyo nihimutegela Yehova. Nnovenya nidowe, nawane nnga mwemo Yehova Mulugu wehu aniwandenle liye.> Mwa enne mohokozeyaga, kada mutu liye tukula yowanana yaye, nyo funaga ira mumaruwe, mwagwele ilambo ya mwango didjindji ira mwawane. 42Mbwenye Yehova ohodiwandelaga eraga: <Kaawandele atwayo ira: <<Kamudowe kondoni, nne kamuwane, tchoira miyo kadili na nyo. Mwadowa, munagomela piwa na amwidaninyu.>> >#1:41-42 nidowe, nawane nnga mwemo Yehova Mulugu wehu aniwandenle liye: Fwanyeya ira twaruwa wa aIzarayeli kwaali wa ibaribari mbwenye ali muwari momutonga Mulugu. Tchoira aliwa tchanfukile Mulugu yafuna atu ira. Mwa enne aliwa kafunaga nnga kadowe kawane, Mulugu mbwenye karumenle. Nona Mulugu ohowonga ira: Mwadowa, munagomela piwa na amwidaninyu. 43Yehova agawongile mazu anne, miyo dagauwandenleni, kamwafunile vwa. Mohoruniha jauwandenleni Yehova, nyo roma vitukulelaga. Evale mohomaruwa, nyo dowa gwela ilambo ya mmwangoni ira mwawane. 44Mwa enne aAmore anne kakala ilambo ya mwango didjindji ile kohomaruwaga, aliwa za gumana na nyo, aliwa roma utamangihani kalaga nnga nuwi damutamangihaga mutu. Evale aliwa kohougondjihani romela Seyire ante Horima. 45Mbwenye muwelagawo munlaga wa Yehova, Yehova kavuruwanile nizu nenyu, nne kaubanlreni. 46Evale nyo mohomala malambo madjindjene mwagali Kadeji.>>
Currently Selected:
Detoronomiyo 1: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
