Ezodu 38
38
Sakanyiwa wa ibuwa ya mikuto dotumeya
1Bezaleli ohotukula matabwa a mukexa, liye sakanyana ibuwa ya mukuto otumeya. Lapa uwa no rambalala uwa ali sawasawa, wagali mameturu menli na masentimeturu 20 eto regama uwa ali meturu imohi na masentimeturu 30. 2Noira eno, komo dannayi dene da ibuwele, matabwa kali mmwendoni, ohosema manyanga. Evale ohotukula mukuwa, liye kunelana ibuwa yatene. 3Eto ohotukula mukuwa liye sakanyana fwaramento datene dolabana vaibuwani vale, romela jogudana ndora, paya, mabasiya, magarfu malukulu na matijela otukulana makalra ohinda. 4Ohotukula eto mukuwa, sakanyana yotumeyavo mukuto yoluweya nnga ntavi. Yotumeyavo mukuto ile yofiya vari va ibuwa. 5Ohonyungulrutcha mukuwa, liye sakanyana eto maaneli mannayi malukulu, liye dowa hela mmwendoni mwannayi mwene mwa yotumeyavo mikuto ile ira jimiri jotembana jivolotchihiwe muwari mwa maaneli ale. 6Ohosemaga eto jimiri jotembana mbinli ja matabwa a mukexa eto ohokunela na mukuwa. 7Nomala eno, ohotukulaga jimiri jile dowa volotchiha muwari mwa maaneli kali mmambalo mwa ibuwa ira iwandege tembiwa. Ibuwa yatene yasakanyiwe na matabwa eto muwari muwa mule, mwalive pawo bahi. 8Eto ohotukula maxupelyo a mukuwa a ahiyana anno kalaba va mulango va Musasa Ogumanamo, liye sakanyana basiya na mukuwa vamohi na ntiwa niwa na mukuwa.
Sakanyiwa wa ntando na Musasa wa Yehova
9Bezaleli ohosakanyaga jobarelana ja vatando va Musasa wa Yehova. Jobarelana jiwa jali makurtina osakanyiwa na usalru wapama. Ikukuru ya suli, lapela wa makurtina ali mameturu 44. 10Eto wafwanyeya mambozo 20 na matiwa 20, jatene jagali ja mukuwa. Mbwenye jokokihana ja mambozo ale na jolimbihana jiwa jali ja parata. 11Eto ikukuru ya norti, lapa wa makurtina ali mameturu 44. Wafwanyeya mambozo 20 vamohi na matiwa 20, jatene jagali ja mukuwa. Eto jokokihana ja mambozo ale na jolimbihana jiwa jali ja parata. 12Rambalala wa ntando ikukuru ya mavirelo wa nzuwa, kali makurtina okwakwana mameturu 22. Mambozuwa kali kumi eto matiwa kali kumi. Eto jokokihana ja mambozo ale na jolimbihana jiwa jali ja parata. 13Rambalala wa ntando na sogolro, ku wonga ikukuru ya makumelo wa nzuwa, ali mameturu 22. 14Kuma vamwendoni dowa va mulango, vali makurtina okwakwana mameturu 6 na masentimeturu 60 na mambozo mararu na matiwa mararu. 15Eto ikukuru imohiwa ali sawasawa, wali makurtina okwakwana mameturu 6 na masentimeturu 60 na mambozo mararu na matiwa mararu. 16Makurtina matene kawerewerihiwe ntando natene nenne kali osakanyiwa na usalru wapama. 17Matiwa a mambozo ale kali a mukuwa. Mbwenye jokokihana ja mambozo ale na jolimbihana jiwa jali ja parata. Eto jokunelana ja miru nnakala vazulu va mambozo ale jali ja parata. Mambozo matene owerewera ntando kagumanihiwe na jolimbihana josakanyiwa na parata.
18Kurtina kahenle atu va mulango ovolowela ntando nne yali yosakanyiwa na usalru wapama eto yolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila. Lapa uwa ali mameturu 8 na masentimeturu 80 eto lapa uwa dowa zulu ali mameturu menli na masentimeturu 20 molingana no lapa wa makurtina owerewera ntando nne. 19Kurtina ile yalimbihiwe na mambozo mannayi vamohi na matiwa mannayi a mukuwa. Romela jokokihana jiwa na jokunelana ja miru nnakala vazulu va mambozo ale na jolimbihana jatene jali ja parata. 20Peregu datene dolimbiha vati va musasa na peregu dolimbiha vati va kurtina dowerewera ntando, datene dali da mukuwa.
Kontariwa wa jovelela jatene jalabiwena Musasa wa Yehova
21Wu ku kontariwa wa jovelela jatene jamangilena atu Musasa wa Yehova, wenno unafwanyeya eto agali Musasa wa Umboni. Tchoira Mozeji oharuma atu ira kalrembe jengo jatene jasakanyiwena musasa ule. Evale nlogo na aLevi koholrembaga. Muwari molremba mule, asogolrenlre ali mulombwana Itamari mwana namakuta Arawu. 22Bezaleli mwana Wuri, muzula wa Huri, wa nlogo na Juda, ohosakanya jatene Yehova jamuwandenle liye mulombwana Mozeji. 23Bezaleli nkamihedi waye ali Aoliyabe, mwana Ayizamaki, wa nlogo na Dani. Aoliyabe ali mesilri owanda lremba vamabweni no dezenyari jengo jamangile atu. Eto liye owanda tukula nguwo yosakanyiwa na usalru wapama, liye sonelaga vanguwoni vale usalru wa kore ya matamba, usalru wa kore ya musuzu wa bwanda, na usalru ofila ira ikale yolrembeya lrembeya.
24Oru watene kalabilena atu momanga musasa, ku wonga oru watene aveleliwe, ali oru onyemela kilu 1.000 mokwakwanela na mpimo wa vaMusasani va Yehova. 25Parata kavelenle aliba kontariwa atene, ali onyemela kilu 3.421 mokwakwanela na mpimo wa vaMusasani va Yehova. 26Kada mutu okontariwa avelela magarama matanu na nimohi#38:26 magarama matanu na nimohi: MaBibiliya amohiwa anawonga metadi ya sikulu. Sikulu imohi inanyemela wandamelana magarama 12, metadi ya sikulu inatamangela magarama matanu na nimohi. mokwakwanela na mpimo wa vaMusasani va Yehova. Eto akontariwa ali mutu wenne anna yaka dokwakwana 20 dowaga sogolro. Atene kafwanyeya kagali alombwana 603.550. 27Musasa watene amanle sakanyiwa na matiwa 100. Ira kasakanye matiwa 100 a musasa ule, na matiwa a kurtina yogawa Nimburo Notchena na Nimburo Notchenetchetcha, kanyungulrutchile parata okwakwana kilu 3.400. Ku wonga ira kada ntiwa nanyemela kilu 34. 28Kagamanle sakanya matiwa, dohala kilu 21 da parata. Mwa kilu dahanle dile, Bezaleli ohosakanyana jokokihana ja mambozo na jokunelana ja miru nnakala vazulu va mambozo ale eto osakanya jolimbihana jiwa.
29Indjiva wa mukuwa watene aveleliwe, ali kilu 2.425. 30Na mukuwa ule Bezaleli asakanyilena matiwa para mambozo a va mulango ovolowela wa Musasa Ogumanamo, ibuwa ya mukuwa vamohi na yotumeyavo mukuto ya mukuwa, na fwaramento diwa datene da vaibuwani vale, 31matiwa a mambozo kawerewerile ntando natene na matiwa a mambozo a va mulango ovolowela ntando nne, peregu dolimbihana vati va makurtina a ntando vamohi na peregu datene dolimbihana vati va musasa.
Currently Selected:
Ezodu 38: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
