Ezodu 37
37
Sakanyiwa wa Kaxa ya Yopangana
1Mulombwana Bezaleli ohotukula eto matabwa a mukexa, liye sakanyana kaxa. Lapa uwa ali meturu imohi na masentimeturu 10. Rambalala uwa no diha uwa ali masentimeturu 66. 2Nomala eno, ohotukula oru ohogumanihiwa na yengo imohiwa, liye kunelana unde na muwari. Mmilomoni mwa kaxele, ohowereweriha na oru oindivala. 3Eto ohonyungulrutcha oru, liye sakanya maaneli mannayi malukulu, liye dowa hela mmwendoni mwa kaxa ile, pandi imohi maaneli menli, pandi imohiwa maaneli menli. 4Nomala eno, ohosakanya jimiri mbinli jotembana, jagali jimiri ja matabwa a mukexa, liye jikunela na oru. 5Evale ohovolotchiha jimiri jotembana jile muwari mwa maaneli mannayi malukulu kafwanyeya mmambalo mwa kaxa ile ira kawandege temba kaxele mohideda jimiri jile.
Sakanyiwa wa tampa ya Kaxa ya Yopangana
6Noira eno, Bezaleli ohotukula oru ohogumanihiwa na yengo imohiwa, liye sakanya tampa yaitaniwa Tampa Yosembeselrana. Tampele lapa uwa ali meturu imohi na masentimeturu 10, rambalala uwa ali masentimeturu 66. 7Nomala eno, ohotukula oru, liye ahana angelro ambinli aneriwa akerubi, liye ahela makomo amenlene a tampele. 8Kerubi mmohi muhela komoni ya wu, kerubi mmohiwa komoni ya wu. Liye agumaniha akerubi ale na Tampa Yosembeselrana ile ira jatene jikale yengo imohive. 9Akerubi aahanile liye, kafwanyeya kagatapunle mapepeluwa, kagudumeyaga tampa ile, kove diwa kaing'ananaga mmohi na nfwaye, kaing'anaga Tampa Yosembeselrana ile.
Sakanyiwa wa meza yohelavo pawu
10Mulombwana Bezaleli ohosakanya meza ya matabwa a mukexa. Lapa uwa ali masentimeturu 88. Rambalala uwa ali masentimeturu 44. Regama uwa ali masentimeturu 66. 11Nomala eno, ohokunela meza yatene yenne na oru ohogumanihiwa na yengo imohiwa. Eto mminononi mwa meza ile, liye wereweriha na oru oindivala. 12Mmendoni mwa meza ile ohowereweriha na matabwa amohiwa. Indivala wa matabwale ali nnga jibuno nnayi. Nomala eno, okunela matabwale na oru eto ohowereweriha na oru oindivala.
13Eto ohonyungulrutcha oru, liye sakanyana maaneli malukulu mannayi, liye ahela mmendoni mwa meza ile, kada mwendo aneli mmohi. 14Maaneli ale kali wandamelana matabwa owerewera a mmendoni. Kalaba ira jimiri jotembana jivolotchihiwe muwari mwa maaneli ale ira meza ile iwandege tembiwa. 15Eto ohosema jimiri jotembana, jagali ja matabwa a mukexa ira meza ile itembiwege na jimiri jile. Nomala eno, liye ohokunela jimiri jile na oru. 16Nomala eno ohotukula oru ohogumanihiwa na yengo imohiwa, liye sakanyana fwaramento dafuna kalaga vameza, dagali parato na kopo, jaro na mabasiya mang'onong'ono ira kahelegemo jovelela ja jong'wa.
Sakanyiwa wa yogoromeyavo panti
17Mulombwana Bezaleli ohotukulaga oru ohogumanihiwa na yengo imohiwa, liye hana ira ikale yogoromeyavo panti. Yogoromeyavo panti ile yohokana ntiwa niwa, na makopo, na makoko, vamohi na mafoloriwa. Jatene ejo jali johaniwa, aliwa kala yengo imohive. 18Yogoromeyavo panti ile yanna tambi tanu na imohi. Tambi taru ikukuru ya wu, tambi dimohi diwa taru ikukuru ya wu. 19Kada tambi imohi yanna kopo taru dolingana na tondo da mutengo wa amendowa, na nikoko nimohi vamohi na folori imohi. Tambi datene tanu na imohi da yogoromeyavo panti ile, danna makalelo amohive anno. 20Eto vari va yogoromeyavo panti, vohokala kopo nnayi dolingana na tondo da mutengo wa amendowa, daganna makoko vamohi na folori diwa. 21Vati va kada tambi mbinli vamela atu, vohokala nikoko nimohi nohaniwavo. Eto tambi dimohi diwa mbinli, vati viwa vohokala nikoko nimohi eto tambi mbinli dimohi diwa, vati viwa vohokala nikoko nimohi. Ayo ali makalelo kairilena atu vati vamela tambi mbinli, fiyeda kwakwaniha tambi datene tanu na imohi da yogoromeyavo panti ile. 22Ira kasakanyede tambi dile na makoko ale, katukunle oru ohogumanihiwa na yengo imohiwa, aliwa hana ira jatene jene jikale yengo imohive. 23Bezaleli eto ohosakanyaga panti tanu na mbinli na maalikati vamohi na matijela otukulana makalra ohinda. Jatene asakanyile na oru ohogumanihiwa na yengo imohiwa. 24Ira asakanye yogoromeyavo panti ile na fwaramento diwa dene, alabilena kilu 34 da oru ohogumanihiwa na yengo imohiwa.
Sakanyiwa wa ibuwa yotumeyavo jonukela
25Eto ohotukula matabwa a mukexa, liye sakanyana ibuwa yotumeyavo jonukela. Lapa uwa ali masentimeturu 45 eto rambalala uwa ali sawasawa masentimeturu 45. Eto regama uwa ali masentimeturu 90. Komo dannayi dene da ibuwele, matabwa kali mmwendoni, ohosemamo manyanga. 26Romela zulu wa ibuwele, na mmwendoni mwatene, na manyanga ale, ohokunela na oru ohogumanihiwa na yengo imohiwa. Mmilomoni mwa ibuwele, ohowereweriha na oru oindivala. 27Eto ohosakanyedaga maaneli menli malukulu a oru, liye hela vati va oru oindivala ule, aneli mmohi ikukuru imohi, aneli mmohiwa ikukuru imohiwa, liye volotchiha jimiri jotembana jile muwari mwa maaneli ale. 28Ohotukula matabwa a mukexa, liye sakanya jimiri jotembana ibuwele, liye kunela jimiri jile na oru. 29Bezaleli ohosakanya makura otchena anno anafwanyeya kagali makura otchenihana jengo eto ohosakanya jonukela jinatumeyiwa. Asakanyile na makalelo nnga vinaira aliba sakanya makura onukela.
Currently Selected:
Ezodu 37: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
