Ezodu 36
36
1Mozeji ohowongagave eraga: <<Mulombwana Bezaleli na nfwaye Aoliyabe, vamohi na alombwana amohiwa anno Yehova waavahile liye dodolriso no onelramo ira kasakanye jengo jatene ja Musasa wa Yehova, inafwanela aliwa kalabege nnga mwemo Yehova muwongele liye.>>
Amesilri kohovahediwa jovelela jatene ira kasakanyena Musasa wa Yehova
2Noira eno, Mozeji ohomuitanaga Bezaleli na Aoliyabe vamohi na amesilri atene anno Yehova aavahile liye dodolriso dolaba, anno kafuna laba na mmirimani mwewa mwatene. Kagazile, Mozeji ohawandelaga ira karome laba. 3Evale Mozeji ohavaheda jovelela jejo jazana Ana Izarayeli ira kawande labana mabasa a Musasa wa Yehova. Eto va kada mabebehi Ana Izarayeli kozanave wa mulombwana Mozeji jovelela javelela atu mofuna mwewa. 4Mwa enne amesilri olaba mabasa ale kohozaga, 5aliwa wonga na mulombwana Mozeji keraga: <<Atu anosimbwa zana jengo jidjindji kwaranya jejo jinafuneya para mabasa aniwandenle Yehova.>>
6Evale mulombwana Mozeji, oharuma atu ira kadowe kaahiyihe. Mwa enne atu atene kohowandeliwaga muwari mwa tatamo da misasa diwa ira: <<Jovelela jihikwakwana. Kuma peno dowa sogolro kakalevo mutu unafuna zana yovelela ili yatene para Musasa wa Yehova amangiwe.>> Noira enne, atu tchazilenave jengo jimohi jiwa. 7Tchoira jovelela jatene jazilena Ana Izarayeli johokwakwana ira mabasa matene kamale eto jihale.
Roma wa mabasa osakanya Musasa wa Yehova
8Mwa enne alombwana kavahiwe iwandelo yolaba mabasa ale, kohosakanya Musasa wa Yehova na nguwo kumi dogumanihiwa, dosakanyiwa na usalru wapama. Nguwo dile dali dolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila. Aalifiyati owanda pama kosona vanguwoni vale jofwalrafwaniha ja akerubi. 9Lapa wa kada nguwo ali mameturu 12 na meya. Rambalala uwa ali meturu imohi na masentimeturu 80. Nguwo da kumi dene, ulukula uwa ali umohive. 10Nguwo tanu dasoniwe vamohive eto nguwo dimohi diwa tanu dasoniwe vamohive. 11Mmagomelo molapela mwa kada nguwo dogumanihiwa dile, kohosonamo mingohi dosakanyediwa na nguwo ya matamba. Mingohi dile dali dokwiva eto dasoniwe nnga makando. 12Nguwo imohi kasonilemo makando 50. Eto nguwo imohiwa kasonilemo makando 50. Makando ale kera ing'anana na makando a nguwo imohiwa ile, nikando nimohi na nikando nfwaye na nguwo imohiwa ile. 13Nomala eno, kohosakanya jogumanihana 50 ja oru ira kagumanihena nguwo dile. Mwa enne kohogumaniha nguwo dambinli dedile ira nguwo yoroma ya Musasa wa Yehova ule ikale nguwo imohive.
14Kohosakanyaga eto nguwo dimohi diwa kumi na imohi da mawoya a mbuzi ira dikunelege yokunelana yoroma ya Musasa wa Yehova. 15Lapa wa kada nguwo ali mameturu 13 na masentimeturu 30. Rambalala uwa ali meturu imohi na masentimeturu 80. Nguwo datene kumi na imohi ulukula uwa ali umohive. 16Nguwo tanu dasoniwe vamohive eto nguwo dimohi diwa tanu na imohi dasoniwe vamohive. 17Mmagomelo molapela mwa nguwo imohi, kohosonamo makando 50 eto mmagomelo molapela mwa nguwo imohiwele, kohosonamo makando 50. 18Eto kohosakanyedaga jogumanihana 50 ja mukuwa, aliwa gumaniha nguwo dambinli dene ira ikale nguwo imohive.
19Eto kohosakanya yokunelana imohiwa ya matembe a mabila okulruziwa eto kagali ofilihiwa. Eto unde uwa kohosakanyelawo yokunelana ya matembe ojajala.
Sakanyiwa wa matabwa ira kakale matchihi a Musasa wa Yehova
20Eto kohosakanya matabwa a mukexa ira kaimelihena musasa ule. 21Kada tabwa, lapa uwa ali mameturu mannayi na masentimeturu 45 eto rambalala uwa ali masentimeturu 66. 22Kada tabwa nohokana joira ndjo mbinli pandi ya vati, joing'ana umohive. Matabwa matene a musasole aliwa kasakanyile na makalelo amohive anno. 23Eto kohosakanyeda matabwa 20 ira kaimetchiwe pandi ya suli ya musasa. 24Kohosakanyaga matiwa 40 a parata, ira kada tabwa vati viwa, vikalege matiwa menli. Matiwa ale kasakanyedile na makalelo ira joira ndjo ja matabwa jile jivolowege mmatiwani mule. 25Eto kohosakanyeda matabwa 20 ira kaimetchiwe pandi ya norti ya musasa, 26na matiwa 40 a parata, ira kada tabwa vati viwa, vikalege matiwa menli. 27Eto kohosakanyeda matabwa matanu na nimohi ira kaimetchiwe unduli wa musasa wewo unadowa nzuwa. 28Eto kohosakanya matabwa menli ira kaimetche mamwendo amenlene a unduli wa Musasa wa Yehova. 29Kada mwendo vohokala matabwa menli otandanyedeya. Matabwa menli otandanyedeya ale kamangiheyile va aneli wa vazulu, mbwenye vati tchamangiheyile. 30Gumaniha matabwa matene katandiwe unduli wa musasa, kali matabwa matanu na mararu vamohi na matiwa a parata 16 vati viwa.
31Noira eno, kohosema mawongolo matanu a matabwa a mukexa ira kahidedege matabwa a ikukuru ya suli ya musasa ule, 32eto mawongolo mamohiwa matanu ira kahidedege matabwa a ikukuru ya norti ya musasa, eto amohiwa matanu ira kahidedege matabwa a ikukuru ya unduli, wewo unadowa nzuwa. 33Kohosakanyeda eto niwongolo na vari ira nivire vari va matabwa eto nikume magomo a wu fiyeda magomo a wu. 34Matabwa matene kohokunela na oru. Eto kohotukula oru, aliwa sakanyeda maaneli malukulu, aliwa komela va matabwani ira kavolotchihemo mawongolo olimbiha matabwa ale. Eto mawongolo ale kohokunela na oru.
Sakanyiwa wa makurtina vamohi na mambozo a Musasa wa Yehova
35Eto kohotukula nguwo yosakanyiwa na usalru wapama, aliwa sakanya kurtina yogawa Nimburo Notchena na Nimburo Notchenetchetcha. Kurtina ile yali yolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila. Aalifiyati owanda sona pama kohosona vanguwoni vale jofwalrafwaniha ja akerubi. 36Ira kawande kokiha kurtina ile, kohosakanyaga mambozo mannayi a mutengo wa mukexa, aliwa akunela na oru. Mambozo ale kohokomelamo jokokihana josakanyiwa na oru. Aliwa nyungulrutcha parata, sakanya matiwa mannayi.
37Nomala kohotukula nguwo yosakanyiwa na usalru wapama, aliwa sakanya kurtina ya vamulangoni va musasa. Kurtina ile yali yolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila. 38Noira eno, kohosakanyaga mambozo matanu na jokokihana jiwa, na miru dohela vazulu va mambozo, na matabwa owereweriha mambozo ale, aliwa kunela jatene na oru, mbwenye matiwa matanu a vati viwa kali a mukuwa.
Currently Selected:
Ezodu 36: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
