Ezodu 35
35
Nlamulo zela sabado
1Mozeji ohogumanihaga mulogo watene wa Ana Izarayeli, liye awandela eraga: <<Mazu Yehova unaurumani liye ira muiregena ba ala: 2Mulabege mabasinyu muwari mwa malambo matanu na nimohi, mbwenye mubalrege siku nanetanu na mbinli nnga siku novuma eto siku notchena para miyo dagali Yehova. Mutu uli watene unahinde mabasa siku neno, apiwe. 3Kakalevo mutu unafuna tumbanya munlo vande vaye siku na sabado.>>
Jovelela para Musasa wa Yehova amangiwe
4Mozeji ohowongagave na mulogo watene wa Ana Izarayeli eraga: <<Mazu unaurumani Yehova ira muiregena bala: 5Muwari mwa jokana jenyu, mukumihegevo jejo jinafuna kala jovelela wa Yehova. Atu anne anafuna velela, kavelelege na mmirimani mwewa mwatene. Jovelela jinafuna veleliwaga ti ji: oru, parata, mukuwa, 6usalru wa kore ya matamba,#35:6 kore ya matamba inawongiwa eva, na izugu tchi kore ya azul hiya verde. usalru wa kore ya musuzu wa bwanda, na usalru ofila, nguwo yosakanyiwa na usalru wapama, mawoya a mbuzi, 7matembe a mabila okulruziwa eto kagali ofilihiwa, na matembe ojajala, mitengo da mikexa, 8makura ohela mpantini, jengo jonukela para sakanyana makura otchenihana jengo na jonukela ira jitumeyiwege, 9mabwe ofuneyetchetcha anaitaniwa onikisi na mabwe amohiwa ofuneyetchetcha ira kaheliwe vakuletini ya unamakuta na vayowarani ya vamirimani inafuna waraga namakuta.
10<<Kaze eto amesilri atene owanda anafwanyeya muwari mwa nyo, kasakanye jatene nnga mwemo Yehova muwongele liye. 11Aliwa anafuna kasakanye ji: Musasa watene, roma nguwo da muwari, na jokunelana ja unde, jokokihana jiwa, matabwiwa, mawongoluwa, mambozuwa vamohi na matiwa. 12Eto anosakanya Kaxa ya Yopangana na jimiri jotembana jiwa, na Tampa Yosembeselrana ya Kaxa ile, na kurtina yogawa Nimburo Notchena na Nimburo Notchenetchetcha, 13meza na jimiri jotembana jiwa, na fwaramento diwa datene, vamohi na pawu dedo nnatapulela ira Yehova uli vamohi na hiyo, 14yogoromeyavo panti na fwaramento diwa datene, panti diwa, vamohi na makura ohela mpantini mule, 15ibuwa yotumeyavo jonukela vamohi na jimiri jotembana jiwa, makura otchenihana jengo, jonukela ira jitumeyiwege, kurtina ya va mulango ovolowela wa Musasa wa Yehova, 16ibuwa ya mukuto otumeya na yotumeyavo mukuto ya mukuwa, jimiri jotembana jiwa, na fwaramento diwa datene, na basiya vamohi na ntiwa niwa, 17makurtina a ntando, na mambozuwa na matiwa ewa, na kurtina ya va mulango wa vatando, 18peregu dolimbiha musasa vati na mingohi diwa vamohi na peregu dolimbiha vati va kurtina da vatando vamohi eto na mingohi diwa, 19jowara josakanyiwa na uyesa, roma jowara jotchena ja Arawu na jowara ja ahimaye, jejo jinawarege atu kadowaga laba mabasa a unamakuta Nimburo Notchena.>>
AIzarayeli kohozana jovelela na mmirimani mwewa mwatene
20Noira enne, mulogo watene wa Ana Izarayeli kohokumagavo vamentoni va Mozeji, aliwa dowaga mmisasani mwiwa. 21Mwa enne atu atene ofuna na mmirimani mwewa mwatene, kohozagana jovelela wa Yehova jejo jafuna laba para mangana Musasa Ogumanamo#35:21 Musasa Ogumanamo ku wonga Musasa wa Yehova. Tchoira musasa ule ali nimburo nadowa atu ira kagumane na Mulugu muwari molobela no velela mikuto diwa. Nione Ezodu 39:32, 40:2. vamohi na mabasa matene a vaMusasani vale eto ira jisakanyiwe jowara jotchena. 22Mwa enne kohoroma za alombwana vamohi na ahiyana ofuna na mmirimani mwewa mwatene, aliwa za velelaga pega, birinku, aneli, mapurusera, na jengo johiyana hiyana ja oru. Kada mutu ovelelaga na mmirimani mwaye mwatene yengo ya oru yenno yafunne liye velela wa Yehova. 23Kohovelelaga kada mutu yanna liye. Kavelenle jengo ji: usalru wa kore ya matamba, usalru wa kore ya musuzu wa bwanda, usalru ofila, nguwo yosakanyiwa na usalru wapama, mawoya a mbuzi, matembe a mabila okulruziwa eto kagali ofilihiwa, na matembe ojajala. 24Eto atene kanna parata owu mukuwa kozana, aliwa velelaga wa Yehova mofuna mwewa. Mutu wenno anna mitengo da mikexa, ozana ira jilabe mabasa kafuna labiwaga. 25Eto ahiyana atene okana dodolriso, koza velelaga usalru kasakanya atu na mandiwa. Aliwa kovelela usalru wa kore ya matamba, usalru wa kore ya musuzu wa bwanda, na usalru ofila, na nguwo yosakanyiwa na usalru wapama. 26Eto ahiyana okana dodolriso doluwa, atene ofuna na mmirimani mwewa mwatene, kotukula mawoya a mbuzi, aliwa sakanyana usalru. 27Eto andimuwa a aIzarayeli kozana mabwe ofuneyetchetcha anaitaniwa onikisi na mabwe amohiwa ofuneyetchetcha ira kaheliwe vakuletini ya unamakuta na vayowarani ya vamirimani yenno yafuna waraga namakuta. 28Eto kozana jonukela na makura ira mwa jengo jejo kasakanyena makura a mpantini, na makura otchenihana jengo, na jonukela jatumeya atu.
29AIzarayeli atene, alombwana vamohi na ahiyana ofuna na mmirimani mwewa mwatene ira kavelele jengo para labiwana mabasa anno Yehova amurumile liye mulombwana Mozeji ira Ana Izarayeli kairena, atene anne kohozagana mofuna mwewa, aliwa velelaga wa Yehova.
Amesilri osakanya Musasa wa Yehova
30Mozeji ohowonga na Ana Izarayeli eraga: <<Kaing'anani, Yehova uhumusakulra mulombwana mmohi wenno unaitaniwa Bezaleli mwana Wuri, muzula wa Huri, wa nlogo na Juda. 31Eto Mulugu uhumuzaliha Munemba waye ira akayena dodolriso no onelramo na zelru vamohi na toto dolaba mabasa ali matene. 32Liye gunawandege dezenyari jinafuna mangiwa eto gunawandege labana oru, parata vamohi na mukuwa. 33Liye unerege gwada mabwe ofuneyetchetcha ira kafungihediwe va yengoni no sema jimiri eto liye gunalabege mabasa matene a umesilri. 34Eto Yehova uhunvaha Bezaleli na mulombwana mmohiwa unaitaniwa Aoliyabe, mwana Ayizamaki wa nlogo na Dani, iwandelo yoafundjiha atu amohiwa. 35Yehova uhaazaliha ambinlene zelru dolabana mabasa ali matene olremba vamabweni, no dezenyari jinafuna mangiwa, no tukula nguwo yosakanyiwa na usalru wapama ira kalrembemo jolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila, vamohi na makalelo matene oluwa ira kasakanyege jengo johiyana hiyana na makalelo ohiyana-hiyana.>>
Currently Selected:
Ezodu 35: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
