Ezodu 24

AIzarayeli kohosakanya yopangana na Yehova

1Nomala eno, Yehova ohomuwandelagave Mozeji eraga: <<Weyo vamohi na Arawu na Nadabe vamohi na Abiyu eto na andimuwa a aIzarayeli okwakwana 70, mugwele mwangoni uno ira mugumane na miyo Yehova, muditamalele mwagali olapela wene. 2Muwari mwa atu atene anafuna za mwangoni uno, weyo Mozeji bahi gunafuna za dikwivela miyo dagali Yehova, mbwenye afwawo amohiwa ale kakale olapela wene na miyo. Eto mwagwelaga, aIzarayeli atene ohala, mwangoni uno kifiyewo.>>

3Noira eno, Mozeji ohodowa awandela aIzarayeli mazu matene na jotonga jatene Yehova amuwandenle liye. Mwa enne atene kohorumela vamohi movwanana, aliwa ira: <<Jatene jiwongile Yehova, hiyo nnerege irana.>> 4Noira eno, Mozeji oholrembaga mazu matene amulanyedile Yehova.

Noira enne Mozeji ohovenyaga na mabebehene, liye kunga ibuwa ya mukuto, mutcherelani mwa mwango. Eto ohoimelihaga mabwe kumi na menli nnga mambozo, molingana na malogo kumi na menli a Izarayeli. 5Nomala eno, oharuma azombwe angasi angasi a Ana Izarayeli ira kape ng'ombe da alombwana, kavelele wa Yehova mikuto dotumeya vamohi na mikuto dimohi diwa da murendele. 6Mwa enne Mozeji ohotukula sangiri niwa, liye gawamo. Pandi imohi liye hela mubasiyani, liye koya. Sangiri nimohi niwa liye wokela ibuwa ya mukuto ile. 7Nomala eno, Mozeji ohogudubulraga Livuru na Yopangana, liye ileri atu atene kavuruwanaga. Nomala ileri livuru nne, aIzarayeli kohowonga keraga: <<Jatene jiwongile Yehova, hiyo nnerege irana eto nnerege vwelela.>>

8Evale Mozeji oholanda sangiri nimohiwa nakoyile liye nne, roma awokelaga aIzarayeli eraga: <<Sangiri ni ti sangiri na yopangana yenno Yehova isakanyile liye na nyo muwari mwa malamulo matene uuwandenleni liye ala.>> #24:8 Sangiri ni ti sangiri na yopangana: AIzarayeli karumelaga okiwa sangiri, yatapulela ira aliwa korumela volowa muwari mwa yopangana ya Mulugu.

9Evale Mozeji na Arawu na Nadabe na Abiyu eto vamohi na andimuwa a aIzarayeli okwakwana 70, kohogwela mwangoni. 10Aliwa kohomuona Mulugu wa aIzarayeli. Vati va manyalo vaye, vali nnga rampa nosakanyiwa na boloki da mabwe ofuneyetchetcha anairiwa safira, koriwa kalaga nnga kore ya zulu siku na nzuwa eto kagali mabwe ooneyela. 11Mulugu kavenyihile ndanda naye aapa andimuwa a Ana Izarayeli ale. Aliwa kohomuing'ana Mulugu, kohodja eto kohong'wa kagali wewule.

Mozeji ohogwela mwangoni ira avahiwe malamulo.

12Yehova ohomuitanaga Mozeji eraga: <<Ugwele wa miyo mwangoni uno. Wafiya, ukale wewuno miyo duvahede mabwe osemiwa nnga matabwa, vevo vilrembile miyo jofundjiha vamohi na malamulo ira udowe waafundjihege Ana Izarayeli.>>

13Evale Mozeji ohovenyaga na sempurwaye Jozuwe, aliwa gwelaga mwangoni wa Mulugu ule. 14Mozeji agwelaga mwangoni ule, ohawandelaga andimuwale eraga: <<Munidedihege vevano ante hiyo nifiyede welawo. Mulombwana Arawu na Huri anohala na nyo. Mwa eno, akalavo mutu unna makani, adowegena wa aliwa.>>

15Evale Mozeji agagwenle mwangoni ule, ohozaga murambo, kunela mwangole. 16Undimuwa wa Yehova wohozaga mwangoni Sinayi ule. Murambo ule ohokunela mwango ule fiyeda malambo matanu na nimohi. Nikwakwanaga siku nanetanu na mbinli, Yehova ohomuitanaga Mozeji mmuramboni emule. 17Ana Izarayeli kagaing'anne undimuwa wa Yehova wafwanyeya mwangoni ule, aliwa kaona nnga munlo owopiha vazulu va mwango vale. 18Mozeji ohogwelagave, liye volowa mmiramboni mule. Mwangoni ule Mozeji amanlewo malambo 40 ntana na mahiyu.

Currently Selected:

Ezodu 24: iLolo

Highlight

Copy

Compare