Ezodu 23

Zela jonama na jimohi jiwa

1Yehova ohowongagave eraga: <<Kuwongege jengo jonama jinavwa we jomunukeda mutu. Eto kuvwanane na mutu wabure ira uwongege umboni ofuna mugwihana mulandu mutu ahanna mulandu. 2Waaona atu oindjiva kairagana yengo yotakala, we kwaahare ira uiregena yengo imohive yenno inaira atu. Eto kuhidedelege umboni onama moahara atu oindjiva ira ugombihe matongelo a ibaribari. 3Mutu osimela akana mulandu, kunvahege razawu na mwasa osimela waye wewo.

4<<Wafwanya ng'ombe nari buru wa mwidani wawo agaholowile, inafwanela utukule, uvelele wa mwinnya. 5Wafwanya buru wa mutu unauida agagwile vati na mitolro, kumuhiyede mwidanawo ule asimelagana ekave nari, mbwenye udowe wamukamihede venyiha buru waye.

6<<Mutu osimela akana mulandu waye ira atongiwe, kugombihe mulandu ule na mwasa okala mutu osimela. 7Kumunukede mutu jengo jahairilena liye. Nne kumutonge mutu ira apiwe ahanna mulandu eto agali mutu wapama. Tchoira mutu wabure miyo kannamuhiya wene, nnomutonga. 8Muwari motonga, kurumelege kunyariwa. Tchoira kunyariwa unotwa meso a maliba ona. Evale mutu wenne anna razawu, unogwana mulandu.

9<<Kamwaairelege jabure atu oza anno anakala vari va nyo, tchoira nyo muhuiziwa makalelo anazuzuma atu oza, mwasiwa na nyenne mwali atu oza ilambo ya Ijipitu.

Yaka yovuma vamohi na siku novuma

10<<Muwari mwa yaka tanu na imohi inafwanela muzalege eto muhandege jatene ja mmundani. 11Mbwenye yafiyaga yaka yanetanu na mbinli muhiyege teya ira ivume, kamulime. Evale atu osimela muwari mwa nyo anerege dodamo jinamelege emule ira kadjege. Eto atwale kaviramo, anavinyama a mukokolani anerege dodamo jinahala. Inafwanela muiregena imohive na minda denyu da uva nari minda dinyu da mitengo da azeti.

12<<Mulabege mabasinyu ali matene muwari mwa malambo matanu na nimohi. Mbwenye nafiyaga siku nanetanu na mbinli munerege vuma ira ng'ombe yenyu na buru wenyu avume vamohi na azari enyu na ahimiwa, na atu atenene oza.

13<<Muharihegemo jengo jatene juwandenleni miyo. Eto kamuromolege mazina a amilugu amohiwa. Nne vamilomoni venyu kavivweyege mazina ewa.#23:13 Eto kamuromolege mazina a amilugu amohiwa. Ku wonga kakalevo unafuna lobela na nzina na amilugu amohiwa ira akamihediwe. Eto kakalevo unafuna vweyiha mabasa analaba atu ohara amilugu na makalelo ira atu amohiwa kafune jororomela amilugu ale. Ku wonga mutu omuroromela Yehova kavweyihege mabasa analaba ang'anga okwima.

Zela pwando taru dilukulu

14<<Va kada yaka nyo munerege sakanya pwando taru dilukulu muwari moditamalela. 15Mwedi wa Abibi#23:15 Abibi Medi da aIzarayeli dohiyana vang'ono na medi dihu. Abibi ali zina na mwedi na iwongelo ya iEberewu. Ali romela magomelo wa mwedi wa Marsu na maromelo wa mwedi wa Abirili. wenno mwakumile nyo ilambo ya Ijipitu, musakanyege Pwando ya Pawu Dohosakanyiwana Leverina nnga mwemo mwauwandenleni miyo. Pwando yenno ikalege mwa malambo muwandeliwe nyo para malambo matanu na menli eto mudjege pawu dohosakanyiwana leverina. Mwa eno, kakalevo mutu unafuna za ditamalelaga eno manda ve ahanna yengo yoditamalelana. 16Pwando yanembinli tchi ila. Mwamala lima jozala jenyu ja mmundani, jaroma warala, musakanyege Pwando ya Johanda Joroma. Pwando yaneraru inakala magomelo wa yaka, mwagamanle handa, mwahelelaga jipile nyo mmindani, musakanyege Pwando Yotamalela zela Johanda Jatene. 17Alombwana atene kaze kaditamalelege miyo dagali Nabwiya Yehova fendo taru va kada yaka.

18<<Zela nkani odikutela mukuto wa sangiri, kakalevo mutu unafuna zana yengo ili yatene yoheliwa leverina. Eto kamuhiyegemo jonuna ja pwando yaga fiyeda mmetcheloni muwa, mbwenye jitumeyiwe siku nimohive.#Ezodu 12:8-10

19<<Yaka datene mutukulege johanda joroma japama ja mmindani mwinyu, mudowegena Nyumba ya Yehova Mulugu wenyu. Kamupiyege mwana mbuzi na mukaka wa mmaye.

Mulugu ohowonga makalelo afuna liye asogolrelra aIzarayeli

20<<Miyo dagali Yehova nnomuruma mungelro ira ausogolrelreni vamohi no uing'anelani mundila eto aufiyiheni nimburo neno dusakanyeleni miyo. 21Inafwanela muharihegemo vamohi no vwelela jatene jinawongege liye. Kammurunihege, tchoira mwamuruniha, liye kanaulevelelani jotega jenyu, mwasiwa nzina naga nnafwanyeya muwari mwa liye.#23:20-21 Mulugu awongaga ira: nnomuruma mungelro… nzina naga nnafwanyeya muwari mwa liye inakala nnga unawonga zela mungelro wa Yehova. Nione eto marodape anafwanyeya va Jenesesi 16:13 na Ezodu 3:2-4. Amohiwa anaumbuwela ira mungelro wa Yehova ali Yesu mwasiwa Yesu ohowonga ira Mulugu anvahile nzina naye. (Juwawu 17:11-12) Zela ibaribari ira Yesu olaba wanle ahanabaliwe, nione eto Juwawu 1:1; 1 Korinto 10:14; Koloso 1:15-16.

22<<Mbwenye nyo mwakala atu ovwelela mazu matene unawongege liye eto muiragana jatene jinafuna miyo wonga, mutu wenno unafuna kala mwidaninyu, na miyene unakala mwidanaga. Eto mutu wenno unauharaharegeni, na miyene nnoza dimuharaharege.

23<<Mungelro waga unousogolrelrani eto unoufiyihani ilambo ya aAmore, aEti, aFerizi, akuda Kana, aEvi, na aJebuzi eto miyo nnoatolotcha. 24Kamwaakokorelege amilugu ewa nne kamwaatamalelege nne kamuharege jinaira atu. So mbwenye inafwanela mwabwanyulege amilugu ewa eto mutwege mambozo a mabwe anno anaatamalela atu nnga amilugu ewa.

25<<Mudilabege miyo Yehova Mulugu wenyu. Mwaira eno miyo nnerege reliha jodja jenyu na mahindje enyu. Eto nnoza dikumihevo marenda vari venyu. 26Mwilamboni mwenyu kamuza mufwanyeyaga muhiyana otatila nne muhiyana ohobala. Nnerege sakanya ira mukalegewo malambo madjindji. 27Miyo nnodowa vasogolro venyu ira daarendjetche eto daavahe madugudugu atu atene anafuna nyo afwanya ilambo yenno. Eto miyo nnosakanya ira amwidaninyu atene kautawegeni. 28Eto nnoza dirume manyefu#23:28 nnoza dirume manyefu: MaBibiliya amohiwa anawonga ira Nnoavaha rendjeya wohokala wa masika. vasogolro venyu ira kadowe kaatamangihe mwilamboni mule aEvi, akuda Kana na aEti. 29Miyo kannaatamangihamo atu atene yaka imohive nari. Mwasiwa miyo daatamangihamo atene yaka imohive, ilambo inosanduwa kokola, anavinyama a mukokolani anoindjivamo bure, karomege usanyani. 30Mbwenye miyo nnafuna daatamangihegemo vang'ono vang'ono, nyo muindjivihanaga fiyeda mutukule ilambo yatene ira ikale yenyu. 31Miyo nnoza digwade madilre a ilambo yenno munafuna nyo kalagamo, romela Bara Yofila fiyeda bara ya aFilistewu#23:31 bara ya aFilistewu inawongiwa veva tchi imohive yenno inaitaniwa bara Mediteraniyo. eto roma muisalesaleni ante dowa gomela muhindje Eufarati. Tchoira miyo nnoza duvahedeni mmandani mwenyu atu atene anakala mwilamboni mwemo ira nyo mwaatamangihemo.

32<<Eto nyo kamusakanye yopangana yowandana na aliwa, nne na amilugu ewa. 33Aliwa kikale mwilamboni mwenyu. Mwasiwa aliwa kakalaga vamohi na nyo, anerege utegihani wa miyo. Tchoira nyo mwaahara amilugu ewa, ahara wenyu inokala nnga ratuwero unafuna umangani.>>#23:33 ahara wenyu inokala nnga ratuwero unafuna umangani. Ku wonga ahara amilugu amohiwa wogoadowiha ndila dimohi diwa domutegela Mulugu. Mwa enne kogokala atu otembelrelreya nnga munawongela atu muwari mwa Detoronomiyo 28:15-68.

Currently Selected:

Ezodu 23: iLolo

Highlight

Copy

Compare