Ezodu 25
25
Mulugu oharuma aIzarayeli ira kazegena jovelela ira kasakanyena Musasa wa Yehova
1Yehova ohowonga na Mozeji eraga: 2<<Waawandele Ana Izarayeli ira kavelelege jengo wa miyo. Kada mutu azegena wa weyo inafuna liye divaha na mmirimani mwaye mwatene. 3Jovelela jinafuna we watchelaga jokumela wa aliwa ti ji: oru, parata, mukuwa,#25:3 mukuwa gu ntundu mmohi wa momba ofila, unasakanyiwa muwari mopiya mabwe a mitundu minli vamohi. 4usalru wa kore ya matamba,#25:4 kore ya matamba inawongiwa eva, na izugu tchi kore ya azuli hiya verde. usalru wa kore ya musuzu wa bwanda, na usalru ofila, nguwo yosakanyiwa na usalru wapama,#25:4 nguwo yosakanyiwa na usalru wapama inawongiwa yali, nguwo yosakanyiwa na usalru wa yomela imohi inaitaniwa linho na izugu. Nguwo yenno yali nguwo yapama kwaranya nguwo dimohi diwa. mawoya a mbuzi, 5matembe a mabila okulruziwa eto kagali ofilihiwa, na matembe ojajala,#25:5 matembe ojajala: MaBibiliya amohiwa ani: matembe a anavinyama a mwiko. mitengo da mikexa, 6makura ohela mpantini, jengo jonukela para sakanyana makura otchenihana jengo#25:6 makura otchenihana jengo ali makura para mutchenihana mutu owu hehi yengo ili yatene ira ilabe mabasa a Mulugu. Nione Ezodu 29:7, 40:9. na jonukela ira jitumeyiwege, 7mabwe ofuneyetchetcha anaitaniwa onikisi na mabwe amohiwa ofuneyetchetcha ira kaheliwe vakuletini ya unamakuta na vayowarani ya vamirimani inafuna waraga namakuta.#25:7 vakuletini ya unamakuta na vayowarani ya vamirimani: Zela jowara eji, nione Ezodu 28:6-30. 8AIzarayeli kadisakanyele nimburo notchena ira diwandege kala vari vewa. 9Jatene jinafuna miyo uoniha zela makalelo osakanyeda musasa vamohi na fwaramento diwa datene, usakanye na makalelo amohive anno.>>
Kaxa ya Yopangana
10<<Katukule eto matabwa a mukexa, kasakanyena kaxa. Lapa uwa ikale meturu imohi na masentimeturu 10. Rambalala uwa no diha uwa ikale masentimeturu 66. 11Utukule oru ohogumanihiwa na yengo imohiwa, ukunelena unde na muwari. Mmilomoni mwa kaxeyo, uwerewerihe na oru oindivala.
12<<Unyungulrutche oru, usakanyena maaneli mannayi malukulu, uhele mmwendoni mwa kaxeyo, pandi imohi maaneli menli, pandi imohiwa maaneli menli. 13Eto usakanye jimiri mbinli jotembana, jagali jimiri ja matabwa a mukexa, umale jikunela na oru. 14Wamala eno, uvolotchihe jimiri jotembana jile muwari mwa maaneli mannayi malukulu anafwanyeya mmambalo mwa kaxa ile ira muwandege temba kaxele muhidedaga jimiri jile. 15Jimiri jotembana jile jinakalegeve muwari mwa maaneli a kaxa ile, kajikumihiwegemo. 16Era eno, weyo unohela muwari mwa kaxele mabwe a Umboni,#25:16 mabwe a Umboni anawongiwa va, ba mabwe menli osemiwa nnga matabwa, vevo vafwanyeya Malamulo Kumi a Mulugu. Nione Ezodu 31:18. anno anafuna miyo uvaheda.>>
Tampa Yosembeselrana
17Yehova ohowongagave na Mozeji eraga: <<Utukule oru ohogumanihiwa na yengo imohiwa, usakanye tampa. Tampeyo inaitaniwege Tampa Yosembeselrana.#25:17 Tampa Yosembeselrana yali tampa yogudumeyana Kaxa ya Yopangana. Yaitaniwa Yosembeselranana mwasa oira vatampani vale ali vevo mundimuwa wa anamakuta vadowana liye sangiri na anavinyama va yaka fendo imohi, awokaga ira jotega ja aIzarayeli jisembeselriwe vamentoni va Mulugu. Nione Levitiku 16:15-16. Lapa uwa ikale meturu imohi na masentimeturu 10, rambalala uwa ikale masentimeturu 66. 18Eto utukule oru, uhane, waasakanye angelro ambinli aneriwa akerubi, kakale makomo amenlene a tampele.#25:18-20 akerubi gu ntundu mmohi wa angelro. Nione Jenesesi 3:24; Ezekiyeli 10:1-21. 19Kerubi mmohi umuhele komoni ya wu, kerubi mmohiwa komoni ya wu. Ugumanihe akerubi ale na Tampa Yosembeselrana ile ira jatene jikale yengo imohive. 20Akerubi ale kakale kagatapunle mapepeluwa, kagudumeyaga tampa ile, kove diwa kaing'ananaga mmohi na nfwaye, kaing'anaga Tampa Yosembeselrana ile. 21Mabwe a Umboni anno anafuna miyo uvaha uhele mukaxani. Wamala utukule Tampa Yosembeselrana, ukunelena kaxa ile. 22Miyo nnerege za gumana na weyo vari va akerubi ambinli, anno anafuna kala vazulu va Tampa Yosembeselrana, yenno ili vazulu va Kaxa ya Umboni,#25:22 Muwari mwa Kaxa ya Umboni mokala Malamulo Kumi kalrembiwe vamabweni. Malamulo anno kafwanyeya kagali umboni zela yopangana Mulugu asakanyile liye na aIzarayeli. diwongege na weyo malamulo anafunege miyo ira waawandelege Ana Izarayeli.>>
Meza yohelavo pawu dedo datapulela ira Mulugu uli na atwaye
23Yehova ohowongagave na Mozeji eraga: <<Eto usakanye meza ya matabwa a mukexa. Lapa uwa ikale masentimeturu 88. Rambalala uwa ikale masentimeturu 44. Regama uwa ikale masentimeturu 66. 24Ukunele meza yatene na oru ohogumanihiwa na yengo imohiwa. Eto mminononi mwa meza ile, uwerewerihe na oru oindivala. 25Mmendoni mwa meza uwerewerihe na matabwa amohiwa. Indivala wa matabwayo ukale nnga jibuno nnayi. Wamala, ukunele matabwayo na oru eto uwerewerihe oru oindivala.
26<<Eto utukule oru, usakanye maaneli malukulu mannayi, uhele maaneli ale mmendoni mwa meza ile, kada mwendo, aneli mmohi. 27Maaneli ale kakale wandamelana matabwa owerewera a mmendoni. Jimiri jotembana jivolotchihiwe muwari mwa maaneli ale ira meza ile iwandege tembiwa. 28Eto useme jimiri jotembana, jagali ja mitengo da mukexa ira meza ile itembiwege na jimiri jile. Wamala eno ukunele jimiri jile na oru. 29Teto utukule oru ohogumanihiwa na yengo imohiwa, usakanye parato na kopo, mabasiya mang'onong'ono na jaro ira kahelegemo jovelela ja jong'wa. 30Vameza vale uhelegevo pawu vamentoni vaga tempu yatene, pawu dedo nnatapulelege ira miyo dili vamohi na nyo.>>
Yogoromeyavo panti ya oru
31<<Eto utukule oru ohogumanihiwa na yengo imohiwa, uhane ira ikale yogoromeyavo panti. Yogoromeyavo panti ile usakanyele ntiwa niwa, na makopo, na makoko vamohi na mafoloriwa. Jatene ejo jikale johaniwa ira wagamanle sakanya ikale yengo imohive. 32Yogoromeyavo panti ile ikayena tambi tanu na imohi. Tambi taru ikukuru ya wu, tambi dimohi diwa taru ikukuru ya wu. 33Kada tambi imohi ikayena kopo taru dolingana na tondo da mutengo wa amendowa, na nikoko nimohi vamohi na folori imohi. Tambi datene tanu na imohi da yogoromeyavo panti ile dikayena makalelo amohive anno. 34Eto vari va yogoromeyavo panti, vikale kopo nnayi dolingana na tondo da mutengo wa amendowa, daganna makoko vamohi na folori diwa. 35Vati va kada tambi mbinli vinamela atu, vikalege nikoko nimohi nohaniwavo. Eto tambi dimohi diwa mbinli, vati viwa vikale nikoko nimohi eto tambi mbinli dimohi diwa, vati viwa vikale nikoko nimohi. Ayo ba makalelo anafuna we irana vati vinamela tambi mbinli, fiyeda kwakwaniha tambi datene tanu na imohi da yogoromeyavo panti ile. 36Ira usakanyede tambi dile na makoko ale, utukule oru ohogumanihiwa na yengo imohiwa, uhane ira jatene jene jikale yengo imohive.
37<<Eto usakanye panti tanu na mbinli ira uhele vazulu va yogoromeyavo panti ile na makalelo ira jihindege, jiwandege moneya sogolro uwa. 38Maalikatiwa vamohi na matijela otukulana makalra ohinda, jikale ja oru ohogumanihiwa na yengo imohiwa. 39Ira uwande sakanya yogoromeyavo panti vamohi na fwaramento diwa dene, inafwanela ulabena kilu 34 da oru ohogumanihiwa na yengo imohiwa. 40Uing'anetchetche pama ira uwande sakanya jatene molingana na makalelo nnauoniha miyo mwangoni uno.>>
Currently Selected:
Ezodu 25: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
