Ezodu 20

Malamulo Kumi

1Mwa eno, Mulugu ohowonga mazu matene ala eraga: 2<<Miyo dili Yehova Mulugu wenyu uukumihileni ilambo ya Ijipitu, muuzarini mwafwanyeya nyo. 3Kamukayena amilugu amohiwa, ahali miyo.

4<<Kamusakanye nlandaniho nosemiwa ira mutamalelege nne yofwalrafwaniha ya yengo ili yatene inafwanyeya zulu nari mwilamboni ya vati nari mwiko.#20:4 mwiko: MaBibiliya amohiwa anawonga ira mahindje anafwanyeya vati va teya. 5Kamukokorele eto nne kamutamalele jejo mwasiwa miyo Yehova Mulugu wenyu dili Mulugu okana sandje. Tchoira atu anno anadiida, miyo nnotonga yotega yewa mwa ahimiwa anaabalege atu, fiyeda azuliwa ahimiwa. 6Mbwenye zela anno anadiziveliwa, kaharihagamo malamulo aga, nnoaoniha zivela waga wororomeleya roma aliwa, dowaga ahimiwa eto ahimiwa anno ahimiwa, vamohi na ahimiwa anno ahimiwa dowagave eno fiyeda ndila 1.000.

7<<Kamuromolege nzina na Yehova Mulugu wenyu vasayi. Mutu wenne unaromole nzina naga vasayi, miyo dagali Yehova nnomubalra nnga mutu okana mulandu.

8<<Muumbuwele siku na sabado ira nikale siku notchenihiwa. 9Mulabege eto muhindege mabasinyu ali matene muwari mwa malambo matanu na nimohi. 10Mbwenye siku nanetanu na mbinli ti siku na sabado, siku nomuumbuwela Yehova Mulugu wenyu. Siku neni kamuhindege mabasa ali matene, romela nyo nari mwaninyu wa mulombwana, nari mwaninyu wa muhiyana, nari namalaba wa mulombwana, nari namalaba wa muhiyana, nari ifuwo yenyu ili yatene nari mutu oza unakala na nyo, kakalevo unafuna hinda mabasa. 11Tchoira miyo Yehova dasakanyile zulu na ilambo ya vati na bara na jatene jene jinafwanyeyamo muwari mwa malambo matanu na nimohi. Nikwakwanaga siku nanetanu na mbinli, dohovuma. Na mwasa wenna miyo Yehova dohoreliha siku na sabado eto dohotcheniha.#Jenesesi 2:3

12<<Umurihedege babawo na mmawo ira ugonele malambo madjindjene ilambo yenno inafuna Yehova Mulugu wenyu uvahani.#20:12 ira ugonele malambo madjindjene: Tempu yenno mwana ahamuvwelela babaye nari mmaye owu hehi ambubuda, opiwa. Nione eto Ezodu 21:15; Detoronomiyo 21:18-21.

13<<Kumpe mutu.

14<<Kuraruwe.

15<<Kube.

16<<Kuwonge umboni onama omunukeda mutu.

17<<Kusilrilre nyumba ya mwinnya. Kumusilrilre mwadi mwinnya, nne namalabaye wa mulombwana nne namalabaye wa muhiyana, nne ng'ombe yaye nne buru waye nne yengo yatene ili yaye.>>

18Ana Izarayeli kagavwile ndari na palraza dinlaga eto kagaonne jerima vamohi na mwango atuwelaga utchi, kohorendjeya valukulu kangurumelaga, aliwa roma welelaga mundulri, dowa kala olapela wene. 19Kohowonga na Mozeji keraga: <<Mulugu kawongegeve na hiyo tawiha ira nnoza nikwe. Mbwenye awongege na nyo, amala nyo muze muwongege na hiyo. Mwaniwandela, hiyo nnouvwelelani.>>

20Evale Mozeji ohowonga na Ana Izarayeli eraga: <<Nyo kamuove. Tchoira Mulugu uzile ira auxixeni eto ali ira mmuovege mwa ibaribari ira mwahamutegelege.>>

21Mwa enne atu kohoimelaga olapela wene, mbwenye Mozeji ohokwivela vamuramboni odiba vale, vevo valigi Mulugu.

Malamulo zela vibuwa da mukuto

22Yehova ohomuwandelaga mulombwana Mozeji eraga: <<Waawandele Ana Izarayeli ira: <Yehova unawonga ira nyo muhumala ona diwongaga na nyo dagalive zulu. 23Kamudifwalrafwanihe na amilugu amohiwa. Nne kamusakanyege amilugu amohiwa a parata nne a oru. 24Inafwanela mudisakanyele ibuwa ya teya ira muwandege kutavo mikuto dinyu dotumeya na jovelela jenyu ja murendele,#20:24 mikuto… dotumeya dali mikuto dowatchela jotega. Mukuto watene era tumeyiwa. (Levitiku 1:1-9) jovelela… ja murendele jali jovelela jomutamalela Mulugu zela makalelo apama aavahile liye aliba mutamalela. Mutu akutaga mukuto wa murendele, ku wonga ira: <<Miyo nnomutamalela Mulugu zela murendele unna miyo.>> Mukuto wenno wa vang'ono otumeyiwa, wa vang'ono adja ali namakuta, ohala adja ali maliba velela. (Levitiku 7:11-16) roma mabila enyu vamohi na ng'ombe denyu. Nimburo nili natene nnasakulre miyo ira nyo muditamalelegevo, miyo Mulugu nnerege za nimburo neno ira durelihegeni. 25Eto mwafuna disakanyela ibuwa ya mukuto yagali ya mabwe, kamusakanyege na mabwe obubudiwa na momba nari. Tchoira mwairana eno, muhumala inonga. 26Eto muwari modisakanyela ibuwa, kamusakanyege ibuwa yosimbwa gwela bure ante fiyedaga funeya kana masikada tawiha ira mwagwelaga, munaonihege umandave wenyu.> >>

Currently Selected:

Ezodu 20: iLolo

Highlight

Copy

Compare