Ezodu 19

Mulugu ohowonga na Mozeji mwango Sinayi

1Ana Izarayeli kagakumile muIjipitu, nagafiyile siku noroma na mwedi waneraru, siku neno aliwa kohofiya isalesale ya Sinayi, kakumelaga Refidima. 2Kagafiyile isalesale ya Sinayi ule, kohokunga misasa diwa kaing'anaga mwango Sinayi.

3Evale Mozeji ohovenyaga, liye gwela mwangoni ule ira awonge na Mulugu. Yehova mwangoni ule ohomuitana Mozeji, liye ira: <<Udowe waawandele atu a muibalini mwa Jako, anno anaitaniwa Ana Izarayeli, wire: 4<Nyo mumala ona makalelo matene daairilena miyo aIjipitu na makalelo daukumihileni miyo Ijipitu kalaga nnga dutukunleni uhelani mmapepeloni mwa kakozi, miyo uvavihani fiyeda uli miyo uno. 5Mwa eno, mwavwelela mazu anafuna miyo wonga, mwaharihagamo yopangana inafuna miyo uwandelani, munokala mulogo waga osakulreya, mulogo ohiyana na malogo matene. Ineriha ilambo yatene ya vati, mwinnya gu miyo. 6Eto munokala umwene unafuna kutaga mikuto daga eto munokala mulogo waga otchena.> Ayo ba mazu anafuna we awandela Ana Izarayeli.>>

7Evale Mozeji ohotita mwangoni ule, aitana andimuwa a aIzarayeli, liye awandelamo mazu matene Yehova amuwandenle liye. 8Mwa enne Ana Izarayeli atene kohorumelaga vamohi ira: <<Jatene jiwongile Yehova, hiyo nnerege irana.>> Evale Mozeji ohotukulaga mazwale, liye muwandela Yehova ira kohorumela. 9Evale Yehova ohowonga na Mozeji ira: <<Miyo nnafuna dize muwari mwa murambo odiba ira diwonge na weyo, aIzarayeli kavuruwanaga, ira kawandege uroromela weyo malambo matene.>> Yehova awongele eno na mwasa oira Mozeji ohomuwandela mazu orumela kawongile aIzarayeli. 10Evale Yehova ohowonga na Mozeji akoka eraga: <<Udowe wa Ana Izarayeli, waasakanyede peno na metchelo ira kakale otchena#19:10 waasakanyede… ira kakale otchena: Agali kanimarihile iziwa makalelo Mozeji aasakanyeda liye aIzarayeli, inokala nnga liye ohawandela ira kahiye mabasa kalaba atu, kalobele, kaviwombeze mmirimani mwewa ira kaone akala aliwa kali apamene vamentoni va Mulugu, akala kokana yotega, kalrape. Eto kowandeliwa ira kafulre jowara jiwaeto kokamelihiwa gona na ahiyaniwa. (vs 15) eto kafulre jowara jiwa. 11Kakale okozeyene, mwasiwa ndawiyavano miyo vano Yehova nnotitela vamwangoni Sinayi vamentoni va atu atene. 12We Mozeji usakanye madilre mmambalo mwa mwangola ira ndawiyavano Ana Izarayeli atene kagwela, kagomele emo. Eto waawandele wire: <Kakalevo mutu unafuna baranyeda gwela nne kakalevo unafuna nyingala mutchindo mwa mwangola. Wenno unasakwinye mwango, unopiwa. 13Eto mwampaga, kakalevo unafuna muhinda na mandaye. So mbwenye avokiwe mabwe owu mafumo. Masiki kala mutu nari mwanainyama, apiwe. Mbwenye mwavwa palraza inlaga modibeliwa, tchi tempu inafuna nyo venya ira mwagwele mwangoni fiyeda mmadilreni mule.> >>

14Noira enne Mozeji ohotitaga mwangoni ule, liye dowa wa Ana Izarayeli, ambela asasanyedaga ira kakale otchena. Eto kohofulra jowara jiwa. 15Mozeji ohawandelaga eraga: <<Ndawiyavano mukale okozeyene. Kakalevo mutu unafuna gona na muhiyanaye.>>

16Nagakwakwanne siku naneraru nne, unde ufunaga tcha, mmwangoni mule movweya ndari doindjiva eto mojerimaga. Vazulu va mwango vohokuneleyaga na murambo odiba. Movweyaga eto ruma undimuwa wa palraza. Evale atu atene kagaonne makalelo a mwangole, kohoromaga ngurumela muwari mwa tatamo da misasani diwa mwafwanyeyaga atu. 17Mozeji ohakumiha atwale mmisasani mwiwa ira kadowe kagumane na Mulugu, aliwa dowa imela mutchindo mwa mwango. 18Fwanyeya ira ora yenne, mwango Sinayi watene otuwelaga utchi mwasiwa Yehova ohotitela mwangoni ule na makalelo a munlo. Utchiwa ali nnga utchi unakuma muhofuni. Eto mwango watene otekenyeyaga na makalelo ohokala a masika. 19Ruma wa palraza woulukulagave. Mwa ora yenno Mozeji awongaga, Mulugu omuwakulaga movweya nnga ndari.

20Yehova agatitile vazulu va mwango Sinayi vale, ohomuitana Mozeji ira adowe vazulu va mwango vale. Evale Mozeji ohogwela. 21Mozeji agagwenle mwangoni ule, Yehova ohomuwandelaga eraga: <<Utite tchineneva, udowe waawandele atu atene ira kahalupe mmadilreni mule ira kaze uno kadione. Tchoira kaira eno, anokwa atu adjindji. 22Eto anamakuta anno anadikwiveletcha, kavisakanyede ira kakale otchena tawiha ira miyo dagali Yehova nnaze daape.>> 23Evale Mozeji ohomuwandelaga Yehova eraga: <<Mbwiyeni, kalivo mutu unafuna lupa ira agwele mwangoni uno, mwasiwa nyo mohodiwandela ira: <Usakanye madilre uwerewerihe mwango watene wenna eto ubalre nnga nimburo notchena!> >> 24Yehova ohomuwandelagave mulombwana Mozeji eraga: <<Utite mwangoni uno, umutukule Arawu, mugwele vamohi. Mbwenye waawongena anamakuta vamohi na atu atene ira kahalupe madilre ira kaze uli miyo uno. Mwasiwa aliwa kalupa, miyo nnoapa.>> 25Evale Mozeji otita, dowa awandelamo aIzarayeli jatene jene jawongile Yehova.

Currently Selected:

Ezodu 19: iLolo

Highlight

Copy

Compare