Detoronomiyo 28

Upama okumela muwari monvwelela Mulugu

1Mozeji ohowongagave eraga: <<Nyo mwavwelela pama mazu a Yehova Mulugu wenyu, muharihagamo muwari moing'ana pama malamulo matene anna nnauwandelani miyo peno, Yehova Mulugu wenyu unouhelani vazulu kwaranya malogo matene a mwilamboni ya vati. 2Mwavwelela jiwongile Yehova Mulugu wenyu, mareliho anafuna za ufwanyani, ba ala: 3Mulugu unourelihani muwari mwa sidadi denyu, na mmindani mwenyu. 4Mulugu unourelihani ira mwaabalege ahima adjindji, unoreliha jolima ja mmundani mwenyu eto unoareliha ahima a jifuwo jenyu. Unoareliha ahima a ng'ombe dinyu vamohi na ahima a mabila enyu. 5Migogoda denyu vamohi na kariko denyu#28:5 kariko denyu: Tempu yenno ali basiya nomunyamo pawu. nnorelihiwa. 6Mwadowa unafuna nyo dowa, munerege relihiwa. Mwawelawo, munerege relihiwa. 7Amwidaninyu kavenya ira kawane na nyo, Yehova unerege sakanya ira mwaagondjihege. Amwidani akala kohovenya ira kaze kawane na nyo, kazaga anerege hara ndila imohive. Mbwenye madowelo, katawaga anerege balaleya kaharaga ndila tanu na mbinli. 8Yehova Mulugu wenyu unosakanya ira mukayena mareliho vatatani venyu vamohi na jatene jinalabege nyo na manda enyu eto unourelihani ilambo yenno inafuna liye uvahani. 9Nyo mwahariha malamulo a Yehova Mulugu wenyu wenyu eto mwaharaga ndila daye datene, Yehova unousakanyani ira mukale atwaye otchena nnga mwemo mulumbenle liye na nyo. 10Eto atu atene a mwilamboni ya vati anoza kaone ira nyo munaitaniwa na nzina na Yehova eto anerege uovani. 11Eto Yehova unourelihani muwari mouvahani ahima adjindji, jifuwo jidjindji na johanda jidjindji, muwari mwa ilambo yenno Yehova ulumbenle liye na makolo enyu ira auvaheni. 12Yehova unohula zulu ira arumbwihege muzongwe tempu yapama para mmundani mwenyu eto unoreliha mabasa matene anahindege nyo na mandinyu. Nyo munerege aboliha jengo malogo madjindjene, mbwenye nyo kamuza muboliha yengo ya mutu. 13Nyo mwavwelelaga malamulo a Yehova, Mulugu wenyu anno nnauwandelani miyo peno eto muharihagamo muwari moing'ana pama, Yehova unerege uhelani ira mukale muru hiya kala mwila eto munerege kala vazulu hiya kalaga vati. 14Eto nne kamuhiye mazu matene anna nnauwandelani miyo peno, kamuholowe muroma haraga muwononi odjana nari muwononi oromana, nyo romaga ahara amilugu amohiwene ira mwaatamalelege aliwene.

Ubure unafuna kumela mohonvwelela Mulugu

15<<Mbwenye mwaviringaniha mazu awongile Yehova Mulugu wenyu, mwahakale atu oharihamo muwari moing'ana pama malamulo na mangano a Yehova Mulugu anna anauwandelani miyo peno, matembelrelro anafuna za ufwanyani, ba ala: 16Mulugu unoutembelrelrani muwari mwa sidadi denyu vamohi na mmindani mwenyu. 17Migogoda denyu vamohi na kariko denyu nnomala tembelrelreya. 18Mulugu unoutembelrelrani ira mwahaabalege ahima adjindji, unotembelrelra jolima ja mmundani mwenyu eto unotembelrelra jifuwo jenyu jatene, romela ng'ombe dinyu vamohi na mabila enyu ira jaharelege pama. 19Mwadowa unafuna nyo dowa, munerege tembelrelreya. Mwawelawo, munerege tembelrelreya.

20<<Yehova unourumihedani matembelrelro madjindji eto muwari mwa nyo kamunakalege vwanana eto munerege wenda mpungwe mpungwe muwari mwa jatene jinalabege nyo ante mufiyede tolotchiwa mobaranya eto mufiyede dimela na mwasa wa jolaba jenyu jabure jejo jilabile nyo mmuhiyaga Yehova. 21Yehova unourumihedani maurenda owopiha fiyeda mumale tolowa atene ilambo yenno inafuna nyo za tukula ira ikale yenyu. 22Yehova unoubulelihani na urenda okotomula, na febiri, zimbelana, kaha maningo, eto jozala jenyu jinerege umma na mwasa ohokalawo muzongwe, eto jozala jenyu jinerege djiwa na kukuwe eto unguwi unerege vundiha. Jabure jatene jeji jinerege uharani ante mufiyede dimela. 23Zulu unakalege nnga wa mukuwa, kunarumbwege muzongwe eto teya inakala youmma nnga momba. 24Vamalroni va muzongwe wenno Yehova unarumbwihetcha liye, muzongwe wenyu nnakalege tumbulru vamohi na teya. Tumbulru vamohi na teya jinerege umorelani ante mufiyede tolowa. 25Yehova unosakanya ira amwidaninyu kavenya ira kaze kawane na nyo, kaugondjihegeni. Mwera muvenye ira mudowe mwawane, munerege dowa ndila imohive. Mbwenye matawelo a wewule, munerege balaleya muharaga ndila tanu na mbinli. Eto maumwene matene a mwilamboni ya vati kauonani, anokala orendjeyene na mwasa wa makalelo abure munafuna nyo kana. 26Mitembo denyu nnerege kala jodja para mbalrame da zulu nari vinyama nnawenda vati, tchoira kavanaoneyege mutu mmohi ohala ira atamangihege mbalrame na vinyama dile. 27Yehova unoza autongeni na anakadjindji anno aaporotchilena liye aIjipitu, vamohi na vilonda da vizimbela, vamohi no niina wa maningo, jejo jahanawanda nyo vulumuwa. 28Yehova unouvahani mihala eto unokwiha meso enyu ira mwahaonege eto unouviringanihani mmuruni mwenyu. 29Nyo munerege wambaselra jengo na ntana nnga maliba haona awambaselraga jengo na isi inna liye. Eto nne ndila denyu kamunakayegena upama. Nyo mbwenye munakalelege zuzumihiwa vamohi no beliwa malambo matene. Mbwenye mwa jatene jejo kanakalavo mutu unafuna za uvunelani. 30Mutu unerege mbanyelra namwali, mbwenye unafuna za mugonana unakala mutu mmohiwene. Munerege manga nyumba dinyu, mbwenye kamunakalegemo eto munerege zala minda da uva mbwenye jovaha jiwa kamunadjege. 31Ng'ombe dinyu nnerege piwa muing'anaga, mbwenye kamunadjege nne pindula imohi. Aburu enyu anerege tukuleliwa umohi uwa wene nyo muing'anaga. Mbwenye kamuza muwelihediwa. Mabila enyu anerege vahiwa mmandani mwa amwidaninyu, mbwenye kanakalavo mutu unafuna za ukamihedani. 32Ahiminyu a anapongwe na anavihiyana anerege tukuliwa kadowe kaavahege atu a malogo amohiwa nyo muing'anaga. Nyo munerege asauwela malambo matene, mbwenye kamuza mukana makalelo oawelihawo. 33Johanda ja mmundani mwenyu jejo jaonele nyo goyi na jolaba jenyu jatene jinerege djiwa na atu amohiwene anno mwahaaiziwile nyo. Eto nyo munerege zuzumihiwa vamohi no ireliwa jabure malambo matene. 34Miru denyu nnoza diviringane na mwasa wa jengo jinafuna nyo za onaga na meso enyu. 35Yehova unoza auporotcheni na anakadjindji owopiha mmabodoni mwenyu vamohi na mendo denyu, anakadjindji anno kiza kavola, romela vati va vanyalo ante dowa fiya muruni.

36<<Yehova unoza autukuleni nyo vamohi na mwene wenyu unafuna nyo muhambiha, adowe auvahedeni mmandani mwa malogo amohiwa anno mwahaaiziwile nyo, nne makolo enyu kahaaiziwile atu. Mwadowa wewule, munerege alaba amilugu amohiwa osakanyiwa na mitengo na amohiwa osakanyiwa na mabwe. 37Eto atu a malogo anno Yehova unafuna liye udowanani anerege rendjeya kaona zela jejo juireyeleni. Aliwa anerege wonga mazu abure wa nyo eto anerege upetani. 38Nyo munerege zala mbewu pwi, mbwenye munahandege vang'ono, tchoira miserebo nnerege takuna. 39Munerege zala minda da uva, mulimelege pama, mbwenye uva uwa kamunahatchege eto nne vinyuwa kamunang'wege, tchoira kohokalawo anamingu anafuna za djaga. 40Eto mwatene mugomenle ilambo yenyu munerege zala mitengo da azeti, mbwenye nyo kamunakayegena makura ozoliha maningo enyu. Mwasiwa jovaha jiwa jinerege vareyamo jahanawarale. 41Eto nyo munerege abala ahima a anapongwe na ahima a anavihiyana, mbwenye ahima munaabelege nyo kinakalege enyu, mwasiwa anerege tukuliwa ira kakale azari ilambo imohiwene. 42Mitengo dinyu vamohi na jozala jenyu ja mmindani jinerege djiwa na pombo. 43Eto mofutukula, atu oza anafwanyeya mwilamboni mwenyu anoza kakale vazulu, nyo mukale vati. 44Nyo munorungunuwa mubolihege jengo jewa, mbwenye aliwa kiza kaing'anela boliha jengo jenyu. Aliwa anokala muru, nyo mukale mwila. 45Matembelrelro matene anna anouzelani, karome uharani ante kafiyede ufwanyani ante nyo atene mufiyede tolowa, mwasiwa nyo kamufunne vwa mazu a Yehova Mulugu wenyu ira muharihege malamulo aye, na mangano aye, anno uwandenleni liye. 46Matembelrelro matene anna anaza kakale yotikiniha vamohi na ionihedo zela wa nyo vamohi na ahima enyu malambo a mukalakala.

47<<Na mwasa ohofuna mulaba Yehova Mulugu wenyu na mmirimani mwenyu mwatene vamohi na makalelo apama zela japama jatene juvahileni liye, 48munoza murome alaba amwidaninyu anno Yehova unafuna liye aruma wa nyo. Mwa tempu yenno munoza mukayena ndala, na ntona, vamohi na usiwa eto munoza musauwelege jatene. Eto munoza mukapatchihiwe nigologolo na momba munikohini mwenyu fiyeda mumale tolowa atene.#28:48 munoza mukapatchihiwe nigologolo na momba munikohini: Ku wonga aliwa kafuna kavahiwe uzari worutcha valukulu. 49Eto Yehova unoza avenyihe nlogo nokumela olapela wene ira nize niwane na nyo, nlogo nokumela magomo wa ilambo ya vati, nlogo novava nnga kakozi asayaga, nlogo neno iwongelo yewa mwahanavwa nyo, 50eto nagali nlogo nowopiha, nlogo neno nahanaariheda makolo, nne nahanaawendela ahima tangaranga. 51Aliwa kaza, anerege atakuna ahima a anavinyama enyu eto anerege dja jovaha ja mmundani mwenyu. Aliwa kiza kauhiyedani yengo ili yatene yokumela mmundani, nne vinyu, nne azeti, nne ahima a ng'ombe denyu, nne ahima a mabila enyu. Aliwa anouiranani jatene ejo ante kafiyede utolotchani. 52Aliwa anoza kaurindjegeni muwari mwa sidadi datene dedo munafuna nyo za kalaga, fiyeda kagwihege miru dolapa eto dolimba dedo danyindela nyo. Aliwa anoza karindje sidadi denyu datene, ilambo yenyu yatene yenno inauvahani Yehova Mulugu wenyu. 53Evale nyo munoza mufiyedege atakuna ahima munaabalege nyo, mutakunege nyama da ahima enyu a anapongwe na anavihiyana anafuna uvahani Yehova Mulugu wenyu.#28:53 nyo munoza mufiyedege atakuna ahima munaabalege nyo: Jeji na ibaribari johofiyeda ireya. AIzarayeli kohorindjiwa na amwidaniwa, aliwa kala ofungeleyene musidadi mwiwa, hawandaga kuma. Evale jodja johofiyeda mala, voira muwari mwa sidadi mule kamwalimiwa, atu kofiyeda mwezo oadja ahimiwa. Nione 2 Amwene 6:24-29. Jatene ejo munaza muiregena mwagamanle rindjiwa na amwidani, mwagali muwari mwa sidadi, kagamanle usanyani na makalelo ohokala a masika. 54Jinoza jifiyede ireya ira mulombwana wenne afwanyeya agali ofwaseya eto oakukumuwela afwaye kwaranya atu atene, aze afiyedege muimana yodja mbalaye, nari muhiyanaye wenno amuziveliwetchetcha liye vamohi na ahimaye amohiwa anno anahale. 55Liye adjaga nyama ya mwanaye, unoza aaimane ahimaye amohiwa ohala ale. Liye unoza airena jatene ejo mwasiwa kilivo yodja ili yatene inafuna liye halana na mwasa wa amwidaninyu anno anafuna urindjani muwari mwa sidadi denyu datene. 56Eto muhiyana wenne afwanyeya agali ofwaseya eto oakukumuwela afwaye kwaranya atu atene eto wenno ahadediha ira unoza anyingalihege nnyalo naye vati, liye unoza amuimanege yodja mamunaye wenno amuziveliwetchetcha liye, nari mwanaye wa mulombwana vamohi na wa muhiyana. 57Liye abala, unoza ampe mwanaye mutete, arome mudja vamohi na mazadayene mozembiha ahaavahilemo ahimaye amohiwa ohala ale, voira liye kanna yodja ili yatene na mwasa ozuzuma na amwidani anno anafuna za rindja sidadi denyu kauzuzumihagani.

58<<Nyo mwahakale oing'ana pama ira muharihegemo mazu matene a mmalamuloni mu anna anafwanyeya kagalrembiwe mulivuruni mu eto mwahaovege nzina nindimuwa eto nowopiha na Yehova Mulugu wenyu, 59Yehova unouzelanani nyo vamohi na ahiminyu jabure jotikiniha jindimuwa, jodibeliwa, vamohi na marenda abure malukulu odibeliwa. 60Eto Yehova unoza arungunutche maurenda matene a Ijipitu anno mwaova nyo, auvaheni nyo. Jabure jatene ejile jinoza juubandeni nyo. 61Eto Yehova unouzihedani marenda matene vamohi na vitukwa jimohi jiwa jatene jahalrembiwe mulivuruni mwa malamulo mu, ante atene mufiyede tolotchiwa. 62Na mwasa ohofuna vwelela mazu a Yehova Mulugu wenyu, munoza muvunguwe, mukale a vang'ono, agali mwali atu oindjiva nnga nyenyedi da zulu. 63Na makalelo nnga Yehova ahagalala liye na nyo, auirelagani upama, auindjivihagani, mofutukula Yehova unoza ahagalale aubwanyulagani, autolotchagani. Munoza muduliwe muwari mwa ilambo yenno inafuna nyo dowa tukula ira ikale yenyu. 64Eto Yehova unoza aumwadeni vari va malogo matene, kuma magomo a wu a ilambo ya vati dowa fiya magomo amohiwa a wu. Wewule nyo munerege alaba amilugu anno muli nyo mwahanaaiziwege, nne makolo enyu kahaaiziwile atu. Munerege tamalela amilugu osakanyiwa na mitengo vamohi na amilugu osakanyiwa na mabwe. 65Eto nne nyo kamuza mukana vuma muwari mwa malogo anne, nne kamuza mukana vonyingaliha nnyalo nenyu ira muvume. Tchoira wewule Yehova unoza auvaheni mirima doova eto meso enyu anoza kafile eto munoza mukayena kukumuwa ulukulu. 66Ingumi yenyu inoza ikale ya kaya kaya. Munoza mukalege orendjeyene ntana na mahiyu eto murima wenyu kanakala ogarateya mwaumbuwela zela kalawo wa ingumi yenyu. 67Unde watcha, na mabebehi munafunege nnga unde udibe eto unde wadiba, munafunege nnga unde wagatchile. Jatene jejo munairelege na mwasa oova munafuna nyo kana mmirimani mwenyu vamohi na jatene jinafuna nyo onaga na meso enyu. 68Eto Yehova unoza augweliheni mwadeya, auwelihedeni Ijipitu, muharaga ndila yenno yauwandenleni miyo ira: <Ndila yenna kamuza muona akoka.> Mwadowa wewule alombwana vamohi na ahiyana munerege viguliha mmandani mwa amwidaninyu ira mukalege azari. Mbwenye kaza aoneya mutu ofuna ugulani.>>

Currently Selected:

Detoronomiyo 28: iLolo

Highlight

Copy

Compare