Detoronomiyo 29
29
Yehova ohowendjeda Yopangana yaye na aIzarayeli
1Ala ba mazu a yopangana imohiwa Yehova amuwandenle liye Mozeji mwilamboni mwa Mowabe ira asakanye na Ana Izarayeli, awendjedaga yopangana yasakanyile liye mwango Orebi. 2Mozeji ohaitanihaga aIzarayeli atene, liye roma awandela eraga: <<Nyo muhumala ona jatene jairile Yehova ilambo ya Ijipitu vamentoni venyu, amuirelaga mwene Farawu vamohi na anamalabaye atene, vamohi na ilambo yaye yatene. 3Nyo muhuona na meso enyu joxixa jilukulu vamohi na jionihedo na jotikiniha jilukulu jairile liye. 4Mbwenye fiyeda peno Yehova kauvahileni murima oira muonelremo, nne meso oira muone, nne mabaru oira muvwe. 5Yehova unawonga ira: <Miyo duhuwendihani yaka 40 muisalesaleni. Muwari mwa yaka datene dedile, jowara jenyu kajaduwile, nne xineli denyu dawara nyo kadalanle. 6Nyo eto muwari mwa malambo anne kamwadjile pawu, kamwang'wile vinyu, nne yong'wa ili yatene yolrezelriha. Jatene jejo jaireyile ira muwande iziwa ira miyo dili Yehova Mulugu wenyu.> 7Noira eno, mwagafiyile nimburo neni nnafwanyeya hiyo ni, mulombwana Seyoni mwene wa Ejiboni, na Oge mwene wa Bazani kohomaruwa, aliwa za gumana na hiyo ira niwane. Mbwenye hiyo nohagondjiha. 8Noira enne, nohawaka ilambo yewa hiyo agawela nlogo na Rubeni vamohi na nlogo na Gadi vamohi na metadi ya nlogo na Manasesi ira ikale yowatchela yewa. 9Inafwanela mukoye mazu a yopangana ila eto mukwakwanelihedege ira jatene jinalabege nyo juwendelegeni pama.
10<<Nyo atene peno munafwanyeya eva vamentoni va Yehova Mulugu wenyu. Romela asogolrelri a malogo enyu, andimuwa enyu, vamohi na anamatonga enyu, alombwana atene a Izarayeli, 11ahiminyu vamohi na ahiyaninyu vamohi na atu oza anafwanyeya vamohi na nyo vamisasani venyu, romela aliba urebelani kuni vamohi na aliba urungelani mahindje. 12Nyo atene munafwanyeya eva ira muwande volowa muwari mwa yopangana ya Yehova Mulugu wenyu, yopangana yenno inasakanya liye na nyo muwari molumbela, 13ira peno liye ausakanyeni mukale atwaye eto liye akale Mulugu wenyu nnga mwemo mwapanganne liye na nyo eto nnga mwalumbenle liye na makolo enyu Abarahamu, Izaki na Jako. 14Yopangana ila inasakanya miyo muwari molumbela, kannasakanya na nyove bahi, 15nnasakanya eto vamohi na mutu uli watene unafwanyeya agaimenle na hiyo vamentoni va Yehova Mulugu wehu eto nnasakanya yopangana ila vamohi na mutu wenne ahanafwanyeya eva vamohi na hiyo siku na peno.
16<<Tchoira nyo muhumala iziwa makalelo matene nanna hiyo ilambo ya Ijipitu vamohi na makalelo matene nivirile hiyo vari va malogo amohiwa, malogo anno muvirile hiyo. 17Nyo muhumala ona jotakaletchetcha janna atu, vikwamutu diwa dosema, jengo josakanyiwa na jimiri vamohi na mabwe, parata vamohi na oru. 18Nona, polre polre tawiha ira muwari mwa nyo unaze akalemo mulombwana nari muhiyana, owu nivande, owu nlogo neno nnafuna kana murima omuhiya Yehova Mulugu wehu, dowa roma alabaga amilugu a malogo nnaawonga miyo. Tchoira mwaroma ahara amilugu amohiwa inakala nnga mutchitchi unapuwa, aulukula, avahaga jovaha jowawa na jopa. 19Eto kakalevo mutu uni agavwile mazu matene a matembelrelro ala, aroma virelihaga mmirimani mwaye airaga: <Kavili makani. Miyo podi wendaga malringana makalelo anafuna miyo, kilivo yabure inafuna diireyela.> Mwasiwa wenno unaire eno unozana matembelrelro romela atu abure vamohi na atu amohiwa apama. 20Yehova kaza amukurumuwela. Mofutukula takaleliwa vamohi na sandje ya Yehova jinohinda zela mutu wenno eto matembelrelro matene kalrembiwe mulivuruni mu anomuzela. Eto Yehova unotimiha nzina naye ilambo ya vati. 21Yehova unommwalaniha na malogo matene a Izarayeli ira amukutulele jabure jowopiha, mokwakwanela na matembelrelro matene a yopangana, anno anafwanyeya kagalrembiwe muwari mwa livuru na malamulo ni.
22<<Mwa eno, jejo jaireya, anamabaliwelamo a musogolro, romela ahiminyu anno anafuna za baliwaga musogolro, vamohi na aliba za okumela vilambo dolapela, kaona jabure jatene jinafuna kana ilambwela vamohi na maurenda anno Yehova unafuna liye zuzumihana ilambwela, 23eto kaona ilambo yatene yenna teya yagamanle tumeyiwa na mabwe onuka vamohi na mwinnyu, kaona yahazaliwaga mbewu ili yatene eto nne yahamelaga yengo, nne yahakagana mpinda, molingana na makalelo yatolotchiwe sidadi ya Sodoma na Gomora, na Adima, vamohi na Zeboyimi sidadi dedo Yehova atolotchile liye no takaleliwa vamohi na uwali waye, 24malogo matene anna kaona jatene ejo, anoza kawongege kairege: <Kodi mwasiwa gwa nni Yehova airagana eni ilambwela? Kodi mwasiwa gwa nni Yehova aza atakaleliwaga na uwali ohokala wa masika?> 25Evale anoza kawakuliwege ira: <Mwasiwa aliwa koholramwisa yopangana ya Yehova Mulugu wa makolo ewa. Tchoira Yehova wewa ohosakanya yopangana na aliwa agaakumihile Ijipitu. 26Noira eno, aliwa muhiya Yehova wewa, dowa roma alabaga amilugu amohiwa, roma akokorelaga aliwene. Amilugu anno kahaaiziwile atu eto anno Yehova aakamelihile liye. 27Nona Yehova ohotakaleliwa na makalelo ohokala a masika, azagana matembelrelro matene kalrembiwe mulivuruni mu. 28Yehova uhadula mwilamboni mwewa na uwali, no takaleliwa wohokala wa masika vamohi no anyanyala, liye dowa atatilela ilambo imohiwa nnga munaonela hiyo peno.>
29<<Jengo jokoyeya mwinnya gu Yehova Mulugu wehu. Mbwenye jengo joiziweya jinafwanyeya jagali jehu vamohi na ahimihu malambo a mukalakala ira nikwakwanelihedege mazu matene a malamulo ala.>>
Currently Selected:
Detoronomiyo 29: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
