Detoronomiyo 10
10
Mozeji ohawumbutcheda aIzarayeli zela mabwe anembinli a malamulo
1Mozeji ohowongagave eraga: <<Mwa tempu imohive yenne Yehova ohodiwandelaga eraga: <Useme mabwe menli nnga matabwa, olingana na mabwe oroma ale eto usakanye kaxa ya matabwa. Wagamanle sakanyeda ejo ugwele mwangoni uno akoka. 2Miyo nnolrembavo mazu matene kafwanyeya vamatabwani oroma ale anno utwile we. Damala lremba, utukule uhele mukaxani mule.> 3Mwa enne miyo dohosakanya kaxa ya matabwa a mikexa eto dohosema mabwe menli nnga matabwa, olingana na mabwe oroma ale, miyo gwela mwangoni dagahidedile mabwe menli ale mmandani mwaga. 4Mwa enne Yehova oholremba vamabweni vale mazu matene nnga alrembile liye mabwe oroma ale, anno kafwanyeya kagali Malamulo Kumi anno Yehova auwandenleni liye muwari mwa munlo, siku nagumannege nyo mwangoni. Evale Yehova ohotukulaga mabwe osemiwa nnga matabwa ale, liye divaheda. 5Noira enne, miyo dohorungunuwaga, miyo tita mwangoni ule. Mwa enne dohelaga mabwe osemiwa nnga matabwa ale muwari mwa kaxa yenno yasakanyile miyo. Ante fiyeda peno anafwanyeya muwari mwa kaxa emule nnga mwemo mwadirumile Yehova.>>
6(Mwa enne Ana Izarayeli kohomaruwaga Beroti-Bene-Jakani, aliwa dowa fiya Mozera. Evale mulombwana Arawu#Numero 20:28 ohokwaga, liye koyiwa wewule. Mulombwana Arawu agakwile, mwanaye Eliyazari ohala vamalroni vaye, liye labaga mabasa a unamakuta. 7Nokuma evale kohomaruwa kadowaga Gudigoda. Evale kagakumile Gudigoda, kohodowaga Jotibata, ilambo yenno wafwanyeya mwana mihindje didjindji.
8Mwa tempu imohive yenne Yehova ohosakulra nlogo na Levi ira katukulege Kaxa ya Yopangana ya Yehova, kakalege vamentoni va Yehova, kamulabege eto ira aarelihe mwa nzina naye nnga vinaira atu fiyeda siku na peno.#10:8 nnga vinaira atu fiyeda siku na peno. Ku wonga fiyeda tempu yenno yalrembiwa mazwala, jejo joireyave. 9Nona aLevi kinna pandi ya ilambo inafuna atu watchela vamohi na abaliwa. Tchoira Yehova gunafwanyeya agali yowatchela yewa, nnga mwemo mwaawandenle Yehova Mulugu wenyu.)#10:9 mwemo mwaawandenle Yehova Mulugu wenyu: Mulugu ohovayela awandela aLevi ira aliwa mabasiwa kafuna kakale laba ja Mulugu va Musasa wa Yehova nari muwari mwa sidadi. Mulugu eto ohawandela ira kinakana ilambo yewa nnga atu a malogo amohiwa a aIzarayeli. So kakala mwilamboni mwa afwiwa. (Numero 18:20,24)
10Mozeji ohowongagave eraga: <<Fwanyeya ira miyo dagali mwangoni ule dohomalaga malambo 40 ntana na mahiyu nnga jairile miyo fendo yoroma. Eto masiki fendo yenna Yehova ohodivwa akoka. Yehova kafunile utolotchani. 11Evale Yehova ohodiwandelaga eraga: <Kavenya, udowe waasogolrelre atu muulrendoni ira kadowe kavolowe eto katukule ilambo yenno yalumbenle miyo avaha makolo ewa.>
Mozeji ohakokomeza aIzarayeli ira kanvwelelege Yehova
12<<Izarayeli kavuruwanani. Yehova kanafuna yengo imohiwa ili yatene nari. So liye unafuna ira mmuovege Yehova Mulugu wenyu eto muharege ndila daye datene, mmuzivelege eto mmulabege Yehova Mulugu wenyu na mmirimani mwenyu mwatene, no kalawo wenyu watene, 13eto muharihege malamulo a Yehova vamohi na mangano aye anno nnauwandelani miyo peno para upama wenyu.
14<<Tchoira zulu vamohi na zulu-zulu, na ilambo yatene va vati vamohi na jatene jinafwanyeyamo, jatene jinafwanyeya jagali ja Yehova Mulugu wenyu. 15So mbwenye Yehova ereve asakulra makolo enyu ira aazivelege. Eto Yehova ohousakulrani nyo ahimiwa muwari mwa atu atene nnga munaonela nyo peno. 16Nona inafwanela muviinele mmirimani mwenyu, kamukale atu ohofuna vwa. 17Tchoira Yehova Mulugu wenyu, gu Mulugu wa amilugu atene eto gu Nabwiya wa anabwiya atene. Liye gu Mulugu mundimuwa, wa kopolo eto gu Mulugu owopiha. Liye kanna nsakulro eto kanakunyariwa ira awande mutonga mutu na makalelo apama. 18Liye gu Mulugu okana matongelo a ibaribari para anapawi#10:18 anapawi: Muwari mwa Bibiliya kawongaga zela anapawi, anawonga zela mwana ahanna babaye. Hiya mwana ahanna mmaye. na amakwele a ahiyana eto unoazivela atu oza, liye avahaga jodja na jowara. 19Nona inafwanela mwaazivelege atu oza, tchoira na nyenne mwafwanyeya mwagali atu oza mwilamboni mwa Ijipitu.
20<<Mmuovege Yehova Mulugu wenyu, mmulabege liyene eto mmuhidede liyene bahi eto mwafunaga lumbela, mulumbelege na nzina naye bahi. 21Mmutamalelege liyene bahi mwasiwa liye guli Mulugu. Tchoira liye gusakanyile jotikiniha jatene jejo jinaona nyo na meso enyu. 22Makolo enyu kadowaga Ijipitu kadowile atu 70. Mbwenye peno Yehova Mulugu wenyu uhuindjivihani na makalelo ohokala a masika nnga nyenyedi da zulu.>>
Currently Selected:
Detoronomiyo 10: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
