Detoronomiyo 11
11
Mozeji ohawandela aIzarayeli zela muzivela Yehova no nvwelela
1Mozeji ohowongagave eraga: <<Mmuzivelege Yehova Mulugu wenyu eto muharihege jejo jinaurumegeni liye na mangano aye na jotonga jaye vamohi na malamulo aye malambo matene. 2Inafwanela muumbuwele pama zela inafuna miyo wonga. Kannawonga na ahiminyu anno kahaiziwile nne kahaonne jaira Yehova. Nnawonga na nyo muonne ira inafwanela muumbuwele zela jofundjiha ja Yehova Mulugu wenyu, na undimuwa waye na ndanda naye na kopolo vamohi na muwono waye owongowa 3na jionihedo jaye vamohi na joira jaye jatene ejo jamuirele liye Farawu mwene wa ilambo ya Ijipitu vamohi na ilambo yaye yatene. 4Muumbuwele eto zela ubure watene Yehova airele liye nikuru na anyakondo a Ijipitu vamohi na kavalo dewa na aaterelado ewa, jejo Yehova agudumeyile liye na mahindje a Bara Yofila tempu yauharani atu. Yehova ohatolotcha atene, fiyeda siku na peno. 5Muumbuwele eto zela Yehova juireleni liye muisalesaleni ante nyo fiyeda nimburo neni nnafwanyeya hiyo peno, 6zela jejo Yehova amuirele liye mulombwana Datani na Abirawu, ahima a mulombwana Eliyabe, muzula wa Rubeni, makalelo teya yahunle atu mulomo, ifiyeda amida aliwa vamohi na atu atene a vande viwa, na misasa diwa dene, vamohi na jatene janna atu vamentoni va aIzarayeli.#11:6 makalelo teya yahunle atu mulomo, ifiyeda amida aliwa: Zela muselu wenno, nione Numero 16:1-35. 7Tchoira nyo muhuona na meso enyu mabasa mandimuwa matene alabile Yehova.
8<<Nona, inafwanela muharihege malamulo matene anno nnauwandelani miyo peno ira mukayena kopolo dowanda volowana ilambo yenno inafuna nyo dowa tukula ira ikale yenyu, 9eto ira malambo enyu kaindjive ilambo yenno Yehova alumbenle liye na makolo enyu ira aavahe aliwa vamohi na ahimiwa, ilambo yenno munafwanyeya mukaka na nuwi pwi pwi. 10Tchoira ilambo yenno inavolowa nyo ira mwatukule, tchi ilambo yohiyana na ilambo ya Ijipitu yenno ikumile nyo. Tchoira nyo mwagali ilambo ya Ijipitu mozala mbewu dinyu eto moregari minda diwa nnga minda da orta. 11Mbwenye ilambo yenno inafuna nyo dowa tukula ira ikale yenyu, inafwanyeya yagali ilambo ya mwango vamohi na madabo. Teya ya wewule inanyetihiwa na mahindje a muzongwe okumela zulu. 12Inafwanyeya yagali ilambo inaing'aneliwa na Yehova Mulugu wenyu. Meso a Yehova Mulugu wenyu anafwanyeya wewule tempu datene, kuma maromelo fiyeda mamalelo wa yaka.>>
Mozeji ohawandela aIzarayeli zela upama wafuna atu kana muwari monvwelela Yehova
13Mozeji ohowongagave eraga: <<Mwakala atu oharihamo pama malamulo nnauwandelani miyo peno, mwakala atu omuzivela Yehova Mulugu wenyu eto mwakala atu omuhara liye na mmirimani mwenyu mwatene, no kalawo wenyu watene, 14liye unouvahani muzongwe mwilamboni mwenyu tempu inarumbwetcha liye, roma muzongwe oroma fiyeda muzongwe ogomiheda ira muwande kana johanda japama ja mmundani, vamohi na vinyu vamohi na azeti wenyu. 15Eto unomeliha mpinda mukokolani para jifuwo jenyu. Eto zela nyo, jodja jinafuna liye uvahagani, munerege dja mufiyedege rumbala. 16Nona, polre polre tawiha ira murima wenyu unanyengiwe eto munarome holowa mwaaharaga amilugu amohiwene eto mwaakokorelaga vamentoni vewa. 17Tchoira mwaira eno, Yehova unotakaleliwe na makalelo ohokala a masika zela nyo eto unofunga zulu ira mwilamboni mwahakale mahindje eto teya yahavahege jovaha. Era eno mohodibeliwa munagomela dimela ilambo yapama yenno inafuna uvahani Yehova.
18<<Mbwenye inafwanela mukoye mazu anauwandelani miyo ala mmirimani mwenyu eto muwari mokalawo wenyu eto mwaapotege mazwala vandandani venyu ira ikale ionihedo eto mwapotege mazwala vakoveni venyu, 19eto mwaafundjihege ahiminyu ora ili yatene mwagarati vande venyu, nari mwawendaga mundila, nari mwagonantigi, nari mwavenyaga. 20Eto mwaalrembege mazwala vakaxiluni na vamusuwoni va nyumba denyu, 21ira nyo vamohi na ahiminyu malambwinyu kaindjive ilambo yenno Yehova alumbenle liye avaha makolo enyu ira nyo mukalegemo malambo matene anafuna kalawo zulu na ilambo ya vati.
22<<Tchoira nyo mwakala atu oharihamo muwari moing'ana pama malamulo matene anna nnauwandelani miyo ira muharihege, mwakala atu omuzivela Yehova Mulugu wenyu, mwaharaga ndila daye datene eto mwakalave omuhidedene liye, 23Yehova na liyene unodowa vasogolro venyu aatamangihemo malogo matene anafwanyeyamo. Mwa eno, nyo munodowa mwatukule vilambo da malogo mandimuwa eto a kopolo oukwaranyani nyo ira vilambo dewa dikale denyu. 24Ilambo yatene munanyingalihe nyo nnyalo nenyu, inoza ikale yenyu. Madilriwa anafuna karome muisalesaleni, dowagave ante mwango da Libano. Eto zela pandi imohiwa, madilriwa anafuna karome muhindje Eufarati fiyeda bara Mediteraniyo. Ilambo yatene yenna inokala yenyu. 25Kalivo unafuna za wanda imela vamentoni venyu. Yehova Mulugu wenyu unosakanya ira ilambo yatene ya Kana inanyingale nyo, atu anafwanyeya wewule kauovegeni eto kangurumelege nnga muuwandenleni liye.>>
Mareliho vamohi na matembelrelro
26Mozeji ohowongagave eraga: <<Miyo peno nnohela vasogolro venyu mareliho vamohi na matembelrelro. 27Nyo mwakala atu ovwelela malamulo a Yehova Mulugu wenyu anno anauwandelani miyo peno, munowatchela mareliho. 28Mbwenye mwahafune vwelela malamulo a Yehova Mulugu wenyu eto mwaroma hiya ndila yenno inauwandelani miyo peno muroma ahara amilugu amohiwa anno mwahaaiziwile nyo, munagomela watchela matembelrelro.
29<<Nona, Yehova Mulugu wenyu auvolotchihani ilambo yenno inafuna nyo dowa volowa ira mwatukule, inafwanela mwawongege mareliho vazulu va mwango Jerizimi eto matembelrelro mudowe mwawongege vazulu va mwango Ebali.#11:29 mwawongege mareliho vazulu va mwango Jerizimi eto matembelrelro mudowe mwawongege vazulu va mwango Ebali: Jerizimi na Ebali dali mwango minli dowandamelana eto dera ing'anana. Mozeji ohawandela aIzarayeli ira kavolowa ilambo ya Kana, malogo matanu na nimohi kaimele mwango Ebali, malogo mamohiwa matanu na nimohi kaimele mwango Jerizimi. Ali ira ale kafwanyeya mwango Jerizimi kawonge makalelo oira mutu arelihiwe. Eto ale kafwanyeya mwango Ebali kawonge makalelo oira mutu atembelrelreye. Nione Detoronomiyo 27:11-14. Fwanyeya ira aIzarayeli kagavolowile ilambo ya Kana, kohoirana nnga mwarumiwe atu. (Jozuwe 8:33-35) 30Mwango minli di, nnafwanyeya kombela ya muhindje Jordawu, pandi ya mavirelo wa nzuwa, mwilamboni mwa akuda Kana anno anafwanyeya ilambo ya Araba sogolro wa Jiligali, wandamelana mitengo dilukulu da karvaliyo da More. 31Tchoira nyo tchineneva munafuna mulambuwe muhindje Jordawu, mwavolowe ira mwatukule ilambo yenno inauvahani Yehova Mulugu wenyu. Mwatukula ilambo yenno, mwakalamo, 32inafwanela muing'ane pama ira muharihegemo mangano na jotonga jatene jinauwandelani miyo peno.>>
Currently Selected:
Detoronomiyo 11: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
