1 Amwene 19

Eliya ohomutawa Jezabeli

1Akabe ohomuwandela muhiyanaye Jezabeli zela jatene jairile Eliya eto zela makalelo aapile liye anamafiyiheda a mulugu Baali ale na supada. 2Na mwasa wenne, Jezabeli ohomurumaga mutu ira adowe wa Eliya amuwandele ira: <<Weyo wafiyeda metchelo ora nnga yenna miyo dahaupile nnga waapile we anamafiyiheda ale, amilugu kaditonge na makalelo anafuna atu.>> 3Evale mulombwana Eliya agavwile enne, ohoovaga, liye maruwa, roma tamanga ira ahapiwe, liye dowa sidadi ya Beriseba mwilamboni mwa Juda. Agafiyile Beriseba, liye amuhiyile namalabaye wewule.

4Agamuhiyile namalabaye ule, liye ohovolowelaga mukokolani, liye roma wenda siku nompumbula. Mwa enne ohodowaga, liye garati vati va nfulri wa mwana mutengo mmohi eni. Agagaratile evale, oholobelaga avepaga ukwa eraga: <<Ante va, ikwakwana. So Yehova diwakeni ingumi yaga, tchoira miyo kadili wapama akwaranya makolo aga.>> 5Noira enne, ohogonantigi vati va mwana mutengo vale, liye fiyeda gonelavo. Evale mungelro ohozaga, liye musakwinya amuwandelaga eraga: <<Kavenya udje.>> 6Mwa enne Eliya againg'anne miruzuni waye, ohoonaga pawu yowotchiwa vazulu va makalra a munlo vamohi na jaro ya mahindje. Mwa enne ohodjaga, liye ng'wa, nomala liye gonanti akoka. 7Evale mungelro wa Yehova ule ohowelaga za musakwinya akoka, liye muwandela eraga: <<Kavenya udje, mwasiwa ulrendo unadowa we uhulapa, wahadje kunafiyawo.>> 8Noira enne, ohovenya, liye dja eto liye ng'wa. Mwa enne na kopolo dannaga liye muwari mwa jodja jile, ohomaruwaga, liye roma wenda malambo 40 ntana na mahiyu, ante liye dowa fiya mwango wa Mulugu aitaniwa Orebi.

Yehova ohowonga na Eliya mwango Orebi

9Agafiyile mwangoni ule, ohodowaga liye volowa nifukweni eni, liye kala wewo mahiyu ompumbula. Mwa enne mazu a Yehova kohomuzelaga kawongaga keraga: <<Eliya, kodi wewuno unahindawo nni?>> 10Liye ohowakulaga eraga: <<Miyo dili mutu unasimbwetcha zuzumela ira atu kauharegeni nyo Yehova Mulugu wa Makuru Matene. Tchoira Ana Izarayeli kohiya yopangana yenyu, kohomala bwanyula vibuwa denyu eto kohomala apa anamafiyiheda enyu na supada. Miyo meka bahi guhanle. Eto eni anadivenda ira kadipe!>> 11Evale Yehova ohomuwandelaga eraga: <<Kakumela unde, udowe vazulu va mwangola, vamentoni vaga. Mwasiwa miyo dagali Yehova nnafuna divire.>> Evale nohozaga nipevo nohokala na masika. Fiyeda ira nipevo nne nobwanyulaga mwangole eto mabwe kotweyaga vamentoni va Yehova, kalaga nnga Yehova ali munipevoni mule. Mbwenye Yehova munipevoni mule kaalimo. Nipevo nne nagavirile, wohozaga indarandara. Mbwenye Yehova muindarandarani mule kaalimo. 12Indarandara ile yagavirile, wohozaga munlo. Mbwenye Yehova mmunloni mule kaalimo. Evale munlo ule agavirile, azilege aligi nizu nowongela vati vati, nofwasela. 13Mwa enne mulombwana Eliya agavwile nizu nne, ohotukulaga kapa yaye liye kunelana koveni waye, liye kumela unde, liye kala va mulango va nifukwe nne. Eto noira enne wohokalaga nizu nazilege niwongaga ira: <<Eliya, kodi wewuno unahindawo nni?>> 14Liye ohowakulaga eraga: <<Miyo dili mutu unasimbwetcha zuzumela ira atu kauharegeni nyo Yehova Mulugu wa Makuru Matene. Tchoira Ana Izarayeli kohiya yopangana yenyu, kohomala bwanyula vibuwa denyu eto kohomala apa anamafiyiheda enyu na supada. Miyo meka bahi guhanle. Eto eni anadivenda ira kadipe!>>

15Mwa enne Yehova ohomuwandelaga eraga: <<Kawela, uhare ndilawo yenno yaharile we uzaga, udowe kokola ya Damaxiku. Wadowa, wamuhambihe mulombwana Hazayeli ira akale mwene wa Siriya. 16Eto umuhambihe mulombwana Jewu muzula wa Ninsi ira akale mwene wa Izarayeli eto umuhambihe Elizewu mwana Safati, nkuda Abeli-Meyola ira akale namafiyiheda vamalroni vawo. 17Atu anne anavuluwe kahapiwa na supada na mulombwana Hazayeli, anopiwa na mulombwana Jewu. Eto ale anavuluwe kahapiwa na supada na Jewu, anapiwa na mulombwana Elizewu.#19:17 supada na mulombwana Hazayeli: Hazayeli ali mwene wa Siriya. Akuda Siriya kafwanyeya kagali amwidani a aIzarayeli. Mulugu ohorumeliha ira Hazayeli aape aIzarayeli pwi na mwasa wa uvuruvuru wewa. (2 Amwene 13:3) Eto zela supada na Jewu, fwanyeya Mulugu anvahile Jewu mabasa oapa atu kabaliwe muzizani mwa Akabe na mwasa wa jabure jaira atu. (2 Amwene 9:6-9) Jewu eto ohapa aIzarayeli ohara vikwamutu josema ja Baali. (2 Amwene 10:21-27) Eto zela mazu oira: anapiwa na mulombwana Elizewu, kahi ira Elizewu ohapa atu na supada nnga afwaye. Mbwenye muwari mwa mabasa alaba liye, kohokwa azombwe 42 ompeta (2 Amwene 2:23-25) eto ohokwa musogolrelri mundimuwa wa anyakondo a aIzarayeli (2 Amwene 7:18-20) eto ndala yohofiya mwilamboni mwa Izarayeli. Muwari mwa ndala ile, nnowanda kana ibaribari ira atu kohokwa tambe. (2 Amwene 8:1) 18Eto miyo dahakoya ilambo ya Izarayeli atwaga okwakwana 7.000 anno kahavindile mabodo ewa kamukokorela Baali eto nne aliwa mulomo wewa kabejarile ikwamutu yosema ya Baali.>>

Eliya ohomuitana Elizewu ira ahale vamalroni vaye

19Noira enne, mulombwana Eliya ohomaruwaga evale, liye dowa nfwanya mulombwana Elizewu mwana Safati. Mwa tempu yenne anfwanyilege Elizewu atipulraga vamohi na afwaye kumi na mmohi, kada mutu atipulraga na ng'ombe mbinli. Elizewu afwanyeyaga mundulri na ng'ombe mbinli dogomiheda, liye aharaga afwaye ale. Mwa enne mulombwana Eliya ohoviraga evo vafwanyeya Elizewu, liye nvokeda kapa yaye.#19:19 liye nvokeda kapa yaye Nvokeda kapa watapulela ira Elizewu gwafuna halana mabasa alaba Eliya. Nona Elizewu ohiya mabasaye olima, liye alanya ababaye ira amuharege Eliya. Eto fwanyeya ira Eliya atukuleliwaga zulu, ohomuhiyeda Elizewu kapa yaye. (2 Amwene 2:8,13,14) Nione eto 1 Amwene 11:30-31. 20Evale mulombwana Elizewu ohiyaga ng'ombe dile, liye muharaga Eliya, liye wonga eraga: <<Dihiyeni didowe damulanye babaga na mmaga,#19:20 damulanye babaga na mmaga: MaBibiliya amohiwa anawonga dambejari babaga na mmaga. Bejari unawonga atu ku wonga liye afuna adowe amulanye babaye na mmaye, amala amuharege Eliya. era eno, duharegeni!>> Mwa enne Eliya ohomurumelaga eraga: <<Kadowa, miyo kannaukondiha. So mbwenye amala uwele.>> 21Mwa enne liye ohowelelaga mundulri, dowa tukula ng'ombe mbinli, liye pa. Eto ohotukulaga jimiri jomangana ng'ombe dile liye sakanya kuni, piyana nyama yatene yenne, liye avaha atu, aliwa dja. Noira enne, liye ohovenyihana, liye muharaga Eliya, roma mulabaga.

Currently Selected:

1 Amwene 19: iLolo

Highlight

Copy

Compare