1 Amwene 18

Namafiyiheda Eliya na mwene Akabe

1Vagavirile malambo madjindjene, yaka yaneraru yohorumbwa muzongwe, mazu a Yehova kohoza wa Eliya, ira: <<Uvenye udowe wavioneyihe vamentoni va Akabe,#18:1 Uvenye udowe wavioneyihe vamentoni va Akabe: Fwanyeya ira tempu yenne mulombwana Eliya ali mutu atawile na mwasa oira liye gwairihile ira muzongwe aharumbwe. Nona liye omuova mwene Akabe tawiha ira unampe. mwasiwa miyo nnafuna dirumbwihe muzongwe.>> 2Mwa enne Eliya ohomaruwa ira adowe avioneyihe vamentoni va Akabe.

Eto fwanyeya ira tempu yenne ndala yafwanyeya Samariya tchali ya masika. 3Evale mwene Akabe ohomuitana mulombwana Obadiya, wenno asogolrelra jatene ja vande vaye. Fwanyeya ira mulombwana Obadiya ali mutu omuova Yehova valukulu. 4Tchoira wanle Jezabeli mwadi mwene Akabe tempu yaapa liye anamafiyiheda a Yehova, mulombwana Obadiya ohatukula anamafiyiheda 100, liye agawamo kala makuru menli. Atu 50, liye dowa akoya nifukwe nimohi. Atu 50 amohiwa ale, liye dowa akoya nifukwe nimohi niwa, liye avahaga jodja vamohi na mahindje. 5Mwa enne mwene Akabe agamuitanne mulombwana Obadiya ule, ohomuwandelaga eraga: <<Ndowe ilambo yatene, navirege mwatene muli visime da mahindje na mmadaboni ira nione akala nnopata mpinda ira niwande djiha kavalo dihu na akavaru#18:5 akavaru : Kavaru gu mwanainyama inapanduwa muwari mogumana wa buru wa mulombwana na kavalo ya muhiyana. ehu ira nahafiyede apa anavinyama atene.>> 6Evale kohoganaga ilambo ira karome wendamo. Mwene Akabe oharaga ndila yayene adowaga pandi imohi eto mulombwana Obadiya oharaga ndila yaye adowaga pandi imohiwa.

7Mwa enne mulombwana Obadiya agali mundila adowaga, namafiyiheda Eliya ohonfwanyaga. Evale mulombwana Obadiya ohomuiziwa ira ali Eliya. Mwa enne ohomukokorelaga afiyihaga kove yaye vati, liye nfuka eraga: <<Kodi gu nyenne mbwiye Eliya?>> 8Evale Eliya ohomuwakulaga eraga: <<He gu miyene! Udowe wamuwandele mbwiyawo ira: <Eliya uhuza!> >> 9Mwa enne mulombwana Obadiya ohomuwakulaga eraga: <<Kodi miyo disakanyile yabure nni fiyeda ira nyo mudivelele miyo namalaba wenyu mmandani mwa Akabe ira adipe? 10Miyo nnawonga vamentoni va Yehova Mulugu wenyu ira kaniliwo nlogo nne umwene wewo mbwiyaga wahausayenleni liye. Eto pandi ili yatene wafiya liye, aliwa kawonga ira: <Hiyo kanimuonile>, mwene oalumbeliha. 11Eto kodi nyo peno munawonga ira: <Kadowa wamuwandele mbwiyawo wire: <<Eliya uhuza!>>?> 12Tchoira podi ireya ira miyo dakumaga eva, vinadowege miyo, munemba wa Yehova liye za utukulanivo, udowanani wahaiziwile miyo. Mwa eno, miyo dagadowile muwandela mwene Akabe, azaga ahaufwanyenivo, unagomela dipa. Mbwenye miyo namalaba wenyu, dili mutu omuova Yehova romela uhimani waga. 13Kodi nyo mbwiyeni kamwawandeliwe zela jejo jairile miyo? Tchoira tempu Jezabeli aapa liye anamafiyiheda a Yehova, miyo dohatukula anamafiyiheda 100, miyo dowa akoya nifukweni, nifukwe nimohi 50, nifukwe nimohi niwa 50. Nomala eno, miyo roma akamihedaga daavahaga jodja na mahindje. 14Eto nyo peno munawonga ira: <Udowe wamuwandele mbwiyawo ira: <<Eliya uhuza!>> > Daira eno, liye unodipa.>> 15Evale Eliya ohowongaga eraga: <<Miyo nnawonga vamentoni va Yehova wa Makuru Matene, vamentoni va wenno nnamulaba miyo ira peno miyo nnovioneyiha vamentoni va Akabe!>> 16Mwa enne mulombwana Obadiya ohodowaga gumana na mwene Akabe, liye muwandela. Noira enne, mwene Akabe ohodowaga ira agumane na Eliya.

17Fwanyeya ira Akabe agamuonne Eliya, ohowongaga eraga: <<Kodi gu wenne maliba akukumula aIzarayeli?>> 18Evale Eliya ohomuwakulaga eraga: <<Miyo kannaakukumula aIzarayeli. Mbwenye weyo vamohi na abali a babawo gunaakukumula aIzarayeli, mwasiwa weyo uhiya malamulo a Yehova, we roma ahara amilugu a Baali. 19Eva miyo nnafuna waarume eto waagumanihe aIzarayeli atene kaze wa miyo mwango Karimelo eto kaze anamafiyiheda 450 a mulugu Baali, vamohi na anamafiyiheda 400 a mulugu Azera anno anadjihiwa na muhiyanawo Jezabeli.>>

Eliya ohomuiziweyiha Mulugu wa ibaribari vari va anamafiyiheda a Baali

20Noira enne, mwene Akabe ohorumihaga milanyo wa Ana Izarayeli atene eto ohagumanihaga anamafiyiheda a Baali mwango Karimelo. 21Mwa enne mulombwana Eliya ohofiyaga vevo vafwanyeya aIzarayeli atene, liye wonga eraga: <<Kodi hara wenyu joumbuwela mbinli munaza muhiye alini? Akala Yehova unafwanyeya agali Mulugu, inafwanela mmuhare. Mbwenye akala Baali guli Mulugu, muhareni.>> Mbwenye agawongile enne, aliwa tchamuwakunlege yengo.

22Noira enne, Eliya ohowongaga eraga: <<Miyo meka bahi guhanle muwari mwa anamafiyiheda atene a Yehova, mbwenye Baali uhukana anamafiyiheda 450. 23Mwa eno, miyo nnafuna muzena ng'ombe mbinli, era eno, anamafiyiheda ale kasakulrevo muwari mwa ng'ombe mbinli dile ng'ombe yenno inafunavo atu. Kape, kamale igwadanya yatene, kadowe kahele vazulu va kuni, mbwenye kihelevo munlo. Eto na miyene nnoisakanyeda ng'ombe yaga dihele vazulu va kuni eto na miyene kannahelavo munlo. 24Era eno aliwa kavepe nzina na mulugu wewa eto na miyene divepe nzina na Yehova. Nagairile eno, mulugu wenno unarumele yovepa, arumiha munlo, wenno gunafwanyeya agali Mulugu wa ibaribari.>> Mwa enne atene kafwanyeya evale kohorumelaga keraga: <<Mazu muwongile nyo kohokala pama!>>

25Eto mulombwana Eliya ohawongagana anamafiyiheda a Baali ale eraga: <<Nyo mukale arandji sakulra ng'ombe munafunavo nyo, musakanye mukuto, mwasiwa nyo muhuindjiva. Eto muvepe nzina na mulugu wenyu, mbwenye kamuhelevo munlo.>> 26Mwa enne anamafiyiheda a Baali ale kohotukulaga ng'ombe yavahiwe atu ile, aliwa mala sakanyeda. Noira enne, kohoromaga vepa na nzina na Baali roma mabebehi fiyeda midiya, keraga: <<Baali, nirumele!>> Mbwenye kwavweyilege nizu eto nne kalivo awakula. Eto aliwa kolupalupaga wandamelana ibuwa yenno yasakanyile atu ile. 27Eto yagafiyile midiya, mulombwana Eliya ohoromaga apeta eraga: <<Akala Baali gu mulugu okalawo, kalobelani mokuwa ira awande uvwani. Afwase liye ukana inatulela liye nari liye podi kana jimohi jiwa jinahinda liye, owu afwase liye podi kala vaulrendoni, owu afwase liye unagona. Kakuwani pama ira awande rurumuwa.>> 28Mwa enne aliwa kolobelaga mokuwa na makalelo ohokala a masika, aliwa viporotchaga na mimbene vamohi na mwanango nnga molemelela mwewa, ante aliwa fiyedaga vuvihaga sangiri niwa. 29Mbwenye yagakwaranyile midiya, kohokalelagave lobela mokuwa fiyeda ora yovelela mikuto da tchiguwoni. Mbwenye masiki enne, wa Baali kwakumile nizu navweyilege eto nne kwakumile yowakula ili yatene eto nne kilivo yengo ili yatene yaoneyilege.

30Mwa enne mulombwana Eliya ohowongaga na mwindji watene eraga: <<Atene muze vili miyo.>> Evale atene kohogumanaga vafwanyeya liye vale. Noira enne, mulombwana Eliya ohovenyihaga akoka ibuwa ya Yehova yenno yamanle bwanyuwa. 31Eto ohotukulaga mabwe kumi na menli molingana no indjiva wa malogo a ana Jako, wenno azeliwe mazu a Yehova ira: <<Nzina nawo unaitaniwege Izarayeli.>>#Jenesesi 32:28, 35:10 32Agatukunle mabwale, ohosakanyana ibuwa mwa nzina na Yehova, nomala eno mmambalo mwa ibuwa mule ohotimbamo mwana muliha fiyeda wereweriha ibuwele. Ira mwana muliha ule azale, yafuneya nnga mukutuleliwe malituru 20 a mahindje. 33Noira enne, ohosakanyedaga kuni daye, liye mala gwadanya ng'ombe ile yano yano, liye hela vazulu va kuni vale. 34Mwa enne ohowongaga eraga: <<Mudowe mwazalihe mahindje mino minnayi, muzena mukutulele vazulu va mukuto unafuna tumeya va, vamohi na kuni dene.>> Kagamanle irana, Eliya ohowongagave eraga: <<Kairanani akoka fendo yanembinli.>> Evale kohoiragana. Nomala enne, liye ohowongagave eraga: <<Kairanani fendo yaneraru!>> Evale aliwa kohoiranave fendo yaneraru, 35fiyeda mahindjale aliwa kala pule pule pule vati mmambalo mwa ibuwa mule eto fiyeda muliha ule zala mahindje.

36Evale yagafiyile ora yovelela mikuto da tchiguwoni, namafiyiheda Eliya ohozaga vaibuwani vaye, liye wonga eraga: <<Yehova Mulugu wa Abarahamu na Izaki na Izarayeli, kavioniheni peno ira nyo muli Mulugu muwari mwa aIzarayeli eto muonihe peno ira miyo dili namalaba wenyu eto muonihe ira miyo diirilena jatene jeji muwari morumiwa na nyo. 37Yehova dirumeleni! Dirumeleni ira mulogo unafwanyeya eva ula kawande iziwa ira nyo Yehova, muli Mulugu eto kawande iziwa ira nyo guwelihile mirima dewa ira kaze wa nyo.>> 38Mwa enne ohozaga munlo wa Yehova kumela zulu, mala tumeya romela mukuto ule, kuni dile, mabwe ale vamohi na teya yafwanyeya vati viwa. Eto ohoummihaga mahindje kafwanyeyaga mmulihani mule. 39Mwa enne atu atene kafwanyeyaga evale kagaonne jatene jaireyilege jile, kohokokoraga kafiyihaga miru diwa vati keraga: <<Na ibaribari Yehova guli Mulugu! Yehova guli Mulugu!>>

40Evale Eliya oharumaga eraga: <<Kaamangeni anamafiyiheda a Baali ala. Kakalevo nne mmohi unafuna vuluwa.>> Mwa enne kohahindaga eto Eliya ohadowagana mwana muhindje wa Kizomi, liye mala apa wewule.

Eliya oholobela ira muzongwe arumbwe

41Noira enne, Eliya ohomuwandelaga Akabe eraga: <<Kadowani mwadje vamohi no ng'wa, mwasiwa nnovwa kukuma wa muzongwe mudjindji.>> 42Mwa enne mulombwana Akabe ohodowa roma dja vamohi no ng'wa. Mbwenye mulombwana Eliya ohodowaga vazulu va mwango Karimelo, liye dowa kokora, oramiha muru waye volotchiha kovaye muwari mwa mabodo aye. 43Eto ohomuwandelaga namalabaye eraga: <<Kadowa waing'ane pandi ya bara, uone iliwo!>> Namalabaye ule ohodowaga. Agawenlewo ohowongaga, liye ira: <<Kadifwanyilewo yengo!>> Noira enne, Eliya ohomurumagave akoka eraga: <<Kawelelawo waone.>> Agawelenlewo, kaonnegeve yengo. Eliya ohokalelave muruma adowaga, awelagawo, fiyeda fendo tanu na mbinli. 44Evale namalabole agadowilewo fendo yanetanu na mbinli, ohowongaga eraga: <<Nnaona mwana murambo mung'onong'onove akumelaga mbara mule, agwelaga zulu. Mwana murambole unakala nnga ndanda na mutu.>> Noira enne, mulombwana Eliya ohomurumaga eraga: <<Kadowa wamuwandele Akabe ira: <Usakanyede aterelado wawo udowege vande, tawiha ira muzongwe unaufwanye!> >> 45Noira enne, zulu wohozalaga mirambo dodiba vamohi na nipevo eto wohozaga muzongwe mudjindji. Eto mulombwana Akabe ohogwelaga muatereladoni mwaye, liye dowaga sidadi ya Jezereli. 46Mwa enne Eliya ohozeliwaga kopolo da Yehova, liye mangiha pama kapaye mmwinini mwaye, roma tamangaga na mendo, liye dowa kala sogolro wa Akabe, ante liye fiya mulango ovolowela wa sidadi ya Jezereli.

Currently Selected:

1 Amwene 18: iLolo

Highlight

Copy

Compare