1 Amwene 20
20
Kondo ya mwene Akabe na mwene wa Siriya
1Mwene wa Siriya aitaniwa Beni-Hadade ohogumaniha nikuru naye natene na anyakondo eto ohagumanihaga amwene amohiwa 32 vamohi na kavalo dewa, na aaterelado ewa a kondoni. Kohovenyaga, aliwa dowa irindja sidadi ya Samariya,#20:1 aliwa dowa irindja sidadi ya Samariya: Mwa tempu yenne sidadi ya Samariya yali nnga kapitale ya ilambo ya Izarayeli. aliwa roma wana ira kagondjihe. 2Kagamanle irindja sidadile, mwene Beni-Hadade ule ohorumihaga milanyo wa Akabe mwene wa Izarayeli ira: 3<<Mwamuwandele mwene Akabe ira: <Mwene Beni-Hadade unawonga ira: <<Udivahe parata na oru watene unna we, vamohi na ahiyanawo apama eto na ahimawo apama unna we!>> > >> 4Evale mwene wa Izarayeli ule agawandeliwe enne, ohawandelaga aliba rumiwa ale ira: <<Mwanfwanya mwene, mwamuwandele ira: <Miyo vamohi na jatene jinna miyo jinafwanyeya jagali jenyu nnga muwongele nyo mbwiyeni so mwene.> >> 5Eto aliba milanyo ale kagadowile, kohowelelaga akoka wa mwene Akabe, aliwa muwandela keraga: <<Mwene Beni-Hadade uwongile ira: <Na ibaribari miyo dihiwonga ira weyo unodivaha parata vamohi na oru unna we, na ahiyanawo vamohi na ahimawo, 6mbwenye hiya yennove bahi, metchelo ora yokala ha yenna, miyo nnoaruma anamalaba aga kaze wa weyo, karome gwegweretcha vande vawo, vamohi na mavande a andimuwa atene analaba na weyo. Era eno yengo yapama ili yatene inaziveliwa we, aliwa anotukula, kadowegena.> >>
7Mwa enne mwene wa Izarayeli ule kagamuwandenle mazu anne, ohaitanihaga andimuwa atene a Izarayeli, liye awandela eraga: <<Kaing'anani makalelo abure anafuna niirela mwene Beni-Hadade! Tchoira liye ohorumiha milanyo za wa miyo ira dinvahede ahiyanaga, ahimaga, parata waga, vamohi na oru unna miyo. Mbwenye miyo kadimukondihile. Eto peno unazana milanyo dimohi diwa di.>> 8Mwa enne andimuwa atene vamohi na atu atene a Izarayeli kohowakulaga keraga: <<So mwene kamurumele, nne kamunvahe jejo jinafuna liye!>> 9Mwa enne liye ohawandelaga aliba vahediwa milanyo a Beni-Hadade ale, liye ira: <<Mudowe mwamuwandele mwene, muire: <Mazu oroma mwawongile nyo, miyo namalaba wenyu nnoirana. Mbwenye mazu amohiwa ogomiheda muwongile nyo ala, miyo kannarumela!> >> Evale aliba vahediwa milanyo ale kohowelela wa mwene Beni-Hadade, aliwa dowa muwandela mazu awakunle mwene Akabe. 10Mwa enne mulombwana Beni-Hadade, ohorumihaga milanyo dimohi diwa wa mwene Akabe ule alumbelaga ira: <<Samariya nahalawo tumbulru nofiyeda atwaga anadihara kawanda zaliha kada mutu ndanda naye naye, amilugu kaditonge na makalelo anafuna liye.>> 11Evale mwene wa Izarayeli ule ohowakula eraga: <<Mudowe mwamuwandele mwene muire: <Mutu awaraga ja kondoni, kanavitukulela kalaga nnga wenno unawungula ja kondoni.> >>#20:11 Mutu awaraga ja kondoni, kanavitukulela kalaga nnga wenno unawungula ja kondoni. Ule unawungula ja kondoni unowanda vitukulela mwasiwa uhufiyeda welawo kondoni agali wapamene ahakwile. Mbwenye kuli vitukulela para wenno unadowa kondoni mwasiwa liye kaiziwile jinafuna muireyela wewo. Mowonga eno, Akabe ohomusumulula mwene nfwaye zela vitukulela waye. 12Mwa enne mwene Beni-Hadade kamuwandelaga mazu anne afwanyeya agagaratile mmusasani, ang'waga vamohi na amwene afwaye ale. Evale ohawandelaga anyakondo aye eraga: <<Kavitandeni ira nidowe nawane na atu a sidadila!>>
13Mwa enne namafiyiheda mmohi ohozaga wa Akabe, mwene wa Izarayeli ule, liye muwandela eraga: <<Yehova unawonga ira: <Kodi uhuona mwindji wa anyakondo ohokala a masika ale? Miyo siku na peno nnouvaheda atene mmandani mwawo para uiziwe ira miyo dili Yehova.> >> 14Evale mwene Akabe ohonfukaga eraga: <<Kodi unafuna sogolrelra kondo akale ani?>> Liye ohowakula eraga: <<Yehova unawonga ira: <Anafuna sogolrelra ba anyakondo a asogolrelri a mmaporovinsiya.> >> Noira enne, mwene Akabe ohofukagave eraga: <<Nnga unafuna roma kondo bani?>> Liye ohowakula eraga: <<Unafuna roma kondo gu weyo!>> 15Noira enne, mwene Akabe ohakontarigi anyakondo a asogolrelri a mmaporovinsiya ale. Agaakontarile kaligi anyakondo 232. Noira enne, eto ohakontarigi Ana Izarayeli atene ohala ale. Agaakontarile, kali okwakwana 7.000.
16Mwa enne yagafiyile midiya, kohokumaga ira kadowe katatamule kondo. Fwanyeya ira tempu yenne mulombwana Beni-Hadade afwanyeya mmusasani vamohi na amwene afwaye 32 kamukamiheda ale, kang'waga eto kohomalaga lrezelra. 17Mwa enne akuda Akabe ale, anyakondo a asogolrelri a mmaporovinsiya baligi arandji kumela unde. Fwanyeya ira kohokalawo alombwana aarumile Beni-Hadade ira kawendelelege sidadi ya Samariya ile. Aliba wendelela ale kohozaga, aliwa muwandela mwene Beni-Hadade ira: <<Kohokalawo alombwana angasi angasi kakumile musidadi mwa Samariya mu.>> 18Mbwenye mwene Beni-Hadade ule ohawakulaga eraga: <<Akala kakumele jowana nari akala kakumile na murendele ira niwandane, miyo nnafuna ira mwahinde a meswene, mwaazena.>>
19Mwa enne anyakondo a asogolrelri a mmaporovinsiya ale kohokumaga musidadi mule, aliwa kala vasogolro, nikuru nindimuwa na anyakondo aharaga mundulri mwewa. 20Kagakumile, kada mutu ohoromaga mpa anfwanya liye. Mwa enne akuda Siriya ale kohotawaga, aIzarayeli aliwa roma ahara. Mbwenye mulombwana Beni-Hadade mwene wa Siriya ule, ohomaruwaga, liye gwela vakavaloni vaye vamohi na alombwana amohiwa owendiha kavalo. 21Mwa enne mwene wa Izarayeli ohovenyaga vamohi na atwaye, aliwa dowa mala kakata aaterelado a kondoni, vamohi na kavalo datene danna amwidaniwa eto kohagondjiha aSiriya ale na makalelo ohokala a masika.
22Noira enne, namafiyiheda ohozaga wa mwene wa Izarayeli ule, liye muwandela eraga: <<Inafwanela ulimbihe nikuru nawo na anyakondo eto ukayena makalelo anafuna we sakanya. Tchoira vinamalege atu yaka yompumbula, mwene wa Siriya ule unoza awane na weyo akoka.>>
23Fwanyeya ira andimuwa kalaba na mwene wa Siriya kohomuwandela ira: <<Amilugu a aIzarayeli ba amilugu a mmwangoni. Nona aliwa kali a kopolo nikwaranya hiyo. Mbwenye inafwanela nidowe nawane na aliwa nimburo notandeleya. Naira eno nnagomela agondjiha! 24Mwa eno, inafwanela muire eni so mwene: Mwaakumihemo amwene enyu atene mwemo munafwanyeya atu, vamalroni viwa mwahelegemo asogolrelri. 25Eto mukunge mwindji mmohiwa wa anyakondo molingana no indjiva wa anyakondo kapiwile eto mugumanihe kavalo dimohi diwa nnga dedile mwanna nyo eto mugumanihe aaterelado amohiwa a kondoni nnga anne. Era eno nivenye nidowe nawane na aliwa nimburo notandeleya. Naira eno nnagomela agondjiha!>> Mwa enne andimuwa ale kagamanle wonga eno, mwene Beni-Hadade ohorumela, liye irana yawongile atu.
Gondjihiwa wa mwene Beni-Hadade
26Fwanyeya ira vagamanle yaka imohi mwene Beni-Hadade ohomala agumaniha anyakondo aye a Siriya akoka, liye venyihana dowa sidadi ya Afeki ira awane na aIzarayeli. 27Eto Ana Izarayeli na aliwene anyakondo ewa kohogumanela eto kohomalaga tambilra jodja jiwa, aliwa maruwa dowaga ira kawane na akuda Siriya ale. AIzarayeli ale kagamaruwile, kadowilege kunga misasa diwa sogolro wa akuda Siriya ale kalaga nnga makuru menli mang'onong'onove a mbuzi. Mbwenye akuda Siriya ale kohozalaga ilambo yatene na mwasa oindjiva. 28Mwa enne ohokalawo mutu wa Mulugu azilege wa mwene wa Izarayeli ule, liye muwandela eraga: <<Yehova unawonga ira: <Voira akuda Siriya kawongile ira: <<Yehova gu Mulugu wa mmwangoni, mbwenye kahi Mulugu wa mamburo otandeleya!>>, miyo nnouvahedani mwindji watene wenna mmandani mwenyu, para muwande iziwa ira miyo dili Yehova!> >> 29Mwa enne Ana Izarayeli ale kohokalagave vamisasani viwa sogolro wa akuda Siriya ale fiyeda malambo matanu na menli. Fwanyeya ira nikwakwanaga siku nanetanu na mbinli nne, kohotatamulaga kondo, aliwa roma wana. Kawanaga, siku nimohive nenne aIzarayeli kohapaga anyakondo a Siriya okwakwana 100.000 owenda na mendo.#20:29 anyakondo… owenda na mendo : Malambo a mundulrimu kohokalawo anyakondo ogwela aaterelado eto kohokalawo ogwela kavalo mbwenye oindjiva banno kawenda na mendo. 30Mbwenye amohiwa ohala ale kohotawelaga Afeki, aliwa dowa volowa musidadi. Mwa enne muru wa sidadile ohagwelaga alombwana okwakwana 27.000 aliba hala katawenle musidadi ale, aliwa kwa. Eto mwene Beni-Hadade ohotawaga, liye dowa musidadi, dowa tawelaga mmakwartuni, adowaga kwartu ila, avenyagamo, adowaga kwartu imohiwa, avenyagamo.
Akabe ohosakanya yopangana yowandana na mwene wa Siriya
31Mwa enne andimuwa kalaba vamohi na liye kohomuwandelaga keraga: <<Hiyo nihivwa ira amwene a Izarayeli ba amwene a tangaranga. Ndoweni niware masakwi eto nivimangelele mingohi mukohini mwehu, nivenyeni nidowe wa mwene wa Izarayeli. Nakana ngari, liye podi uwendelani tangaranga ahaupeni.>> 32Mwa enne andimuwa kalaba vamohi na mwene Beni-Hadade ale kohowaraga masakwi eto aliwa mangelela mingohi mukohini mwewa, aliwa za wa mwene wa Izarayeli kawongaga keraga: <<Namalaba wenyu Beni-Hadade unavepa ira mwahampe.>> Evale mwene wa Izarayeli ule ohafukaga eraga: <<Kodi liye uhukalawove, kakwile? Liye gu mbalaga!>> 33Andimuwale kafwanyeya muwari modediha ira kaone makalelo bavi afuna Akabe wakula. Evale kagavwile joira: <<Gu mbalaga>>, kohoona ira yovepa yewa yafuna rumeliwa. Mwa enne kohobaranyaga muwakula mwene wa Izarayeli ule keraga: <<Mbalinyu Beni-Hadade uhukalawove!>> Evale mwene wa Izarayeli ule ohawandelaga eraga: <<Kamudoweleni, mmuzena.>> Mwa enne mwene Beni-Hadade agazile, mwene Akabe ohomugwelihaga muatereladoni mwaye. 34Noira enne, mulombwana Beni-Hadade ohomuwongana Akabe eraga: <<Sidadi dedo babaga amuwakile liye babawo, miyo nnouweliheda. Eto weyo podi sakanya mamerkado awo wanihu Damaxiku nnga mamerkado anno babaga asakanyile liye Samariya.>> Evale Akabe ohomuwakulaga eraga: <<Malringana nasakanya yopangana yowandana nnga munawongela we, miyo nnouhiya ira udowege.>> Noira enne, kohosakanyaga yopangana yowandana, liye maruwa, dowaga.
Namafiyiheda mmohi ohomugwihana mulandu Akabe
35Noira enne, muwari mwa asempuru a anamafiyiheda, ohokalawo mulombwana mmohi amuwandenlege nfwaye muwari morumiwa na Yehova eraga: <<Nnavepa ira udiporotche!>> Mbwenye nfwaye ule ohokondaga mporotcha. 36Evale liye ohowongaga na nfwaye akondile mporotcha ule eraga: <<Voira weyo kuvwelenle mazu a Yehova, namwalanaga eva eni, wadowaga, podogoma unoupa.>> Mwa enne kagamwalanile, nfwayele adowaga, podogoma ohonfwanyaga mundila, liye mpa. 37Noira enne, liye ohodowaga nfwanya mutu mmohiwa, liye muwandela eraga: <<Nnavepa ira udiporotche!>> Evale mulombwanole ohombubuda, liye mporotcha. 38Evale namafiyiheda ule agaporeyile, ohodowaga, liye kala mundila ira agumane na mwene Akabe aviraga eto ohovikunelaga wintoni waye na nguwo ira ahaiziweye. 39Evale mwene wa Izarayeli ule aviraga, liye ohomukuwelaga eraga: <<Andimuwa muvwe makatamiho aga. Miyo namalaba wenyu nnakuma kondoni. Kondoni wali miyo ohokala munyakondo mmohi amuzilena mwidani, liye divaheda ira: <Umuing'anelege mutula. Wamuhiya liye atawa, weyo unokwa vamalroni vaye, owu hehi unopagalri kilu 35 da parata.> 40Mwa enne, miyo dihindaga mabasa amohiwa, mutu dahiyediwe miyo ule ohoditawa.>> Mwa enne mwene wa Izarayeli ule ohomuwakulaga eraga: <<Weyo unagomela nnga muwongele we wa mwinnya!>>
41Noira enne, mutule ohobaranya kumihawo nguwo yavikunenlena liye wintoni waye ule. Evale mwene wa Izarayeli ule ohomuiziwaga ira: <<Mutula gu namafiyiheda.>> 42Evale namafiyiheda ule ohomuwandelaga eraga: <<Yehova unawonga ira: <Voira weyo uhumuhiya mulombwana wenno dafunne miyo ira apiwe, eni weyo unokwa vamalroni vaye. Eto atwawo anokwa vamalroni va atwaye.> >> 43Noira enne, mwene wa Izarayeli ule ohomaruwaga adowaga vande vaye Samariya agali otakaleliwene valukulu.
Currently Selected:
1 Amwene 20: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
