1 Koronika 16
16
1Kagazilena Kaxa ya Yopangana ya Mulugu, kohoihelaga muwari mwa musasa wenno Davi asakanyedile liye ira Kaxele ikalegemo. Nomala eno, kohovelelaga wa Mulugu mikuto dotumeya vamohi na jovelela ja murendele. 2Kagamanle velela mikuto dotumeya na jovelela ja murendele, Davi oharelihaga atu atene mwa nzina na Yehova. 3Agamanle areliha, ohagawelaga jodja aIzarayeli atene kafwanyeyaga vevale. Kada mulombwana eto kada muhiyana ovahiwa pawu imohi, pindula ya nyama na uva oumma.
Nyumbo ya Davi yomutamalela Yehova
4Davi ohasakulraga aLevi angasi angasi ira kalabege sogolro wa Kaxa ya Yopangana ya Yehova muwari momuimbela no mutamalela no mutitimiha Yehova Mulugu wa Izarayeli. 5Mwa alombwana kasakulriwe ale, musogolrelri wewa ali Asafe, ohareliwa ali Zakariya, Jeyeli, Semiramoti, Jeyeli, Matatiya, Eliyabe, Benaya, Obedi-Edomu na Jeyeli. Aliwa kaimba lira na arpa. Mulombwana Asafe aimba joimbana jinakala nnga parato. 6Anamakuta Benaya na Jahaziyeli kasakulriwe ira kaimbege palraza malambo matene vasogolro va Kaxa ya Yopangana ya Mulugu.
7Siku nimohive nenne, ali siku noroma Davi anvahile liye mulombwana Asafe na abalaye nyumbo yomutamalelana Yehova ila:
8Mutamaleleni Yehova, mmuitanege na nzina naye, mwaaiziwihe atu a malogo matene jolaba jaye.
9Muimbeleni nyumbo, muimbeleni nyumbo domutamalela, wongani joira jaye jotikiniha.
10Vititimiheni mwa nzina naye notchena.#1 Korinto 1:31 Mirima da atu anno ananvenda Yehova dihagalale.
11Mmusake Yehova vamohi na kopolo daye. Tempu datene muvende ira mukale vamentoni vaye.
12-13Nyo atu okumela mwa Izarayeli, namalaba waye, nyo ahima a Jako, atwaye osakulriwa,
umbuwelani mabasa aye otikiniha, jionihedo jaye na jotonga jikumile vamulomoni vaye.
14Liye gu Yehova Mulugu wehu, jotonga jaye jili para ilambo yatene ya vati.
15Malambo matene muumbuwelege yopangana yaye na mazu awongile liye roma nyo, dowaga ahiminyu eto ahiminyu anno ahimiwa, vamohi na ahimiwa anno ahimiwa dowagave eno fiyeda fendo 1.000.
16Yopangana yenno tcheniyo yasakannye liye na Abarahamu, na yolumbela yenno alumbenle liye na Izaki.
17Mulugu anvahile yopangana yaye ile Jako nnga nlamulo eto aavahile aIzarayeli nnga yopangana yohomala,
18liye ira: <<Miyo nnouvahani ilambo ya Kana ira ikale yenyu kala no kala.>>
19Awongaga enne, aliwa kali atu okontareya, atu a vang'ono eto kali alendo mwilamboni mule.
20Kali atu owendawenda ilambo na ilambo, umwene na umwene.
21Mulugu karumelihile mutu uli watene aaonihe goyi, mofutukula, na mwasa oaziveliwa aliwa, ohasumulula amwene,
22liye ira: <<Kamwaamexeri atwaga osakulriwa, nne kamwaaonihe goyi anamafiyiheda aga.>>
23Nyo muli mwilamboni mwatene ya vati, muimbeleni Yehova! Siku na siku mulaleye zela vulusa waye.
24Mwaawandele atu a malogo matene zela undimuwa waye, mwaawandele atu atene zela jolaba jaye jotikiniha.
25Mwasiwa Yehova gu mundimuwa eto ofwanela tamaleliwa, ofwanela oviwa kwaranya amilugu atene.
26Mwasiwa amilugu a atu a mwilamboni ti jengo josemiwa bahi. Mbwenye Yehova gwenno upandutchile ilambo ya zulu.
27Undimuwa na umwene jili vamentoni vaye, kopolo no hagalala jihizala mmba mwaye.
28Mutitimiheni Yehova, nyo atu a malogo matene a ilambo ya vati, mutitimiheni Yehova na mwasa wa undimuwa waye vamohi na kopolo daye.
29Mutitimiheni Yehova zela undimuwa wa nzina naye. Zanani yovelela eto mufiye vamentoni vaye. Mutamaleleni Yehova zela tchena waye wa undimuwa.
30Ngurumelani vamentoni vaye, nyo atu atene a ilambo ya vati. Liye uhuigarateyiha ilambo, kinatekenyeya.
31Ilambo ya zulu ihagalale, ilambo ya vati ikayena ziveliwa. Jiwonge wa atu atene ira: <<Yehova gu Mwene.>>
32Bara na jatene jilimo jikuwe. Minda na jatene jilimo jihagalale. 33Mitengo datene da guguru diimbe mohagalala vamentoni va Yehova, mwasiwa unaza ira atonge ilambo ya vati.
34Mutamaleleni Yehova mwasiwa liye gwapama, mwasiwa tangaranga daye ta mukalakala.
35Kuwani ira: <<Nivuluseni nyo Mulugu onivulusa!>> Munigumanihe eto muniwombole mwa atu a mwilamboni ya vati ira nitamalele nzina nenyu notchena, eto nivititimihege moutamalelani.
36Yehova, Mulugu wa Izarayeli, akale otamaleliwa malambo a mukalakala.
Evale atu atene kohorumelaga keraga: <<Ame!>> Eto kohomutamalela Yehova.
37Mwa enne, mwene Davi ohomuhiyaga mulombwana Asafe na aLevi afwaye wewo wafwanyeya Kaxa ya Yopangana ya Yehova ira kalabege wewo malambo matene nnga mwarumiwele atu ira kairegena va kada siku.#16:37 kalabege wewo malambo matene nnga mwarumiwele atu ira kairegena va kada siku. Mabasiwa ali muimbela no mutamalela no mutitimiha Yehova Mulugu wa Izarayeli. Nione 16:4 38Ohomuhiya eto mulombwana Obedi-Edomu vamohi na abalaye 68 ira kamukamihedege Asafe na afwaye mabasiwa. Obedi-Edomu mwana Jedutuni na Hosa kali agwarda a mulango. 39Davi ohomuhiyaga eto namakuta Zadoki na abalaye amohiwa anno kali anamakuta va Musasa wa Yehova nimburo notama novelela mikuto nafwanyeya ilambo ya Jibeyawu. 40Aahiyile wewule ira tempu datene, mabebehi na tchiguwo kavelelege mikuto dotumeya vaibuwani ya mukuto na makalelo nnga mulrembiwele atu mmalamuloni mwa Yehova, anno aavahile liye aIzarayeli. 41Aahiyile vamohi eto na Emani na Jedutuni vamohi na atu amohiwa kasakulriwe moira itaniwa mazina ewa ira kamutamalelege Yehova, mwasiwa tangaranga daye ta mukalakala. 42Emani na Jedutuni ale, kasogolrelra mabasa oimba palraza, joimbana jinakala nnga parato na jimohi jiwa joimbana nyumbo domutamalelana Mulugu. Ahima a Jedutuni kavahiwe mabasa oing'anela va mulango.
43Nomala enne, atu atene kohobalaleyaga, kada mutu dowaga vande vaye. Na Davi wenne ohowelelaga vande vaye ira aarelihe atu a vande vaye.
Currently Selected:
1 Koronika 16: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
