1 Koronika 17
17
Mulugu ohosakanya nipangano na Davi
1Davi akalaga vande vaye nyumba ya palasiyo, siku nimohi ohowongaga na namafiyiheda Nata eraga: <<Kaing'anani! Miyo nnakala nyumba yosakanyiwa na matabwa a seduru, agali Kaxa ya Yopangana ya Yehova ilive mmusasani.>> 2Evale Nata ohomuwakulaga Davi eraga: <<Uirena jatene jili mmirimani mwawo mwasiwa Mulugu uli na weyo.>>
3Mwa enne, siku nazilege Davi awongaga na namafiyiheda Nata, mahiyuni uwa, mazu a Mulugu kohozaga wa namafiyiheda Nata, kamuwandelaga ira: 4<<Udowe wamuwongena namalaba waga Davi ira Yehova unawonga ira: <Unafuna dimangela nyumba ira dikalegemo kahi weyo. 5Tchoira kumelave tempu yaakumihile miyo Ana Izarayeli muIjipitu, fiyeda peno va kannakayena nyumba yaga. So nnawendetchave musasa mmohi, amala tchindja dowa musasa mmohiwa, nimburo nimohi, amala tchindja dowa nimburo nimohi niwa, ireyagave eno. 6Eto mwatene mwawenda miyo na aIzarayeli atene, kodi miyo dihibabiha wonga na musogolrelri uli watene wa Izarayeli dimurumile miyo ira aakumbuzege atwaga ira: Nnga mwasiwa gwa nni nyo hafunaga dimangela miyo nyumba yomangiwa na matabwa a seduru?> >> 7Yehova ohowongaga na Nata eraga: <<Na mwasa wenno, udowe wamuwandele namalaba waga Davi wire: <Yehova wa Makuru Matene gunawonga ira: <<Miyo dukumihile mukokolani mwemo mwawenda we mundulri mwa mabila ira ukale musogolrelri wa atwaga aIzarayeli! 8Eto miyo dalive na weyo mwatene mwavira we eto dahatolotcha amwidanawo atene vamentoni vawo, eto miyo nnoza diulukulihe nzina nawo ira nikale nnga mazina a andimuwa andimuwa anafwanyeya mwilamboni ya vati! 9Eto miyo nnoza daavahede atwaga aIzarayeli nimburo neno ira aliwa kakalegemo eto nnoazala ira aliwa kakalegeve nimburo neno. Dagaavahedile nimburo newa, kinakukumuliwegeve eto kilivo atu amohiwa abure anafuna za aonihaga goyi nnga goyi yanna atu voroma vene tempu yawendetcha atu na anamasogolrelra amohiwa daahambihile miyo mundulrimu ira kaasogolrelrege atwaga aIzarayeli!#17:9 miyo nnoza daavahede atwaga aIzarayeli nimburo neno ira aliwa kakalegemo… kinakukumuliwegeve: Mulugu agamanle avaha aIzarayeli ilambo yatene ya Kana nnga mwawongele liye na Abarahamu, Mulugu uhuwonga zela ilambo imohiwa ihanle. Ilambo imohiwa Mulugu unafuna liye avaha atwaye gu Jeruzalemu Muxa. (Jowandeliwa 21:2-4) 10Miyo nnoagondjiha amwidanawo atene. Eto vamohive vevo miyo dagali Yehova nnouwandela ira miyo gunafuna umangela weyo nyumba ya umwene.#17:10 Mulugu awongaga na Davi ira: miyo gunafuna umangela weyo nyumba ya umwene ku wonga ira sogolro ahima a Davi kafuna kakale andimuwa otonga umwene wa Izarayeli. 11Inafuna ireya tchoira malambwawo kakwakwana ira udowe wagumane na makolo awo, mundulri mwawo, muwari mwa ahimawo anafuna hala, miyo nnomuvenyiha mutu mmohi ira akale vamalroni vawo, eto miyo nnogarateyiha umwene waye. 12Liye mbwenye gunafuna dimangela nyumba. Eto miyo nnosakanya ira mpando waye wa umwene akale wa mukalakala. 13Miyo nnokala babaye eto liye unokala mwanaga. Kadiza dihiya muziveliwa nnga dahiyile miyo muzivela Sawuli wenno ali mwene weyo wahanakale mwene. 14Nnoza dimuhele mwanawo ira akale musogolrelri wa atwaga na musogolrelri wa muumweneni mwaga, eto mpando waye wa umwene unogarateya kala no kala.>> > >>
15Noira enne, mulombwana Nata ohodowaga nfwanya mwene Davi, liye muwandelamo mazu matene Yehova amuwandenle liye muwari momuoniha jengo mmuruni mwaye.
Lobela wa Davi
16Evale mwene Davi agavwile mazwale, ohovolowaga mMusasani mwa Yehova, liye garati vamentoni va Yehova, liye roma lobela eraga: <<Yehova Mulugu kodi miyo dili ani eto atu a vande vaga bani ira nyo mudifiyihe makalelo dinna miyo ala? 17Eto nyo Mulugu, muwari mwa jatene jidiirele nyo, vamentoni venyu munaona nnga jihiyeva. Ante nyo munofiyeda wonga zela vande va miyo dagali namalaba wenyu zela tempu ya sogolro. Nyo Yehova Mulugu, mudisakanyile nnga dili mutu orihediwa. 18Nnga miyo dagali Davi, nnafuna diwonge yengo nni wa nyo zela upama watene mudiirele nyo miyo namalaba wenyu? Tchoira nyo muhumuiziwa pama namalaba wenyu. 19Nyo Yehova, na mwasa omuziveliwa namalaba wenyu, nnga mufunele nyo mmirimani mwenyu, muhuirana yengo ilukulu, nyo diwandelaga miyo namalaba wenyu upama watene wenno munafuna nyo za irana sogolro. 20Kaliwo okwakwanela na nyo. Na mwasa wa jatene jivwile hiyo na mabaru ehu zela nyo, nnowanda rumela ira kaliwo Mulugu mmohiwa ahali nyo bahi! 21Kanilivo nlogo nimohi niwa mwilamboni mwatene ya vati nolingana na atwinyu aIzarayeli, anno nyo Mulugu mwaawombonle nyo ira kakale atwinyu. Jengo jilukulu jotikiniha jisakannye nyo, jihiriha ira nzina nenyu nivweye. Nyo mohatamangiha malogo a atu amohi vamentoni va atwinyu mwaawombonle nyo muIjipitu. 22Yehova gu nyo musakannye ira aIzarayeli kakale atwinyu malambo a mukalakala, nyo so Yehova gwasakunlre ira mukale Mulugu wewa. 23Mwa eno mbwenye, Yehova, mukwakwanelihede kala no kala yopangana yenno iwongile nyo na miyo namalaba wenyu vamohi na ahimaga. Muirena nnga mwemo muwongele nyo ira 24jatene jakwakwanela, nzina nenyu nivweye kala no kala eto atu kawongege ira: <Yehova wa Makuru Matene gu Mulugu wa Izarayeli.> Muirena nnga muwongele nyo ira ahima a miyo Davi namalaba wenyu, kakaleve amwene vamentoni venyu. 25Mwasiwa nyo Mulugu waga, muhudioniha miyo namalaba wenyu ira munodimangela nyumba ya umwene#17:25 ira munodimangela nyumba ya umwene ku wonga ira sogolro ahima a Davi kafuna kakale andimuwa otonga umwene wa Izarayeli.. Na mwasa wenno, miyo namalaba wenyu dihilimbiheya, miyo lobelaga na makalelo anna. 26Nyo Yehova, muli Mulugu! Muhusakanya nipangano napama na namalaba wenyu. 27Mwa eno, na mwasa wa upama wenyu nnouvepani ira murelihe vande va miyo namalaba wenyu ira nikalegeve vamentoni venyu kala no kala. Mwasiwa yengo yenno inareliha nyo Yehova, inokala yorelihiwa kala no kala.>>
Currently Selected:
1 Koronika 17: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
