1 Koronika 11
11
Hambihiwa wa Davi ira akale mwene wa akuda Efarayimi
1Jagaireyile enne, aIzarayeli atene kohomaruwaga vamohi, aliwa za nfwanya mwene Davi sidadi ya Eboroni. Kaganfwanyile, kohomuwandelaga keraga: <<Hiyo nili makuva amohive na maningo amohive na nyo. 2Hiya yennove bahi, masiki Sawuli ahanakwe, agali mwene, gu nyenne aasogolrelretcha anyakondo a Izarayeli kadowaga kondoni nari kakumaga kondoni. Eto nyo mohowandeliwa na Yehova Mulugu wenyu ira: <Sogolro weyo unoza waakumbuzege atwaga aIzarayeli eto unokala musogolrelri wewa.> >> 3Mwa enne andimuwa atene a aIzarayeli kagamanle wonga mazu anne, Davi agavwile, ohorumelaga. Evale ohosakanyaga yopangana na aliwa vamentoni va Yehova. Noira enne, aliwa muhambiha Davi, liye kala mwene wewa Eboroni ule nnga mwawongele Yehova muwari mwa Samuweli.
4Davi ohomaruwaga na aIzarayeli atene, aliwa dowa sidadi ya Jeruzalemu yenno yaitaniwa Jebuzi tempu yenno, ira kadowe kaagondjihe aJebuzi kakala musidadi mule. 5Evale aJebuzi ale kagamuonne mwene Davi, kohowonga keraga: <<Weyo nne kunaxixa ira unovolowa musidadi mwihu.>> Masiki eno, Davi oagondjiha aJebuzi, liye tukula ilambo ya mmwangoni mwemo mwafwanyeya nimburo nolimba nofwanela tawelamo naitaniwa Siyawu. Evale sidadile roma itaniwaga sidadi ya Davi. 6Siku nenne Davi ohowongaga ira: <<Mutu wenno unakale murandji aapa aJebuzi unokala musogolrelri wa anyakondo.>> Jowabe wenno mmaye ali Zeruwiya gwali murandji dowa wana, na mwasa wenno ohohambihiwa liye kala musogolrelri wa anyakondo. 7Davi ohoromaga kala nimburo nolimba nofwanela tawelamo nne. Na mwasa wenno sidadile yohoroma itaniwa sidadi ya Davi. 8Liye ohomangaga akoka miru da sidadile, kumela Milu fiyeda rungunutcha sidadi yatene. Jowabe ohodimangaga akoka nyumba dali muwari mwa sidadile. 9Evale Davi umwene waye woulukulave, na mwasa oira Yehova wa Makuru Matene ali na liye.
Anyakondo a kopolo a Davi
10Ala ba anyakondo a kopolo a Davi anno kamukamihedile vamohi na aIzarayeli atene ira akale mwene mokwakwanela nnga mwawongele Yehova zela aIzarayeli. 11Mazina a anyakondo a kopolo a Davi ba ala: Jasobeyamu wa muibalini mwa Akimoni, liye ali musogolrelri wa anyakondo 30. Liye na mwanango waye ohowana na alombwana 300 liye mala apa kondo imohive bahi. 12Omuharela ali mulombwana Eliyazari mwana Dodo wa muibalini mwa Awoyi, liye ali mmohi mwa alombwana araru a kopolo. 13Liye ali vamohi na Davi ilambo ya Pasi-Damimu, wewo wagumanenle aFilistewu ira kawane vevo vali munda wa sevada. AIzarayeli kali evo kohatawaga aFilistewu ale, 14mbwenye Eliyazari na afwaye kohoimelaga vari va mundole kambarelaga, aliwa apa aFilistewu. Yehova ohavaha gondjiha wohokala wa masika.
15-16Tempu imohi, muwari mwa alombwana a kopolo 30 a Izarayeli, kohokalawo alombwana araru kadowilege nibweni eni wafwanyeya Davi nimburo nolimba notawelamo, nifukwe na Adulawu. Mwa tempu yenne anyakondo a aFilistewu kakungilege misasa diwa ndabo na Refayina, tatamo ya Beleme. 17Davi ohowongaga ira: <<Nnosauwela nnga mutu adivahe mahindje a isime inafwanyeya wandamelana va mulango wa Beleme!>> 18Evale alombwana araru a kopolo ale kohovenyaga, aliwa dowa xolra vakapamentoni va aFilistewu, aliwa dowa runga mahindje isime yenno yafwanyeya wandamelana va mulango wa Beleme. Mbwenye kagafiyilena mahindjale wa Davi, liye kang'wilege. Mbwenye akutulenlege vati, vamentoni va Yehova. 19Liye ohowongaga eraga: <<Mulugu waga, miyo kannang'wa mahindjala! Tchoira miyo dang'wa mahindjala, inakalege nnga ding'wile sangiri na alombwana kazuzumihile vingumi diwa, kadowa karunga mahindjala kazana!>> Mwa enne liye mahindjale kang'wilege. Ti jejo jairile alombwana araru a kopolo ale.
20Eto mulombwana Abizayi, Jowabe mbalaye ali mundimuwa wa anyakondo 30 a kopolo. Siku nimohi liye agali kondoni ohotukulaga mwanango waye, liye fiyeda apana atu 300. Mwa enne nzina naye nohoroma vweya kalaga nnga alombwana araru a kopolo ale. 21Mulombwana Abizayi ule ali mutu ovweya bure muwari mwa anyakondo 30 a kopolo ale eto liye ali mundimuwa wewa. Mbwenye vweya wavweyile liye kwafiyile makalelo kavweyile alombwana araru a kopolo ale.
22Eto ohokalawo mulombwana mmohiwa aitaniwa Benaya mwana Joyada wa sidadi ya Kabizeli. Liye ali mulombwana wa kopolo eto oirana jengo jidjindji. Liye ohapa anyakondo ambinli a kopolo a Mowabe. Liye eto ohodowa mpa podogoma mmulihani, vati vagali neve. 23Benaya eto ohompa muIjipitu, mulombwana olapa, wenno anna mameturu menli na masentimeturu 20. Benaya ule annaga ikumbuzo bahi, mbwenye mulombwana owopiha ule ohokagana mwanango mulukulu eto onyemela mmandani mwaye. Evale Benaya ohomukwivelaga, liye muwaka mwanango anna liye mmandani mwaye mule, liye mpana mwinnya. 24Ti jejo jairile mulombwana Benaya mwana Joyada. Evale liye nzina naye novweya nnga alombwana araru a kopolo ale. 25Liye ali mutu ovweya bure muwari mwa anyakondo 30 a kopolo ale. Mbwenye vweya wavweyile liye kwafiyile nnga makalelo kavweyile alombwana araru a kopolo ale. Davi ohomutukula, liye muhela kala musogolrelri wa agwarda aye anno kamuing'aneletcha.
26Anyakondo amohiwa a kopolo maziniwa ba ala: Azayeli wenno ali Jowabe mbalaye, mulombwana Eliyanani mwana Dodo wa sidadi ya Beleme, 27Samote nkuda Arori, Helezi nkuda Peloni, 28mulombwana Ira mwana Ikesi, nkuda Tekowa, Abiyezeri nkuda Anatoti, 29Sibekayi nkuda Husati, Ilayi nkuda Awoyi, 30Marayi nkuda Netofa, Heledi mwana Bana, nkuda Netofa, 31Itayi mwana Ribayi wa sidadi ya Jibeya, sidadi ya nlogo na Benjami, Benaya nkuda Piratoni, 32Hurayi wa mwana muhindje wa Gaji, Abiyeli nkuda Arabati, 33Azimavete nkuda Bawurimi, Eliyaba nkuda Saliboni, 34Bene-Asemu nkuda Gizoni, Jonata mwana Sage nkuda Arari, 35Ayawu mwana Sakari nkuda Arari, Elifali mwana Uri, 36Eferi nkuda Mekerari, Ayiya nkuda Peloni, 37Heziro nkuda Karimele, Narayi mwana Ezibayi, 38Joweli wenno ali Nata mbalaye, Mibari mwana Agiri, 39Zeleki nkuda Amoni, Narayi nkuda Beroti wenno atukuletcha jowanana ja Jowabe mwana Zeruwiya, 40mulombwana Ira na mulombwana Garebe, akuda Itira, 41Uriya nkuda Eti, Zabade mwana Alayi, 42Adina mwana Siza nkuda Rubeni wenno ali musogolrelri wa akuda Rubeni na anyakondo aye 30, 43Anani mwana Maka, Jozafa nkuda Mitini, 44Uziya nkuda Asiterati, Sama na Jeyeli ahima a Otamu nkuda Aroweri, 45Jediyeli mwana Simiri na mbalaye Jowa nkuda Tizi, 46Eliyeli nkuda Mayavi, Jeribayi na Jozaviya ahima a Elinawu, Itima nkuda Mowabe, 47Eliyeli, Obedi na Jaziyeli wa sidadi ya Zoba.
Currently Selected:
1 Koronika 11: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
