1 Koronika 10
10
Kwa wa Sawuli na ahimaye
1Tempu imohi aFilistewu kohowana na aIzarayeli. Muwari mowana mule, aIzarayeli kohoroma tawa, aliwa piwaga na makalelo ohokala a masika mwango wa Jilibowa. 2Mwa enne aFilistewu kohomutamangihaga mwene Sawuli na ahimayene, aliwa fiyeda mwezo oapa ahima araru a Sawuli romela Jonata, Abinadabe na Malekisuwa. 3Kondo ile yagalive vari, Sawuli ohofiyedaga sanyeya mwasiwa aliba maurwa a aFilistewu kohomuonaga, aliwa mala mulata, liye poreya na makalelo abure. 4Evale mwene Sawuli ohomuwongana nkamihedi waye wenno atukuletcha fwaramento daye dowanana, liye ira: <<Kapulula supada nawo, udimarihena tawiha ira atu ohoineliwa ala anaze kadizuzumihe!>> Evale nkamihedi ule ohoovaga. Na mwasa wenno kaampilege. Sawuli agaonne ira: <<Nkamihedi wagola kanafuna dipa!>>, ohotukulaga supada naye, liye imetcha vati, viwambana mwinnya.#10:4 ohotukulaga supada naye… viwambana mwinnya: Masupada kawanana atu wanle kohiyana na masupada a tempu ili hiyo ila. Tchoira masupada a wanle, magomelo uwa wakala woxongowa wene. 5Eto nkamihedi ule agaonne ira Sawuli uhukwa, na liyene ohopululaga supada naye, liye imetcha vati, viwambana mwinnya. Evale ambinlene kohokwaga vamohi. 6Mwa enne Sawuli vamohi na ahimaye araru ale kohokwaga vamohi na atu atene a muibalini mwaye kadowile vamohi na liye kondoni. 7Noira eno, aIzarayeli atene kafwanyeya ndabo na Jezereli kagavwile ira: <<Afwihu kohotawa eto Sawuli vamohi na ahimayene araru kohokwa!>>, kohiyaga sidadi dewa dakala atu, aliwa tawa dowaga umohi uwa wene. Eto sidadi dahiyilege atu dile, aFilistewu kohodowa, aliwa kalaga mwemule.
8Mmetcheloni muwa aFilistewu ale kagadowile ira kaawungule fwaramento atu atene kakwile ale, kohonfwanya mwene Sawuli vamohi na ahimaye kagakwile mwango wa Jilibowa. 9Evale kohomuungula mwene Sawuli jowara jaye, aliwa paza muru waye, aliwa tukula murule vamohi na jowanana jaye jile, aliwa dowagana. Evale koharuma atu ira: <<Mudowe mwilamboni mwatene mwa hiyo aFilistewu, mwawandelege vikwamutu josema vamohi na atu kali mutatamoni muselu wapama oira mwene Sawuli uhumala piwa!>> 10Nomala eno, kohotukulaga jowanana ja Sawuli, aliwa dowa volotchiha munyumbani mwemo mwafwanyeya amilugu ewa. Noira eno, kohotukulaga muru wa Sawuli, aliwa komela muwari mwa nyumba ya Dagomi. 11Mbwenye atu a sidadi ya Jabeji-Jileyadi, kagavwile jatene jamuirele atu Sawuli, 12alombwana atene olimba murima kohovenyaga, aliwa dowa kumihavo maningo a Sawuli vamohi na maningo a ahimaye ale, aliwa adowana waniwa ilambo ya Jabeji. Kagaafiyilena wewule, kohakoya makuvale vati va mutengo mmohi eni mulukulu mwilamboni mwa Jabeji. Kagamanle irana enne kohojejuwari malambo matanu na menli. 13Fwanyeya Sawuli ohokwa na mwasa omutegela Yehova, tchoira liye kakwakwanelihedile jawongile Yehova. Mwasiwa eto anfuka maliba tapanya na mizimu ira amuwandele yafuna liye ira. 14Kafunne nfuka Yehova zelru. Na mwasa wenno Yehova ohompa, liye nvaha umwene Davi mwana Jese.
Currently Selected:
1 Koronika 10: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
