1 Koronika 12
12
Atu kadowile gumana na Davi agali ilambo ya Zikalagi
1Ala ba atu kadowile gumanela na Davi sidadi ya Zikalagi tempu yamutawa liye Sawuli mwana Kixi. Aliwa kali muwari mwa anyakondo kamukamiheda Davi kondoni. 2Aliwa kali a nlogo nimohive na Benjami nnga Sawuli. Kali atu owanda voka mafumo eto kowanda voka mabwe na yovokana na manda amenlene, masiki kala ndanda nodjana nari noromana.
3Asogolrelri ewa ali Ayezeri na Jowasi, ahima a mulombwana Sema nkuda Jibeya. Asogolrelri amohiwa bala: Jeziyeli na Peleti, ahima a Azimavete, Beraka na Jewu nkuda Anatoti, 4Isimaya nkuda Jibeyawu, munyakondo wa kopolo wa nikuru na anyakondo 30 eto wenno ali musogolrelri wewa. Asogolrelri amohiwa bala: Jeremiya, Jahaziyeli, Jowanani, Jozabade nkuda Gedera, 5Eluzayi, Jerimoti, Beyaliya, Semariya, Sefatiya nkuda Harufi, 6Elikana, Isiya, Azareli, Jowezeri na Jasobeyamu akuda Kora, 7vamohi na Jowela na Zebadiya ahima a Jerowawu wa Jedori.
8Davi agali nimburo nolimba notawelamo muisalesaleni, kohokalawo eto anyakondo amohiwa a nlogo na Gadi kadowile gumanela na liye. Aliwa kali alombwana a kopolo, anyakondo okozeya para wana kondo, owanda wana na defeza na mwanango. Aliwa kove dewa dali dowopiha nnga podogoma, eto kowanda tamanga nnga nase atamangaga mmwangoni. 9Aliwa maziniwa ba ala: Ezeri, ali musogolrelri wewa, wanembinli aitaniwa Obadiya, waneraru aitaniwa Eliyabe, 10wanennayi aitaniwa Misimana, wanetanu aitaniwa Jeremiya, 11wanetanu na mmohi aitaniwa Atayi, wanetanu na mbinli aitaniwa Eliyeli, 12wanetanu na taru aitaniwa Jowanani, wanetanu na nnayi aitaniwa Elizabade, 13wanekumi aitaniwa Jeremiya, wanekumi na mmohi aitaniwa Makibanayi. 14Atene anna kali a nlogo na Gadi eto kali asogolrelri a anyakondo. Mutu mung'onong'ono okana kopolo dowana na anyakondo 100, eto mutu mulukulu okana kopolo dowana na anyakondo 1.000. 15Aliwa banno kalambuwile muhindje Jordawu mwedi oroma muhindje ule agazanle fiyeda kwaranya munaviretcha atu. Aliwa eto kohatamangiha atu atene kakala mmambalo mwa muhindje anno kakala makumelo wa nzuwa na mavirelo wa nzuwa wa muhindje ule.
16Kohokalawo eto atu amohiwa a nlogo na Benjami na a nlogo na Juda kadowile gumana na Davi nimburo nolimba notawelamo wali liye ule. 17Davi ohokumaga, liye dowa gumana na aliwa, liye awongana eraga: <<Akala muzile mwa murendele ira mudikamihede, miyo nnouwatchelani na mmirimani mwaga mwatene. Mbwenye akala muzele ira mudivelele wa amwidanaga miyo dahategileve, Mulugu wa makolo ehu gunafuna iziwa eto gunafuna utongani. 18Evale Munemba wa Mulugu ohomuzela mulombwana Amasayi musogolrelri wa atu 30, liye roma wonga eraga:
<<Hiyo nili atwinyu, so Davi, hiyo nili na nyo mwana Jese!
Murendele akale na nyo! Eto murendele akale na atu anno anaukamihedani!
Mwasiwa Mulugu wenyu gwenno unaukamihedani.>>
Mwa enne Davi ohawatchelaga, liye ahela ira kakale asogolrelri a anyakondo aye.
19Kohokalawo eto anyakondo amohiwa a nlogo na Manasesi kadowile gumanela na Davi tempu yavenyile liye na aFilistewu kadowaga ira kawane na mwene Sawuli. Na ibaribari Davi kaakamihedile aFilistewu ale, tchoira andimuwa ewa kagamanle vahana zelru, kohomuwelihaga Davi. Tchoira kaumbuwela ira afwase Davi unowelela wa mbwiyaye Sawuli, aira eno anipe. 20Evale Davi awelelaga Zikalagi, kohokalawo atu a nlogo na Manasesi kazile gumanela na liye. Aliwa maziniwa ba ala: Adina, Jozabade, Jediyeli, Mikayeli, Jozabade, Eliyu na Ziletayi. Kada mutu ali musogolrelri wa alombwana 1.000 a Manasesi. 21Aliwa kohomukamiheda Davi wana na amwidani mwasiwa atene kali anyakondo a kopolo owanda wana kondo eto kali asogolrelri a makuru a anyakondo. 22Fwanyeya malambo matene kozetcha anyakondo wa Davi ira kamukamihedege, fiyeda ira nikuru na anyakondo na Davi nohoindjiva na makalelo ohokala a masika.
Atu kazile gumana na Davi sidadi ya Eboroni
23Kohokalawo eto anyakondo kali okozeyene ira kawane kondo kadowile gumana na Davi sidadi ya Eboroni ira katukule umwene watonga Sawuli ahanakwe, kanvahe Davi nnga mwawongele Yehova. Wu ku indjiva uwa: 24Muwari mwa atu a nlogo na Juda kadowile alombwana 6.800 okana defeza na mwanango kali okozeyene ira kawane kondo. 25Muwari mwa atu a nlogo na Simeyawu kadowile alombwana 7.100 a kopolo owanda wana kondo eto kagali okozeyene ira kawane kondo. 26Muwari mwa atu a nlogo na Levi kadowile alombwana 4.600. 27Mulombwana Joyada ali musogolrelri wa muibalini mwa Arawu. Liye ohoza na anyakondo 3.700. 28Zadoki agalive muzombwe wa kopolo, ohazana andimuwa 22 a muibalini mwaye. 29Muwari mwa atu a nlogo na Benjami, Sawuli abalaye kadowile alombwana 3000. Mwa tempu yenne, adjindji mwa aliwa kaharave atu a muibalini mwa Sawuli. 30Atu a nlogo na Efarayimi kadowile alombwana 20.800, atene anyakondo a kopolo owanda wana kondo eto ovweya muibalini muwa. 31Muwari mwa atu a metadi ya nlogo na Manasesi kadowile alombwana 18.000 karumiwe ira kadowe kamuhele Davi nnga mwene. 32Muwari mwa atu a nlogo na Isakari kohokalawo asogolrelri 200 anno kali ofundjetchetcha, owanda onelramo jejo jafunege aIzarayeli irana tempu ili yatene. Na aliwene vamohi na abaliwa kaasogolrelra atu kohodowa wa Davi. 33Muwari mwa atu a nlogo na Zebuloni, alombwana okozeya, owanda wana kondo na yowanana ili yatene kadowile alombwana 50.000 ovivelela mofuna mwewa ira kamukamihede Davi. 34Muwari mwa atu a nlogo na Nafitali kadowile alombwana 1.000. Aliwa kafwanyeya kagali andimuwa a anyakondo. Aliwa kadowile vamohi na atu okwakwana 37.000 okana defeza na mwanango. 35Muwari mwa atu a nlogo na Dani kadowile alombwana 28.600 okozeya ira kawane kondo. 36Muwari mwa atu a nlogo na Azeri kadowile alombwana 40.000 okozeya ira kawane kondo. 37Kumela pandi ya makumelo wa nzuwa wa muhindje Jordawu muwari mwa atu a nlogo na Rubeni na atu a nlogo na Gadi eto na atu a metadi ya nlogo na Manasesi kadowile alombwana 120.000 okana yowanana kondo ili yatene.
38Atene anna kali alombwana owanda wana kondo, aliwa kohovivelela mofuna mwewa, aliwa dowa Eboroni wewo wafwanyeya Davi mofuna ira kamuhambihe Davi ira akale mwene wa aIzarayeli atene. Eto fwanyeya ira aIzarayeli atene yofuna yewa ali imohive ira kamuhambihe Davi umwene. 39Aliwa kohokalaga wewule na Davi malambo mararu, eto muwari mwa malambo anne aliwa kodja eto kong'wa jengo jejo jaavahile abaliwa. 40Eto atu kali vakwikwive na ale kali olapela nnga atu a malogo a Isakari, Zebuloni na Nafitali kohazelana jodja jidjindji kagagwelihile va aburu, akamelo, akavaru na ng'ombe. Jengo jiwa ti ji: Utu, mabolu osakanyiwa na jovaha ja mufigera, uva oumma, vinyu, azeti, ng'ombe na mabila. Mwasiwa mwilamboni mwa Izarayeli mohokala hagalala.
Currently Selected:
1 Koronika 12: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
