Esaaya 61
61
Haala nelaaɗo Joomiraaɗo e golle muuɗum
1Ruuhu Laamɗo Joomiraaɗo na woni e am,
sabo Joomiraaɗo suɓake kam,
faa mi yottina talkaaɓe kabaaru lobbo.
O nelii kam faa mi sawra wonduɓe e mettorgal ɓerɗe,
mi gooynana nanngaaɓe heɓtugol ko'e muɓɓen,
kasanooɓe du, yoofeede muɓɓen.
2O nelii kam mi gooynoo hitaande nde Joomiraaɗo hollata moƴƴere muuɗum,
e nyalaande nde Laamɗo meeɗen yoɓtotoo,
de mi waaltina ɓerɗe wonduɓe e suno fuu.
3Mi semmbinɗina ɓerɗe yimɓe Siyona wonduɓe e mettorgal,
mi hippa pilkol darja dow ko'e muɓɓen faa loomta ndoondi,
mi hokka ɓe nebam seyo loomta mettorgal,
mi ɓoorna ɓe kaddule teddeengal loomta ɗe ɓernde mettunde,
faa ɓe noddiree leɗɗe fonnditaare mawɗe,
leɗɗe ɗe Joomiraaɗo darni faa holla teddeengal muuɗum.
4Ɓe nyiɓtoto bille arandeeje.
Ɓe ummintinan nokkuuje kalkanooɗe.
Ɓe moƴƴintinan galluuje jeewninooɗe,
laatinooɗe bille gilla jamaanuuji ɗeen.
5Yananɓe ngaran ndura dammuuli mooɗon.
Yimɓe lenyi goɗɗi laatoto remanooɓe on
e gollanooɓe on golle gese inabooje.
6De onon kaa, on noddirte Almaami'en Joomiraaɗo.
On inndirte maccuɓe Laamɗo meeɗen.
On nyaaman barke lenyi goɗɗi,
de ceyoroɗon jawdi muɓɓen.
7Teddeengal mooɗon ɓuran semteende mon arandeere ndeen kile ɗiɗi.
Yawaara mo ndaardetenoɗon oon laatanto wayɓe mooɗon kile ɗiɗi.
Noon keɓirton ngeɗu cowanɗe ɗiɗi ley leydi mooɗon ndiin,
wooɗi seyo mooɗon du heddoto faa abada.
8Sabo miin Joomiraaɗo, miɗo yiɗi sariya goongaajo.
Miɗo wanyi nguyka e laalaare.
Mi barjoto dartiiɓe fodde fonnditaare am.
Mi waɗdan e maɓɓe amaana duumotooɗo.
9Ƴuwdi maɓɓe anndete hakkunde lenyi.
Taaniraaɓe maɓɓe du annditete hakkunde siyiiji yimɓe.
Yi'uɓe ɓe fuu paaman wo ɓe ƴuwdi ndi Joomiraaɗo barkini.
Jimol yettoore
10Mi seyorto e ɓernde am fuu saabe Joomiraaɗo,
mi welweltan saabe Laamɗo am,
sabo o ɓoornii kam kaddule kisindam.
O suddirii kam saayo fonniditaare, faa mi laatoo hono ɓaŋuɗo,
maa no almaami kippotooɗo pilkol darja dow hoore muuɗum,
hono no debbo ɓaŋeteeɗo feɗortoo koɗi muuɗum noon.
11Hono no leydi funnirta leɗɗe,
no sardiŋe funnirta aawdiiri noon,
wo noon Laamɗo Joomiraaɗo ɓanginirta fonnditaare e jettooje yeeso lenyi fuu.
Currently Selected:
Esaaya 61: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
