Popular Bible Verses from Esaaya 61

Share

Ruuhu Laamɗo Joomiraaɗo na woni e am, sabo Joomiraaɗo suɓake kam, faa mi yottina talkaaɓe kabaaru lobbo. O nelii kam faa mi sawra wonduɓe e mettorgal ɓerɗe, mi gooynana nanngaaɓe heɓtugol ko'e muɓɓen, kasanooɓe du, yoofeede muɓɓen. O nelii kam mi gooynoo hitaande nde Joomiraaɗo hollata moƴƴere muuɗum, e nyalaande nde Laamɗo meeɗen yoɓtotoo, de mi waaltina ɓerɗe wonduɓe e suno fuu. Mi semmbinɗina ɓerɗe yimɓe Siyona wonduɓe e mettorgal, mi hippa pilkol darja dow ko'e muɓɓen faa loomta ndoondi, mi hokka ɓe nebam seyo loomta mettorgal, mi ɓoorna ɓe kaddule teddeengal loomta ɗe ɓernde mettunde, faa ɓe noddiree leɗɗe fonnditaare mawɗe, leɗɗe ɗe Joomiraaɗo darni faa holla teddeengal muuɗum.

Teddeengal mooɗon ɓuran semteende mon arandeere ndeen kile ɗiɗi. Yawaara mo ndaardetenoɗon oon laatanto wayɓe mooɗon kile ɗiɗi. Noon keɓirton ngeɗu cowanɗe ɗiɗi ley leydi mooɗon ndiin, wooɗi seyo mooɗon du heddoto faa abada.

Mi seyorto e ɓernde am fuu saabe Joomiraaɗo, mi welweltan saabe Laamɗo am, sabo o ɓoornii kam kaddule kisindam. O suddirii kam saayo fonniditaare, faa mi laatoo hono ɓaŋuɗo, maa no almaami kippotooɗo pilkol darja dow hoore muuɗum, hono no debbo ɓaŋeteeɗo feɗortoo koɗi muuɗum noon.

Ɓe nyiɓtoto bille arandeeje. Ɓe ummintinan nokkuuje kalkanooɗe. Ɓe moƴƴintinan galluuje jeewninooɗe, laatinooɗe bille gilla jamaanuuji ɗeen.

Hono no leydi funnirta leɗɗe, no sardiŋe funnirta aawdiiri noon, wo noon Laamɗo Joomiraaɗo ɓanginirta fonnditaare e jettooje yeeso lenyi fuu.

De onon kaa, on noddirte Almaami'en Joomiraaɗo. On inndirte maccuɓe Laamɗo meeɗen. On nyaaman barke lenyi goɗɗi, de ceyoroɗon jawdi muɓɓen.

Sabo miin Joomiraaɗo, miɗo yiɗi sariya goongaajo. Miɗo wanyi nguyka e laalaare. Mi barjoto dartiiɓe fodde fonnditaare am. Mi waɗdan e maɓɓe amaana duumotooɗo.