Esaaya 60
60
Teddeengal Joomiraaɗo na woni dow Urusaliima
1Urusaliima, umma de njaynaa,
sabo annoora maaɗa na wara,
Teddeengal Joomiraaɗo ɓangii dow maaɗa.
2Goonga, nimre na suddi leydi,
nimre tekkunde na hurri lenyi,
ammaa Joomiraaɗo yaynan dow maaɗa,
teddeengal muuɗum ɓangan dow maaɗa.
3Lenyi adunaaru njahan ley annoora maaɗa,
kaanankooɓe du ley pooyngol maaɗa fajiri.
Urusaliima na fooɗa lenyi adunaaru fuu
4Ɓantu gite de ndaaraa piilol maaɗa fuu.
Inan yimɓe fuu na kawrita, na ngara to maaɗa.
Ɓiɓɓe maaɗa worɓe na ƴuura to woɗɗi,
ɓiɓɓe maaɗa rewɓe du na mbuundaa faa ngartiree.
5Wakkati nji'oyɗaa ɗum fu,
a yaynan de ɓernde maaɗa heewa seyo,
wakkati jawdi faro too maayo ɗuuɗundi ndiin laatowii jeyal maaɗa ndeen,
e nde jawdi lenyi goɗɗi wartowi e junngo maaɗa ndeen.
6Cogge geelooɗi ɗuuɗɗe piilete, toowɗi ɗi Madiyan e Efa.
Ɗi ƴuuran Seba, ɗi ngaddane kaŋŋe e ure.
Waɗɗiiɓe ɗi ɓeen ngardan e kabaaru lobbo e jettooje Joomiraaɗo.
7Cogge Kedar fuu kawritan to maaɗa.
Jawɗi Nebayot laatoto kirsamaaji maaɗa.
Ɗi ngaɗete sadakaaji buleteeɗi dow sakkirde am de ɗi njaabanee.
Mi yayniniran suudu nduun e darja am.
8Ɓeye ngoni ruuyooɓe hono duule ɓee,
hono buugaali piirirooji faro cuuɗi muɓɓen?
9Leyɗe hakkunde maayooji na njowi jikke muɓɓen e am.
Laanaaji Tarsis ngoni artotooɗi ngartira ɓiɓɓe maaɗa worɓe gilla to woɗɗi.
Ɗi ngartidan e kaŋŋe e cardi maɓɓe,
faa teddina innde Joomiraaɗo, Laamɗo maaɗa,
Ceniiɗo Israa'iila, kokkoowo ma teddeengal oon.
10Yananɓe nyiɓtoto kokuuji maaɗa.
Kaanankooɓe muɓɓen ngollante.
Sabo fay si piyumi ma ley tikkere am du,
miɗo woodani ma moƴƴere ley yurmeende am.
11Dammbuɗe maaɗa ɗeen keddoto na omtii wakkati fuu.
Ɗe ommbataako jemma e nyalooma fuu
faa yimɓe lenyi goɗɗi keɓa nanna jawdi to maaɗa,
kam'en e orol kaanankooɓe muɓɓen e mawɓe laamuuji muɓɓen fuu.
12Sabo lenyol maa laamu ngu ɗowtantaako ma fuu piɗɗete.
Leyɗe ɗeen kalkete lay.
13Teddeengal leydi Liban laatoto jeyal maaɗa,
leɗɗe sipire e leɗɗe feere feere kawritan ŋarɗina nokkuure am seniinde ndeen
faa nde laatoo teddunde muuyniinde sanne.
Mi teddinan nokkuure ɗo koyɗe am njaaɓata ɗoon.
14Ɓiɓɓe torrannooɓe ma ɓeen ngaran yeeso maaɗa,
semteende na hurri ɗum'en.
Huyfinannooɓe ma ɓeen fuu kofoto ley koyɗe maaɗa.
Ɓe inndirte galluure Joomiraaɗo, Siyona, galluure Ceniiɗo Israa'iila.
15Fay ko laatinoɗaa galluure yoppaande, wanyaande
to fay gooto faltataakono ɗuum fu,
mi waɗan laatoɗaa galluure mantorteende faa abada.
A laatoto galluure seyorteende ley jamaanuuji fuu.
16A musinan kosam lenyi, a nyaaman jawdi kaanankooɓe.
Ndeen a faaman wo miin woni Joomiraaɗo, kisinoowo ma,
dimɗinoowo ma, Jom Baawɗe mo Yaakuuba.
17Mi waddan kaŋŋe luttita njamndi mboɗeeri,
cardi luttita njamndi ɓaleeri,
njamndi mboɗeeri luttita leɗɗe,
njamndi ɓaleeri luttita kaaƴe.
Mi waɗan jam laatoo ardiiɗo ma,
fonnditaare du, laatoo ndaaranoowo ma.
18Kabaaru war-hoore nanataake ley leydi maaɗa katin.
Haala halkere maa masiiba fuu nanataake ley ngenndi maaɗa katin.
A inndiran kokuuji maaɗa kisindam
gampuuje maaɗa du jettooje.
19Wanaa naange laatante annoora ley nyalooma,
wanaa lewru yayninante ley jemma katin.
Ammaa wo Joomiraaɗo laatoto annoora maaɗa faa abada.
Laamɗo maaɗa laatoto darja maaɗa.
20Naange maaɗa saamataa katin.
Lewru maaɗa du dawataa katin,
sabo Joomiraaɗo laatoto annoora maaɗa faa abada.
Nyalaaɗe gonɗi maaɗa timman.
21Yimɓe maaɗa fuu laatoto fonnditiiɓe.
Ɓe njeytan leydi ndiin faa abada.
Wo ɓe leggel ngel tiiriimi.
Wo ɓe golle juuɗe am faa mi hollira teddeengal am.
22Ɓurɗo famɗude laatoto yimɓe ujunaaje.
Ɓurɗo lokkiɗinde du laatoto lenyol cemmbiɗingol.
Miin Joomiraaɗo, mi waɗan ɗum law ley wakkati majjum.
Currently Selected:
Esaaya 60: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
