Esaaya 62
62
No Urusaliima yeccorii to Joomiraaɗo ley kawtal
1Saabe Siyona de mi deƴƴintaako!
Saabe Urusaliima de mi jooɗataako heese,
faa nde sariya muuɗum goongaajo ɓangi hono jayngol,
de kisindam muuɗum laatii hono jomngol yiite.
2Ndeen leyɗe nji'an sariya maaɗa goongaajo.
Kaanankooɓe fuu nji'an teddeengal maaɗa.
A inndirte innde heyre nde Joomiraaɗo e hoore muuɗum suɓanoyte.
3A laatoto pilkol darja ley junngo Joomiraaɗo.
A laatanto Laamɗo maaɗa pilkol laamu.
4A noddirtaake galluure yoppaande katin.
Leydi maaɗa inndirtaake nokkuure halkaande.
Ammaa a noddirte galluure nde ɓernde am yiɗi.
Leydi maaɗa inndirte ɓaŋaaɗo,
sabo Joomiraaɗo weltorte,
leydi maaɗa du laatanto mo hono ɓaŋaaɗo.
5Hono no jokolle ɓaŋirta surbaajo noon,
wo noon ɓiɓɓe maaɗa worɓe ɓaŋirtee.
Hono no ɓaŋuɗo seyodortoo e ɓaŋaaɗo muuɗum noon,
wo noon Laamɗo maaɗa oon du seyodortoo e maaɗa.
6Urusaliima, mi darnii doomooɓe dow kokuuji maaɗa.
Ɓe ndeƴƴintaako jemma e nyalooma fuu.
Onon noddooɓe Joomiraaɗo, powtiri walanaa on!
7Taa accon o fowtinoo fay nde wootere,
faa nde o yeccini Urusaliima no worrunoo
de laatii maande teddeengal innde makko ley adunaaru.
8Joomiraaɗo hunorake junngo muuɗum nyaamo
e junngo muuɗum semmbiɗingo wi'i:
Mi hokkataa wayɓe mon alkama mooɗon katin.
Yananɓe du njarataa inaboojam ɗam tampantaa ɗaam katin.
9Ammaa taƴooɓe alkama ɓeen, kam'en nyaamata ɗum
de njetta Joomiraaɗo.
Ɓorooɓe inabooje ɓeen du njaran inaboojam ley galle nokkuure am seniinde ndeen.
10Mburtee, mburtoree dammbuɗe!
Omtanee lenyol ngol laawol!
Moƴƴinee, ayyo moƴƴinee balangol!
Ittee kaaƴe!
Ɓantee darapo dow lenyi!
11Inan Joomiraaɗo gooynii gilla keerol leydi, wi'i:
Mbi'ee Siyona, galluure ŋarɗunde ndeen:
Inan kisinoowo maaɗa na wara.
Imo warda e njobdi makko.
Mbarjaari makko artoto mo.
12Ɓe inndirte lenyol ceniingol,
Yimɓe ɓe Joomiraaɗo rimɗini.
Aan du, a noddirte galluure suɓaande,
galluure nde yoppaaka.
Currently Selected:
Esaaya 62: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
