Esaaya 42
42
Haala maccuɗo Joomiraaɗo
1Inan maccuɗo am mo njingananmi,
cuɓaaɗo am mo ceyortoomi.
Mi wattii Ruuhu am e makko.
O hollan lenyi sariya dartiiɗo.
2O feekataako, o ɓantataa daande.
Daande makko nanataake dow laawi.
3O heltataako fay kullowel ɓaƴƴiingel
o nyifataa fay fitilla kaajaaɗo nyifude.
O hiitorto sariya goongaajo.
4O somataa, o tampataa
faa nde o tabintini sariya dartiiɗo ley duuniyaaru.
Leyɗe hakkunde maayo fuu na keɗii ekintinol makko.
5Inan ko Laamɗo Joomiraaɗo taguɗo kammu de feerti ɗum,
beɗɗitinɗo leydi de funni huunde fuu e muuɗum,
kokkuɗo jooɗiiɓe e mayri fuu foofaango
e yiiltotooɓe e mayri fuu yonki oon wi'i:
6Miin Joomiraaɗo, mi noddii ma faa ngaɗaa sariya dartiiɗo.
Mi tiigorte e junngo am,
mi reenete,
mi waɗan laatoɗaa amaana hakkunde am e yimɓe,
laatanoɗaa lenyi annoora,
7faa peertaa gite wumɓe,
omtaa ommbaaɓe ley suudu kasu
mburtinaa jooɗiiɓe ley nimre.
8Miin woni Joomiraaɗo, wo noon woni innde am.
Mi hokkataa teddeengal am goɗɗo.
Tooruuji keɓataa teddeengal am.
9Inan kujje arandeeje paltake.
Miɗo haalana on ko heyɗi,
gilla ɗum waɗay,
miɗo humpita on kabaaru majjum.
Jimol yettoore Joomiraaɗo kesol
10Njimanee Joomiraaɗo jimol kesol,
njimanee mo gilla keerol leydi,
onon yahooɓe dow maayo
e ko woni e maggo fuu,
onon wonɓe daaɗe maayo
e jooɗiiɓe leyɗe hakkunde maggo fuu!
11Ladde yoornde e galluuje muuɗum,
tawti gure ɗe Kedar jooɗii e muɓɓen fuu,
ƴeewnondira e seyo!
Yimɓe Sela ilinoroo seyo,
ɓe ƴeewnondira e welwelo gilla dow ceɓtooli baamle.
12Joomiraaɗo teddinee.
Yimɓe leyɗe hakkunde maayo fuu mana mo.
13Joomiraaɗo na wurtoo hono konunke jaaliiɗo.
Imo umminira kiram makko hono konunke kuyuɗo.
Imo gooynoo haalaaji konu.
Imo feekoo, imo jaaloo wayɓe makko.
14Joomiraaɗo wi'i:
Mi deƴƴinake gilla ko ɓooyi,
miɗo heesininoo, miɗo nanngitii.
Ammaa inan miɗo uuma hono ŋanwuɗo,
miɗo foomta, miɗo otta.
15Mi waɗan baamle e tile fuu laatoo nokku njoorɗo.
Mi yoornan puɗ-puɗal majje.
Mi waɗan gooruuji maayo laatoo leydi njoorndi
de mi yoorna pete.
16Mi waɗan wumɓe njaha dow laawol ngol anndaano.
Mi rewnan ɓe dow balangol ngol koyɗe maɓɓe njaaɓayno.
Mi waɗan nimre laatoo annoora yeeso maɓɓe.
Mi uwan lugge dow laawol maɓɓe.
Goonga, wo ɗuum ngaɗananmi ɓe,
mi yoppataa ɓe.
17Hooliiɓe tooruuji ɓeen njeccorto gaɗa de cemta.
Haaldannooɓe e tooruuji tafiraaɗi njamndi na mbi'a:
«Onon ngoni allaaji amin!» ɓeen fuu cemtan.
Haala lenyol dundarol
18Onon faaɗuɓe, kettinee!
Onon wumɓe, ndaaree de nji'on!
19Moy woni bumɗo si wanaa maccuɗo am?
Moy woni paho si wanaa nelaaɗo am mo nelumi?
Moy woni bumɗo si wanaa keɓuɗo jam?
Moy wumiri hono maccuɗo Joomiraaɗo oon?
20A yi'ii ko heewi,
ammaa a hakkilay.
A omtii noppi maaɗa,
ammaa a nanay faa'e.
21Joomiraaɗo na seyoroo dartaare muuɗum
faa holla manngu e teddeengal jamirooje muuɗum.
22Inan lenyol ngol kam e jawdi muuɗum fuu ɓoɓtaa!
Ɓe fuu ɓe caamii e tuugol ley lugge.
Iɓe cuuɗii ley cuuɗi kasu.
Ɓe kippaama ɓe ɓoɓtaa hono jawdi
ammaa fay gooto walaa faa danna ɓe.
Ɓe kooƴaama ɓe fuu,
ammaa fay gooto wi'ataa: Njeccinee ɓe!
23Moy e mooɗon hettintoo haala kaa?
Moy hakkilta faa nana ko warata?
24Moy watti Yaakuuba e juuɗe fuyotooɓe ɗum?
Moy watti Israa'iila e juuɗe yanooɓe?
Yalla wanaa Joomiraaɗo mo ngaɗuɗen hakke yeeso muuɗum oon naa?
Ɓe muuyay rewude laawi muuɗum.
Ɓe njaɓay hettinaade sariya muuɗum.
25Ndelle o yuppii tikkere makko nyaaɗunde ndeen dow Israa'iila.
O wattii ɗum nder konu cattungu.
Yiite majjum nyaamirii ɓe tatteeji fuu
de ɓe paamitaaki faa'e.
Nge nyaami ɓe,
ammaa ɓe keɓay hakkillo.
Currently Selected:
Esaaya 42: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
